Makikipagpulong ang Department of Justice (DOJ) at Bureau of Immigration (BI) sa mga opisyal ng South Korean Embassy hinggil sa idineklarang travel ban sa gitna ng banta ng 2019 coronavirus disease (COVID-19).
Sinabi ni DOJ undersecretary Markk Perete na pagpupulungan ng magkabilang panig bukas, ika-28 ng Pebrero, kung paano epektibong maipatutupad ang travel ban.
Kabilang sa mga maaaring mapag-usapan din aniya ang pagtukoy sa mga biyahero na mula sa mga lugar na sakop ng ban at paglalatag ng coordinating mechanisms para maging maayos ang pagpapatupad ng travel ban.
Kinumpirma ni Perete na nag-alok na ng assistance ang Consul General para sa maayos na pagpapairal ng travel ban.
Ang BI naman ay inatasan na ring mahigpit na i-monitor ang pagpapatupad ng mga Immigration officer sa travel ban.
Una nang inirekomenda ng Inter-Agency Task Force ang travel ban mula sa North Gyeonsang Province subalit exempted ang mga Overseas Filipino Worker (OFW), mga estudyante at permanent residents. —ulat mula kay Bert Mozo (Patrol 3)