SPORTS

Nakabawi ang Gilas Pilipinas sa pagkatalo nito sa kamay ng South Korea matapos gibain ang higanteng koponan ng Russia sa score na 85-71 sa 2015 Jones Cup.

Sa unang yugto pa lamang ng laro ay nagpakita na ng bangis ang Gilas sa Xinchuang Gymnasium sa Chinese Taipei.

Ito ang ika-2 panalo ng Gilas sa 3 laro kung saan una nilang dinurog ang Taiwan sa pagbubukas ng torneo.

Una rito, nanalo naman ang Philippine National Women’s basketball na Perlas Pilipinas laban sa Hong kong sa score na 75-62.

By: Jelbert Perdez

Pumayag at nangako na si Filipino-American at Los Angeles Lakers Guard Jordan Clarkson na maglalaro ito sa Gilas Pilipinas sa 3 Olympic games simula sa susunod na taon sa Rio de Janeiro.

Ito ang kinumpirma ni Samahang Basketbol ng Pilipinas Chair Ricky Vargas at PLDT PBA Board Member Pato Gregorio.

Ayon kay Gregorio, nakipag-dinner si Clarkson sa kanila matapos ang pagkatalo ng Gilas sa South Korea kagabi sa nagpapatuloy na Jones Cup.

Dito ipinahayag ni Clarkson ang pagnanais na makapaglaro sa ilalim ng koponan ng Gilas hanggang taong 2024.

Sinabi pa ni Clarkson na nais niya ring makasama sa ilalim ng national team ang mga kapwa niya kabataang basketbolista na sina Ray Parks at Kobe Paras na kapwa naglalaro sa Estados Unidos.

Ipinabatid ni Vargas na sa mga susunod na araw ay pipirma na si Clarkson ng affidavit na siya ay Pilipino.

By  Ralph Obina

Tuloy ang pag-asam ng Gilas Pilipinas ng ikalawang panalo sa 37th William Jones Cup.

Kasunod na rin ito nang pagkatalo sa koponan ng South Korea kagabi.

Pursigido ang Gilas Pilipinas na makuha ang panalo sa pakikipagharap sa team ng Russia mamayang ala-1:00 ng hapon.

Inamin ng Gilas na kailangan nilang mag-doble kayod dahil malakas ang russian team na una nang nagpabagsak sa mga koponan ng Amerika, South Korea at maging ng New Zealand.

Sa katunayan, Russia ang nangunguna sa Jones Cup sa 3-0 standing.

By  Judith Larino

Tinalo ng South Korea ang Philippine basketball team na Gilas Pilipinas sa pagpapatuloy ng 2015 Jones Cup.

Ito ang unang pagkatalo ng Pilipinas makaraang maipanalo ang laban kontra sa Taiwan sa pagbubukas ng torneo.

Nawala ang sinasabing puso ng Gilas nang tambakan sila ng SoKor na nagtapos sa iskor na 82-70.

Bigo nang makabuslo ang Gilas sa natitirang limang minuto ng fourth quarter ng laban.

By   Jaymark Dagala  

Babalik sa ibabaw ng ring ang dating world champion na si Antonio Margarito.

Ito ang kinumpirma ng manager ni Margarito na si Sergio Diaz.

Ayon kay Diaz, ang pagbabalik ni Margarito ay di para sa pera kundi para ibangon ang kanyang sarili at patunayan sa buong mundo na mayroon pa itong ibubuga.

Sa ngayon ay hindi pa batid ang eksaktong laban ni Margarito ngunit sa nakalipas na apat na buwan ay patuloy aniya ito sa pag-eensayo.

Huling laban ni Margarito ay noong 2011 kung saan ay tinalo ito ni Miguel Cotto.

Matatandaang isa sa mga pinakamasaklap na pagkatalo sa career ni Margarito ay nang makalaban nito si 8-Division World Champion Manny Pacquiao.

Itoy kung saan naghilamos ng dugo at nabugbog ng husto ang mukha ni Margarito sa kamay ng pambansa.

By  Ralph Obina

Itinuturing na triumph over adversity ang panalo ni Filipino Australian golfer Jason Day sa katatapos na PGA Championships.

Si Day ay ika-limang Australian na nanalo ng PGA title at ika-labing dalawa sa mga nanalo sa major championship.

Inamin ni Day na mistula siyang nabunutan ng tinik nang makuha ang titulo dahil tatatak na ang turing sa kaniyang magaling na golfer matapos mapasakamay ang nasabing titulo.

Magugunitang tinalo ni Day si golf legend Tiger Woods .

By  Judith Larino 

Nasungkit ng Filipino-Australian golfer na si Jason Day ang 2015 PGA Championship.

Ito ay matapos talunin ni Day ang Amerikanong si Jordan Spieth sa pamamagitan ng major record low nitong 20-under 268.

Ayon kay Day, napaka-ispesyal ng kampeonatong ito at hindi pa rin aniya siya makapaniwala sa kanyang natamong tagumpay.

Dahil sa panalo, si Day ang ika-limang Australian na nakakopo ng PGA Championships bukod kina Steve Elkington, Wayne Grady, David Graham at Jim Ferrier.

Agad namang nagpaabot ng pagbati ang Malacañang sa panalo ni Day.

Ang ina ni Day ay isang Pilipina na tubong Leyte.

By  Ralph Obina

Photo grabbed from: www.sportsnet.ca

Tiwala si Gilas Pilipinas Coach Tab Baldwin na magiging maganda ang resulta ng mga laro ng koponan sa Europa.

Ngayong araw na ito inaasahang tutulak pa northern Europe ang Gilas Pilipinas para sa tatlong laban sa Iceland, Estonia at Netherlands.

Sinabi ni Baldwin na kailangan ng Gilas na maging maganda ang resulta ng dalawang laro nila lalo na’t hindi naman inaasahan na malakas ang team Iceland.

Gayunman, inamin ni Baldwin na magpapakita ng lakas ang mga koponan ng Estonia at Netherlands dahil sa malalaking players ng mga ito.

Inihayag ni Baldwin na itatapat nila sa mga malalaking players ng ibang koponan sina Asi Taulava at Sonny Thoss dahil wala sa team sina Junmar Fajardo at Marc Pingris.

By  Judith Larino  

Hihintayin ni Gilas Coach Tab Baldwin ang pagbalik ni June Mar Fajardo para makalahok ito sa FIBA Asia Championship.

Ayon kay Baldwin, limitado na lang ang kanilang oras para makapagsanay subalit mananatili bukas ang pintuan para sa pagbabalik ni Fajardo.

Iginiit ni Baldwin na kailangan nila si Fajardo para maglaro sa koponan, at kanilang hihintayin na maghilom ang kanyang injury sa paa.

Sa kasalukuyan, mayroon palang 17 manlalaro ang Gilas na aktibong sumasali sa pagsasanay para sa FIBA.

By  Katrina Valle