Sisibakin ni Pangulong Rodrigo Duterte ang lahat ng mga opisyal ng Clark International Airport oras na maulit ang insidente ng pagnanakaw sa bagahe ng mga pasaherong dumarating sa nasabing paliparan.
Ito ang ibinabala ni Pangulong Duterte matapos makarating sa kanya ang ulat na nabuksan at ninakawan ang bagahe ng isang nagbabalik bayang Overseas Filipino Worker (OFW).
Ayon kay Pangulong Duterte, sa harap mismo ni transportation Secretary Arthur Tugade, kanyang sinabihan ang mga opisyal ng Clark International Airport na maghanap na ng bagong trabaho kung hindi nila kayang pangalagaan ang mga bahage ng mga pasahero.
Matatandaang isang OFW mula sa Canada ang nagreklamo matapos mawalan ng walongpo’t dalawang libong pisong (P82,000.00) halaga ng gamit sa kanyang checked in baggage noon lamang Enero 10.
