RONDA PROBINSYA

Sumampa na sa 13 ang patay sa Acute Gastroenteritis sa Iloilo City.

Ayon sa datos na inilabas ng City Epidemiology and Surveillance Unit (CESU) nitong Martes.

Mula July 26 hanggang Sept. 20, umabot na sa 637 ang kaso ng Acute Gastroenteritis at Cholera sa lungsod, kabilang ang 19 na mga bago at 30 na aktibo.

Nakatakdang magbibigay ng Bakuna kontra Cholera at Gastroenteritis ang Iloilo City Health Office sa mga Barangay sa Lungsod na mataas ang kaso ng waterborne diseases.

Para magbigay ng tulong sa mga nagkakasakit ng Acute Gastroenteritis at Cholera sa Lungsod, inilunsad ng Regional Finance Service Office ng Police Regional Office 6 (PRO-6) ang “Strengthening Barangay and Police Partnership against Cholera.”

Nakatanggap ng food packs, vitamins, at gamot mula sa RFSO 6 ang mga nagkasakit na residente sa Barangay Zamora Melliza.

Ang Barangay Zamora Melliza ay nangunguna sa may pinakamaraming naitalang kaso ng Acute Gastroenteritis at Cholera sa lungsod.

Dalawang chinese na sangkot sa pagdukot sa kanilang kapwa tsino ang natimbog ng mga otoridad sa Mandaue City, Cebu.

Kinilala ang mga suspek na sina Lin Tuanjie, 50 anyos, residente ng Aldea Del Sol Subdivision sa Barangay Bankal at Ji Chenglong, 33- anyos, ng Bestwater Subdivision, Barangay Marigondon.

Inaresto sina Lin at Ji sa bisa ng warrants na inilabas ni Judge Annie Marie Militante ng Regional Trial Court 7 Branch 53 ng Lapu-Lapu City sa mga kasong Kidnapping at Serious Illegal Detention.

Nasakote ng Anti-Kidnapping Group Visayas Field Unit sa pangunguna ni Lt. Zozimo Ravanes Jr., si Lin sa restaurant nito sa Sitio Soong 1, Barangay Mactan habang dinampot si Ji hindi kalayuan sa Lapu-Lapu City.

Ang mga naturang dayuhan ang itinuturong kasabwat ng apat na iba pang tsino na napatay sa isang police operation upang mailigtas ang chinese businessman na si Lyu Xingou, sa Barangay Lahug, Lapu-Lapu City noong Mayo a-30.

Suspendido ang klase sa ilang mga lugar bunsod pa rin ng masamang panahong dulot ng Southwest Monsoon o Habagat.

Kabilang dito ang ilang lugar sa Batangas, kung saan kanselado ang klase sa lahat ng antas sa pampubliko at pribadong eskwelahan sa Lian, Calatagan, Lemery, Tuy at Taal.

Nagdeklara rin ng suspensyon ng klase sa Nasugbu at Calaca mula pre-school hanggang Senior High School.

Patay ang tatlong magka-angkas sa motorsiklo matapos salpukin ng truck sa Governor Ferrer Drive sa General Trias City, Cavite.

Kinilala ang mga biktima sina Jose Tuy Junior, 24 anyos, driver ng motorsiklo; Junel Tuy, 18 anyos at John Paul Basco, 22 anyos, pawang residente ng Almanza Uno, Las Piñas City.

Ayon sa mga otoridad, may kabilisan ang takbo ng mga biktima at dahil madulas ang kalsada bunsod ng pag-ulan, sumalpok ang tatlo sa truck.

Sinubukan pang iwasan ng truck driver na si Edgar Saguitan, 42 anyos ang motorsiklo subalit hindi na nito nagawa dahil madulas ang daan.

Naisugod pa sa General Trias Medicare Hospital ang mga biktima pero idineklarang mga dead-on-arrival.  —sa panulat ni Jenniflor Patrolla

Isang pugot na ulo ng lalaki ang iniwan sa gitna ng kalsada sa Talisay, Negros Occidental.

Kinilala ang bangkay na si Mario Demetrio, residente Ng Bacolod City at sinasabing bugaw ng isang babaeng sex worker na pinatay ng hinihinalang customer nito.

Wala ring suot na pang-itaas si Demetrio habang tadtad ito ng sugat sa likod, may pasa sa katawan at nakatali ng straw ang dalawang kamay nito.

Agad namang natagpuan ang ulo ng biktima sa di kalayuan ng crime scene.

Batay sa imbestigasyon, kasama ni Demetrio ang sex worker na si Jovelyn Mahinay nang maka-tranksiyon nila ang isang hindi pa matukoy na kliyente at matapos nito ay natagpuang patay ang babae.

Iniimbestigahan na ng mga otoridad ang krimeng nangyari sa nasabing lugar. —sa panulat ni Jenniflor Patrolla