“Fake news” ang itinuturong dahilan ng Philippine Statistics Authority (PSA) sa pagdagsa ng mga residente para sa umano’y registration para sa National I.D. sa San Jose Del Monte, Bulacan.
Ayon kay PSA Assistant Secretary Rosalinda Bautista, bukod sa kumalat na balitang last day na ng pagpaparehistro, mayroon din umanong perang ipamimigay dahilan para magpuntahan ang mga tao sa registration area na nasa loob ng mall.
Nasa 1,600 umano ang inaasahan nilang magpaparehistro para sa araw na iyon ngunit dahil sa naturang fake news ay mahigit pa rito ang nagtungo para sa registration.
Dahil dito, agad na sinuspinde ng mga awtoridad ang operasyon matapos malabag na ang ipinatutupad na social distancing measures.
