Pinayuko ng Indiana Pacers ang Philadelphia 76ers sa kanilang paghaharap kanina sa iskor na 91-75.
Nanguna sa panalo ng Pacers si Paul George na kumana ng 15 puntos.
Dahil sa panalo, naputol ang dalawang sunod na pagkatalo ng Pacers.
Kasalukuyang nasa ika-pitong puwesto ang Pacers sa Eastern Conference standings at kinakailangang maging consistent sa mga susunod na 12 nilang laro upang tuluyang makaangat sa kanilang ranking.
By Ralph Obina
Photo Credit: Brian Spurlock / USA TODAY Sports
Hindi binigyan ng pagkakataon ng Mahindra Enforcers ang Alaska Aces para makaungos sa kanilang paghaharap sa pagpapatuloy ng PBA Commissioner’s Cup.
Nagsilbing bayani sa laro si Aldrech Ramos na gumawa ng 25 points habang si KG Canaleta ay nagdagdag ng 17 points samantalang gumawa ng 16 points, 15 rebounds at 7 assists ang import na si Augustus Gilchrist.
Halos nakalapit pa ang Aces sa pagsisimula ng fourth quarter matapos mai-poste ang iskor sa 82-80 subalit hindi na nakahabol hanggang matapos ang laro at naitala ang final score sa 102-94.
By Judith Larino
Nasungkit ni World Number One Novak Djokovic ang titulo sa Indian Wells Tennis Tournament.
Ito ay matapos durugin ni Djokovic ang kalabang si Milos Raonic ng Canada sa Men’s Finals sa iskor na 6-2, 6-0.
Madaling naidispatsa ng Serbian tennis star ang kalaban nito sa finals na tumagal lamang ng isang oras at 17 minuto.
Ito na ang ika-limang Indian Wells title na naibulsa ni Djokovic.
By Ralph Obina
Magkakaroon ng rematch ang MMA o Mixed Martial Arts Fighters na sina Conor Mcgregor at Nate Diaz.
Ayon sa MMA fighting, sa Welterweight Division muling maghaharap sina Mcgregor at Diaz na siyang main event sa Ultimate Fighting Championship o UFC 200.
Dahil dito, magkakaroon ng pagkakataon si Mcgregor na makabawi kay Diaz na siyang nagbigay ng unang pagkatalo sa kaniya.
Agad din namang iaanunsyo ng pamunuan ng MMA fighting ang iba pang detalye kaugnay ng nasabing laban.
By: Allan Francisco
Patuloy na nanamayagpag ang San Antonio Spurs ngayong NBA season makaraang talunin ng koponan ang Golden State Warriors sa iskor na 87-79.
Kumamada ng 26 na puntos at 13 rebound si Lamarcus Aldridge samantalang tumipa naman ng 18 puntos at 14 na rebounds si Kawhi Leonard.
Sa ngayon ay may 44 na sunud-sunod na panalo na ang Spurs sa kanilang home court sa regular season.
Kapantay na ngayon ng spurs ang second-longest streak sa NBA history.
By: Avee Devierte
Malalagasan ng dalawang manlalaro ang Philippine Azkals.
Ito ay matapos na ianunsyo ni Jerry Lucena at Paul Mulders ang kanilang pagreretiro sa international football.
Matatandaang 88 beses na ikinatawan ni Lucena ang Philippine Football Team at umiskor ng dalawang mahahalagang goal gaya ng laban ng Azkals kontra Maldives sa 2014 AFC Challenge Cup.
Habang 38 beses ding ni-representa ni Mulders ang Azkals simula noong 2011.
By Ralph Obina
Desidido na si Roger Federer na maglaro sa Miami Open na magsisimula sa susunod na linggo.
Ito ang kinumpirma ng agent ni Federer na si Tony Godsick hinggil sa plano ng 17-time grand slam tournament champion.
Matatandaang noong nakaraang buwan, isinailalim sa surgery si Federer dahil sa torn knee cartilage at hindi na ito nakalaro pa matapos matalo kay Novak Djokovic sa semi-finals ng Australia Open.
By Meann Tanbio
Walang nakikita ang kampo ni Timothy Bradley na posibilidad nang pagbagal at paghina ng mga suntok ni Manny Pacquiao sa bakbakan ng mga ito sa April 9.
Ito ayon kay Coach Teddy Atlas ay kahit pa inaasahan niyang mananalo si Bradley sa nasabing laban.
Ibinunyag ni Atlas ang inihanda nilang sorpresang game plan para magtagumpay si Bradley kontra sa Pambansang Kamao.
Sinabi pa ni Atlas na taglay pa rin ni Pacman ang mabilis na pagsuntok at foot work bagamat naging conservative na ito aniya sa pag-atake sa laban.
By Judith Larino
Nasilat ng Cleveland Cavaliers ang inakalang panalo na sana ng Dallas Mavericks.
Ito ay matapos magawang maka-iskor ni Kyrie Irving sa mga nalalabing segundo ng laro na nagbigay pa ng isang kalamangan sa Cavs at makuha ang panalo sa iskor na 99-98 kontra Dallas.
Nakuha ng Cavs ang panalo kahit pa wala si Lebron James na pinagpapahinga at layong gawing fresh ang starters ng Cavs.
Gumawa si Irving ng 33 puntos habang sinegundahan naman ito ni Kevin Love na tumipa ng 23 puntos.
By Ralph Obina
Photo Credit: cavs.com
Tagumpay ang San Miguel Beer sa unang laban sa Alaska Aces matapos ang makasaysayang championship game noong nakalipas na season.
Nagpakitang gilas ang anim na players ng SMB nang umiskor ng double digit kahit pa hindi naglaro si back to back PBA MVP June Mar Fajardo.
Kabilang dito sina Tyler Wilkerson, Alex Cabagnot at Chris Ross.
Tinambakan ng Beermen ang Aces sa final score na 116-96.
By Judith Larino
Credit: PBA Images