SPORTS

Inaasahang magiging maingat na ang defending champion san miguel beermen sa kanilang pagharap sa  Barangay Ginebra Gin Kings sa Game 2 ng best of seven series ng 2016-2017 PBA all Filipino cup, mamaya.

Ayon kay San Miguel coach Leo Austria, pinaghahandaan na nila ang resbak ng Ginebra lalo’t napaka-saklap ng pagkatalo ng gin king sa game 1 sa score na 109-82, noong Biyernes.

Tiniyak naman ni Gin Kings coach tim cone na babawi ang barangay ginebra sa kanilang masaklap na pagkatalo at nakahanda rin sila sa dikdikang laban sa game 2.

Aminado naman si Austria na  kahit makuha ang game 1 ay hindi pa naman ito ang katiyakan na mananalo sa serye bagkus nagbibigay ito ng  psychological advantage.

Lalarga ang second round sa Quezon convention center sa Lucena city, mamayang ala sais y medya ng gabi.

By Drew Nacino

Tuloy na tuloy ang laban ni 8-Division World Champion Manny Pacquiao sa darating na Abril.

Bagamat wala pang pinal na makakalaban sinabi ng Pambansang Kamao na wala siyang nakikitang problema sa pagsabak sa laban sa Abril lalo’t naka-recess naman ang Senado sa mga panahong iyon.

Sinabi ni Pacquiao na posibleng sa General Santos City gawin ang unang sigwada ng kanyang training.

Matatandaang kabilang sa mga pinagpipiliang makalaban ng fighting senator ay ang dati nitong sparring partner na si Amir Khan at ang Australian boxer na si Jeff Horn.

By  Ralph Obina   

Umatras na ang Hungary sa bid nito para mag host ng 2024 Olympic Games.

Ito ay dahil sa umano’y hindi pagsusundo ng mga pulitiko sa hakbang na mag-bid ang Hungary para sa Olympic games.

Naging malaking factor din sa pagbawi ng bid ng Hungary ang petition letter ng mga nationals sa naturang hakbang.

Hindi naman tinukoy ang dahilan sa pagkontra ng mga nationals ng Hungary sa pag-bid sa Olympic games.

By Judith Larino

Papalapit na ng papalapit ang German tennis star na si Angelique Kerber sa target nitong muling masungkit ang world number one ranking.

Ito ay makaraang talunin ni Kerber si Monica Puig ng Puerto Rico sa nagpapatuloy na Dubai Tennis Championships sa iskor na 6-2, 6-3.

Dahil sa panalo, nakabawi na rin si Kerber nang talunin siya ni Puig nang paglabanan ng dalawa ang Rio Olympic gold medal noong Agosto ng nakaraang taon.

Matatandaang hawak ni Kerber ang trono sa Women’s Tennis noong nakaraang taon nang makuha ito sa kanya ni Serena Williams bandang Setyembre.

By  Ralph Obina

Tinotodo na ni Donnie “Ahas” Nietes ang paghahanda para sa kanyang susunod na world title fight.

Makakasagupa ni Nietes si Eaktawan Mor Krungthep Thonburi ng Thailand para sa bakanteng IBF Flyweight Championship sa Abril 29 sa lalawigan ng Cebu.

Ayon kay Nietes, gagawin niya ang lahat upang hindi mapahiya sa harap ng kanyang mga kababayan.

Pahayag naman ng ALA Boxing Promotions, maliban kay Nietes ay isasabak din sa Pinoy Pride 40 ang dalawa pang Filipino boxers na sina Mark Magsayo at Jeo Santisima.

By Jelbert Perdez

May hanggang 2019 pa si Swiss tennis star roger federer para maglaro ng tennis.

Ito ang inihayag ni Federer na labis na ikinatuwa ng kanyang mga fan.

Sinabi ni Federer na tatlong (3) taon ang pinirmahan niyang kontrata kung saan kabilang sa mga nakalinya niyang torneo ay ang Swiss indoors sa Basel na siyang hometown nito.

Matatandaang nito lamang nakaraang buwan bumalik sa paglalaro si Federer matapos ang kanyang knee injury kung saan nagawa niya pang maibulsa ang 18th Grand Slam title sa Australian Open.

By  Ralph Obina