SPORTS

Handang-handa nang sumabak sa NBA Playoffs ang koponan ng Cleveland Cavaliers.

Ito ang sinabi ng power forward ng team na si Lebron James.

Ani James, kung bukas na agad ang Playoffs ay tiyak na nasa kundisyon na ang buong team.

Matatandaang tinalo ng Cavs ang Charlotte Hornets sa iskor na 112-103 dahilan upang pumasok ang koponan sa Playoffs na nasa unang pwesto na ngayon sa Eastern Division.

Nagawa pa ring manalo ng Cavs kontra Hornets sa kabila ng hindi paglalaro ni Kyrie Irving dahil sa ankle injury.

Mayroong kabuuang 55 panalo at 22 talo ang Cavs, mas magandang tala kumpara noong nakaraang season na mayroon lamang 53 panalo.

Nadagdagan pa ang bilang ng mga Pinoy boxers na pasok sa Rio Olympics na gaganapin sa Agosto.

Ito ay makaraang umabanse sa finals si Charley Suarez ng Pilipinas nang patumbahin sa ikatlong round ng semifinals ang Chinese fighter na si Shan Jun sa AIBA Asian Qualifying Tournament.

Dahil dito, sigurado na ang spot ni Suarez sa Rio Olympics kasama ang Filipino light flyweight na si Rogen Ladon.

Makakalaban ni Suarez sa gold medal round ang boksingero mula sa Mongolia.

By Ralph Obina 

Target ng ABAP o Association of Boxing Alliances of the Philippines na madagdagan pa ang bilang ng mga boksingerong Pinoy na papasok sa Rio Olympics.

Pahayag ito ni Ed Picson, Executive Director ng ABAP matapos makapasok sa Rio Olympics ang dalawang boksingerong Pinoy na sina Rogen Ladon at Charlie Suarez.

Ayon kay Picson, may pagasa pa ang makapasok alinman kina Eumir Marcial at Mario Hernandez na kapwa bronze medalists.

Umaasa rin anya sila na may mapapasok na babaeng boksingero sa Olympic qualifiers sa Mayo at isa pa uli sa buwan ng Hunyo.

“We’ve been preparing for 4 years, ang aming preparasyon para sa Olympics pagkatapos nung London Olympics noong 2012, yung aming tingin dito ay kaya talagang mag-qualify, yun ay dahil sa mahabang preparasyon.” Pahayag ni Picson.

By  Len Aguirre | Ratsada Balita

Pasok na ang dalawang (2) Pinoy boxers sa Rio de Janeiro Olympics matapos talunin ang kani-kanilang kalaban sa semi-finals ng Asia/Oceania Olympic Qualifying Tournament sa China.

Si Rogen Ladon ang unang Pinoy boxer na nag-qualify sa Rio Olympics matapos talunin si Devendro Singh Laishram ng India.

Napatumba naman ng isa pang Pinoy boxer na si Charly Suarez ang pambato ng host country na si Shan Jun.

Nanalo si Suarez sa pamamagitan ng technical knockout sa lightweight division.

Makakaharap ni Suarez sa finals si Otgondalai Dornyambuu ng Mongolia samantalang sasabak muli si Ladon kontra kay Hasanbiy Dusmativ ng Uzbekistan para sa gold medal.

By  Judith Larino

Inilampaso ng Golden State Warriors ang Utah Jazz sa score na 103-96 sa kanilang laro sa National Basketball Association o NBA.

Nabura ng Warriors ang double-digit deficit sa second half ng laro at naitala ang 68th victory sa kasalukuyang NBA season sa tulong ng 31 points na naiposte ni Stephen Curry.

Una rito, nakabuslo ng 3-pointer si Klay Thompson may 15 seconds ang nalabi sa regulation kaya’t nauwi ito sa overtime.

Bunga ng kabiguang ito, tabla na ngayon ang Jazz, Houston Rockets at Dallas Mavericks sa bakbakan para sa dalawang pwesto sa Western Conference playoffs.

By Jelbert Perdez  

Photo Credit: Russ Isabella/USA TODAY Sports