RONDA PROBINSYA

Sinampahan ng kasong kriminal ang isang 19-anyos na dalaga sa  Biliran province dahil sa pagpapakalat ng fake news.

Ayon kay Naval chief of police Major Ryan Delima, nahaharap sa kasong paglabag sa Cybercrime Prevention Act ang hindi pinangalanang college student na residente ng Barangay Langgao, Cabucgayan.

Nabatid na ini-report sa pulisya at ipinagkalat umano ng dalaga na dinukot siya ng mga naka-bonnet na lalaki na sakay ng isang puting van noong Agosto 20 sa bayan ng Naval.

Ngunit matapos ang serye ng imbestigasyon ay natuklasan ng mga awtoridad na nag-imbento lamang ng kwento ang suspek.

Bagama’t dumulog sa tanggapan ng alkalde ang estudyante at naglabas ng public apology ay tinuluyan pa rin ito ng mga pulis.

Timbog sa mga otoridad ang pitong indibidwal na sangkot sa Illegal Online Cockfighting Operation o E-Sabong sa Arayat, Pampanga.

Kinilala ang mga suspek na sina Larry Lulu; Reyner David; Reymart Quiambao; Michael Lulu; Rowel Lusung; Lester Lulu; at Berting Lulu.

Sa imbestigasyon ng mga otoridad, naaktuhang nagsasabong online ang pitong suspek sa barangay telapayong na nakuhanan ng E-Sabong paraphernalias, kabilang na ang isang cellular phone, tv, at ₱33,000 na ginamit sa pagsusugal.

Nahaharap sa kasong paglabag sa Presidential Decree No. 1602 o Anti-Illegal Gambling Law ang mga naarestong suspek.

Aabot sa 7.7 million pesos na halaga ng marijuana bricks ang naharang sa check point ng mga otoridad sa dalawang local tourist sa Sitio Ampawilen, Poblacion, Sadanga, Mountain Province.

Kinilala ang dalawang naaresto na sina Eliseo IV San Pedro Quiambao, 23-anyos, at John Cedric Gadia, 21-anyos.

Ayon sa mga otoridad, nagkasa sila ng Interdiction Border Control Checkpoint, matapos makatanggap ng impormasyon na may iligal na aktibidad sa kalinga patungong Baguio City.

Dito na naharang ang isang kulay gray na kotse na may plakang NAE 3385 sakay ang dalawang suspek kasama ng tatlong sako na naglalaman ng 67 piraso ng marijuana bricks na may timbang na 64.283 kilos at may standard drug price na 7,713,960 pesos.

Agad na isinailalim sa imbentaryo ang mga nakumpiskang iligal na droga habang inihahanda na ang kaukulang kaso laban sa mga suspek.

Winasak ng mga otoridad ang P3.4 milyong halaga ng tanim na marijuana sa walong lugar sa Ilocos Sur at Benguet, kamakailan.

Ayon sa Philippine Drug Enforcement Agency (PDEA) Region 1 director Ronald Allan Ricardo, sinalakay ng mga tauhan ng PDEA-La Union, PDEA-Ilocos Sur, Police Regional Office 1-Regional Drug Enforcement Unit (PROI-RDEU) at iba ang ahensya ng gobyerno, ang apat na taniman ng marijuana sa hangganan ng Sitio Addan-Nagawa, Barangay Caoayan, Sugpon, Ilocos Sur nitong Setyembre a-8.

Sinalakay din ng mga otoridad ang dalawang taniman sa Brgy. Kayapa, Bakun, Benguet na sinundan ng dalawa pang marijuana plantations sa hangganan ng Mt. Balungabing, Brgy.  Caoayan, Sugpon, Ilocos Sur, at Brgy. Kayapa, Bakun, Benguet.

Agad na sinunog ang mga nakumpiskang marijuana habang patuloy pang pinaghahanap ang mga responsible sa pagtatanim ng mga marijuana.

Optional na rin ang pagsusuot ng face mask sa outdoor spaces sa lalawigan Negros Occidental.

Alinsunod ito sa Executive Order na nilagdaan ni Governor Eugenio Jose Lacson, noong Biyernes.

Ang nasabing kautusan ay “effective immediately” sa buong lalawigan maliban sa indoor spaces at medical facilities.

Ang Negros Occidental na ang ikatlong lugar sa bansa na nagpatupad ng optional na pagsusuot ng face masks sa outdoors spaces matapos ang Cebu City at lalawigan ng Iloilo.

Ito’y matapos ang sinasabing “verbal approval” ni Pangulong Bongbong Marcos sa rekomendasyon ng Inter-Agency Task Force na gawin na lamang boluntaryo ang pagsusuot ng face mask sa labas ng bahay.

Gayunman, nilinaw ni Press Secretary Trixie Cruz-Angeles na hindi pa isinasapinal ang nasabing polisiya.