Hinikayat ni Manila Archbishop Luis Antonio Cardinal Tagle ang publiko na paigtingin pa ang pakikipag-ugnayan sa Diyos sa pamamagitan ng ‘pagpapakatao’.
Sa kanyang homily sa isinagawang misa para sa traslacion alas-12:00 ng hatinggabi, sinabi ng Arsobispo na dapat matutunan ng lahat ang diwa ng pagpapakababa at pagiging simple ng pamumuhay.
Hindi aniya nasusukat ang pagiging isang tao sa pagkakaroon ng marangyang buhay, dami ng kayamanan o sa pagiging makapangyarihan kung hindi sa pagiging mapagmalasakit sa kapwa.
Pinangunahan ni Msgr. Hernando Coronel ang nasabing misa na dinaluhan ng ilang personalidad tulad nila Apostolic Nuncio to the Philippines Archbishop Gabrielle Caccia, Manila Mayor Joseph Estrada, PNP Chief Ronald Dela Rosa, NCRPO Chief Director Oscar Albayalde at MMDA Chairman Danny Lim.
Kasunod nito, hinimok din ng Kardinal ang publiko na isama sa kanilang panalangin ang mga kababayang taga Marawi na nakaranas ng karahasan sa kamay ng mga terorista maging ang mga biktima ng mga nagdaang kalamidad.
“Ang isang mensahe sa atin tuwing traslacion, tuwing lipatan, tuwing pagkilos at paglalakbay… na huwag panghinaan ng loob dahil mayroong nakikipaglakbay sa atin, si Hesus, kasama natin lagi sa mga traslacion ng ating buhay.” Pahayag ni Cardinal Tagle
—-
