Dinepensahan ng Department of Budget and Management o DBM ang paggamit ng unprogrammed appropriations o UA matapos itong ituring ng ilan bilang pork barrel o “magic fund.”
Ayon kay Budget Undersecretary Goddess Hope Libiran, mali ang mga bintang na ang UA ay pork barrel dahil nagsisilbi itong standby appropriations na may pahintulot ng Kongreso sa General Appropriations Act.
Maaari anyang gamitin lamang ang UA kung may sobrang revenues o approved loans para sa partikular na mga proyekto.
Paliwanag pa ni Usec. Libiran, karamihan sa UA ay para sa foreign-assisted projects na hindi pa naaaprubahan ang loan agreements, kaya’t hindi ito maisama sa regular budget ng mga ahensya.
Dagdag pa niya, hindi rin agad nire-release ng DBM ang naturang pondo dahil kailangan munang mag-request ang mga ahensya at isailalim sa masusing evaluation ang mga nasabing request.
