RONDA PROBINSYA

Lalaki natagpuang patay sa loob ng septic tank

Natagpuang patay ang isang lalaki sa loob ng septic tank sa Peñablanca, Cagayan.

Kinilala ang biktima na si John Mark Soriano, 20 anyos, helper at residente ng Barangay Parabba.

Ayon kay Maj. Harold Ocfemia, hepe ng Peñablanca Police, isang opisyal ng Barangay Baliwag ang nagturo sa mga pulis kung nasaan ang bangkay.

Agad namang naaresto ang mga nasa likod ng pagpatay makaraang umamin sa krimen.

Kinilala ang tatlo sa limang suspek na sina alyas Ronron, Junior at Rodel na umaming pinagtulung-tulungan nilang pagpapaluin si Soriano hanggang sa mamatay at inilagay sa septic tank.

Pinagbintangan umano ang biktima na nagnakaw ng cellphone na nagkakahalaga ng 9,500 pesos na pag-aari ng isa sa mga suspek.

Nahaharap naman sa kasong murder ang limang suspek habang nagsisilbing ebidensya ang CCTV footage sa crime scene. —sa panulat ni Jenniflor Patrolla

September 21, 2022 0 comment

RONDA PROBINSYA

Minero nalibing nang buhay sa hinuhukay na tunnel

written by Angelica Doctolero

Patay ang isang 29 anyos na minero matapos gumuho ang tunnel sa kinaroroonan nito habang naghuhukay ng ginto sa Governor Generoso, Davao Oriental kahapon.

Kinilala ang biktima na si Romeo Delcampo Jr.

Batay sa inisyal na imbestigasyon ng mga otoridad, bigla na lamang gumuho ang tunnel habang naghuhukay ang biktima at hindi rin gumana ang water pump kaya’t nalunod sa ilalim ang biktima.

Ayon sa Municipal Disaster Risk Reduction and Management Office (MDRRMO), alas-dyis na ng umaga nang na-retrieve ang bangkay ni Delcampo mula sa 30 talampakang hukay.

Sinubukan pang dalhin sa ospital ang biktima ngunit idineklara itong dead on arrival ng doktor.

Samantala, patuloy ang imbestigasyon ng mga otoridad sa naturang insidente. – sa ulat ni Gilbert Perdez (Patrol 13)

September 20, 2022 0 comment

RONDA PROBINSYA

Estudyante patay sa hazing sa Davao City

written by Drew Nacino

Patay ang isang estudyante ng University of Mindanao (UM). Habang sugatan ang isa pa sa isinagawa umanong hazing ng fraternity na Akrho– Alpha Delta chapter sa buhangin, Davao City.

Kinumpirma ng Office of the President ng UM na 4^th year student ng College of Criminal Justice ang nasawing biktima.

Kinondena rin ng pamunuan ng unibersidad ang nasabing krimen at iginiit na bawal ang lahat ng fraternity sa paaralan sa ilalim ng Republic Act 8049 o Anti-Hazing Law.

Hindi rin kinikilala ng paaralan ang nasabing fraternity group, maging ang kanilang mga aktibidad at miyembro.

Handa namang magbigay ng tulong ang pamantasan sa pamilya ng mga biktima at makipagtulungan sa imbestigasyon ng pulisya.

September 20, 2022 0 comment

NATIONAL NEWS RONDA PROBINSYA

Legazpi City, naghigpit ng border control points bunsod ng ASF

written by Angelica Doctolero

Naghigpit ng border control points ang lokal na pamahalaan ng Legazpi City sa lalawigan ng Albay, upang mapigilan ang pagpasok ng iba’t-ibang klase ng sakit sa mga hayop partikular na ang african swine fever.

Ayon kay Dr. Manny Victorino, ang assistant veterinary officer ng Albay Provincial Veterinary Office, nakalatag na ang anim na animal veterinary quarantine check-point sa ilang lugar sa lalawigan.

Inaasahang mas hihigpitan ng mga otoridad ang mga borders sa darating na linggo.

September 20, 2022 0 comment

NATIONAL NEWS RONDA PROBINSYA

Truck na papuntang kasalan, tumagilid sa Palawan

written by Angelica Doctolero

Isang truck ang tumagilid sa munisipyo ng barangay Bagong Bayan Roxas, Palawan.

Sa imbestigasyon ng mga otoridad, patungo sana sa kasalan ang naturang truck sakay ang ilang mga pasahero nang sumadsad ito sa pababang bahagi ng kalsada dahilan para mawalan ng kontrol ang driver nito.

Wala namang naiulat na lubhang nasaktan sa aksidente habang nagsasagawa na ng operasyon ang mga otoridad sa nabanggit na lugar.

September 20, 2022 0 comment

NATIONAL NEWS RONDA PROBINSYA

Away ng dalawang pusa, itinuturong dahilan ng sunog sa Cebu City

written by Angelica Doctolero

Aabot sa 21 bahay o katumbas ng 46 na pamilya ang nawalan ng tirahan makaraang sumiklab ang isang sunog sa Villalon Drive sa Sitio Lower Panaghiusa, Barangay Capitol Site, Cebu City.

Sa pahayag ng may ari ng bahay na pinagmulan ng sunog na kinilalang si Beltran Gador, nagsimulang sumiklab ang apoy matapos magrambulan ang dalawang pusa sa kanilang kisame dahilan upang mag-spark ang linya ng kuryente.

Nagsasagawa na ng malalimang imbestigasyon ang mga otoridad hinggil sa totoong pinagmulan ng sunog.

September 20, 2022 0 comment

NATIONAL NEWS RONDA PROBINSYA

Ilang estudyante sa isang paaralan sa Koronadal City, nagpositibo sa covid-19

written by Angelica Doctolero

Nag-positibo sa covid-19 ang ilang mag-aaral mula sa tatlong section ng Koronadal National Comprehensive High School (KNCHS).

Ayon kay Valentin Dignadice, principal 1 ng nasabing paaralan, patuloy ang regular na klase sa kanilang eskwelahan habang pansamantalang ibinalik sa online modality o distance learning ang mga estudyanteng nagpositibo sa covid-19.

Nilinaw naman ni Dignadice na wala umanong dapat ikabahala ang mga magulang dahil na-contain na ang apektadong silid-aralan at nakapag-sagawa na rin ng disinfection ang city health office.

September 20, 2022 0 comment

NATIONAL NEWS RONDA PROBINSYA

10 arestado sa iligal na sabong sa Nueva Vizcaya

written by Angelica Doctolero

Arestado sa mga otoridad ang sampung indibidwal na sangkot sa iligal na sabong sa Dupax Del Sur, Nueva Vizcaya.

Kinilala ang mga suspek na sina Junel Poski; Rocky Baguio; Jack Basatan; Deogracias Fernandez; Elno Palnac; Rufino Pindog; Winzel Baniwas; Reggie Ramos; Andy Bumato; at Ronald Durana.

Ayon sa mga otoridad, agad silang nagkasa ng operasyon matapos makatanggap ng report hinggil sa iligal na aktibidad ng mga suspek sa compound ng CCQ Cockpit Arena.

Sa impormasyon ng mga otoridad mabilis na nagsitakbuhan ang mga sangkot sa iligal na aktibidad kung saan, dalawang pang suspek na kinilalang sina Jimmy Pasigon at Ronald Batchiliar ang nakatakas at patuloy pang pinaghahanap.

Nakumpiska sa raid, ang anim na ulo ng live cockfighting roosters, isang improvised cockfighting rink, at bet money na nagkakahalagang P5,845.

Nahaharap sa kasong paglabag sa Presidential Decree 449 para sa inquest proceedings laban sa mga naarestong suspek.

September 20, 2022 0 comment

RONDA PROBINSYA

Parte ng taniman ng tubo sa Negros Occidental, nasunog

written by Angelica Doctolero

Natupok ng apoy ang kalahating ektarya ng plantasyon ng Toboso, Negros Occidental o katumbas ng7 buwang tanim na tubo na aanihin sa Nobyembre

Batay sa imbestigasyon ng Bureau of Fire Protection (BFP), sinunog nitong Biyernes ng mga magsasaka ang mga damo matapos maani ang mga tubo sa katabing taniman.

Ngunit lumakas at bumaliktad umano ang direksiyon ng hangin kaya inabot ng apoy ang katabing plantasyon.

Habang pinagtulungan naman ng ilang residente at magsasaka ang pag-apula ng apoy at wala namang naitalang nasaktan sa sunog at tinutukoy pa ang halaga ng pinsala nito.

September 18, 2022 0 comment

HEADLINES RONDA PROBINSYA

P5.5M halaga ng sigarilyo, nasamsam sa Zamboanga Peninsula

written by Gilbert Perdez

Tinatayang 5.5 million pesos na halaga ng sigarilyo ang nasabat mula sa tatlong indibidwal sa magkahiwalay na operasyon ng mga awtoridad sa Zamboanga Peninsula.

Kinilala ni Col. Richard Verceles, operations chief ng Area Police Command-Western Mindanao, ang mga suspek na sina Jason Utlang, Alfadzre Sumaga, at Givemark Epat na nahuli sa Barangay Makugihon sa bayan ng Molave, Zamboanga del Sur.

Nakumpiska mula sa tatlo ang mahigit 915,000 pesos na halaga ng puslit na yosi.

Samantala, nasabat din ng mga pulis ang nasa 2.6 million pesos na halaga ng sigarilyo matapos tumugon sa iniulat na aksidente sa national highway sa bayan ng Dumingag.

Sa isa pang operasyon, nakakumpiska naman ang mga awtoridad ng mahigit 2 million pesos na halaga ng smuggled cigarettes sa Barangay Walled City sa Jolo, Sulu.

September 17, 2022 0 comment

Newer Posts

Older Posts