RONDA PROBINSYA

Nasa 18 barangay sa Cagayan ang apektado ng African Swine Fever (ASF).

Ayon kay acting Provincial Veterinarian Dr. Noli Buen, nakumpirma nilang apektado ng ASF sa pinakahuling pagsusuri sa blood samples ng mga baboy mula sa Barangay Agani sa Alcala; La Suerte, Bayabat; Monte Alegre at Centro sa Amulung; Liwan Sur at Lanna sa Enrile; Baculuf, Iguig; Warat, Piat; Parog Parog, Palao; Maguirig, Iriga; Cadaanan sa Solana at Dagupan; Malalinta Palca at Bugnay sa Tuao.

Mula sa pitong (7) bayan, nasa 1,094 na mga baboy ang isinailalim sa culling o kinatay at ibinaon para makontrol ang pagkalat ng virus dulot ng ASF at mahigit 200 hog raisers ang naapektuhan na binigyan ng tulong pinansiyal ng pamahalaang panlalawigan.

Tiniyak ni Buen ang patuloy na pagkuha ng blood samples sa mga karatig na lugar na apektado ng ASF at monitoring na rin sa iba pang bayan sa Cagayan.

Patuloy aniya ang mahigpit na pagpapatupad nila ng checkpoints sa mga boundary ng lalawigan kaugnay sa total ban sa pagpasok ng live hog, frozen pork at processed products sa Cagayan mula sa ibang probinsya sa Region 2 maging sa Ilocos.

Isandaang porsyento nang kumpleto ang bagong passenger terminal building (PTB) ng Clark International Airport.

Ayon sa Department of Transportation (DOTr), ang nasabing proyekto na nasa ilalim ng Build, Build, Build program ay natapos noong nakalipas na buwan na mas maaga ng isang buwan sa orihinal na target completion date.

Inaasahang magiging operational ang bagong PTB ng Clark Airport sa Enero 2021 at makakatulong para ma decongest ang passenger traffic sa Ninoy Aquino International Airport (NAIA).

Kapag naging operational na, inaasahang tataas ng hanggang 12.2-milyon ang bilang mga pasahero kada taon o triple mula sa kasalukuyang 4.-milyon.

Anim pang dayuhang suicide bombers ang mahigpit na mino-monitor ng Armed Forces of the Philippines (AFP) sa Mindanao.

Kinumpirma ito ni Philippine Army Chief Lt .General Cirilito Sobejana matapos maaresto ng joint AFP-PNP ang babaeng Indonesian suicide bomber na si Renzy Fantasya Relli o Cici.

Sinabi ni sobejana na si Cici at asawa nitong si Andi Baso na nasawi na ay kabilang sa walong foreign suicide bombers na nasa kanilang watchlist.

Kabilang aniya sa mga banyangang tinutugis niya ay Malaysian, Indonesian at Egyptian at mayruon na silang idea kung nasaan ang mga ito.

Meron tayong walong sinusabaybayan na foreign nationals isa na rito si Cici dati-rati walo ito, si Andi Baso, si Abu na nassawi rin sa engkwentro doon sa Barangay Salman, Muncipality of Ampatuan, Maguindanao. Itong si Cici na nahuli noong makalawa , well may idea po kami kung saan siya naroroon in due time hopefully ma-neutralize o makuha din natin. ani Sobejana — sa panayam ng Santos at Lima sa 882  

Suspendido muna ang pamimigay ng learning modules sa Zamboanga Del Sur matapos makapagtala ng local tranmission ng coronavirus disease 2019 (COVID-19) sa lalawigan.

Nabatid na 12 barangay sa lalawigan ang apektado nang suspensyon ng pamamahagi ng learning modules para sa pasukan ngayong taon.

Sinabi ng Department of Education Region 9 na itutuloy na lamang ang pamimigay ng module kapag gumaling na ang mga pasyente o nakakumpleto na ng kanilang quarantine.

Pinagwo-work-from-home muna ang public school district supervisors at school heads.

Pumanaw na ang nag-iisang captive-bred tamaraw na si “Kalibasib” o Kalikasan Bagong Sibol.

Ang tamaraw na si Kalibasib ay critically-endangered species na dwarf water buffalo na matatagpuan lamang sa isla ng Mindoro.

Ayon sa Department of Environment and Natural Resources (DENR), nasawi nitong nakalipas na weekend si Kalibasib sa Tamaraw Gene Pool Farm sa barangay Manoot sa Rizal, Occidental Mindoro matapos magka-diarrhea noong Biyernes.

Si Kalibasib ay ipinanganak noong ika-24 ng Hunyo, 1999 at inaasahang mabubuhay lamang ng 20 hanggang 25 taong gulang.

Sinabi pa ng DENR na ang human age ni Kalibasib ay 84 years old na dahil ang edad ng tamaraw ay minu-multiply by four para makuha ang katumbas nito sa edad ng tao.

Isang linggong sarado ang tanggapan ng Government Service Insurance System (GSIS) sa Kalibo, Aklan.

Ayon sa advisory ng GSIS Kalibo Office sa Facebook page nito, sasailalim sa disinfection ang tanggapan sa gitna na rin ng tumataas na kaso ng coronavirus disease 2019 (COVID-19) sa lalawigan.

Lahat din anito ng mga empleyado ay sasailalim sa RT-PCR swab test at mandatory quarantine, bagamat tuloy ang trabaho sa ilalim ng alternative work arrangements.

Isasagawa rin ang sanitation at contact tracing habang sarado ang Kalibo office ng GSIS hanggang sa biyernes, ika-16 ng Oktubre.

Batay sa Provincial Epidemiology Service Unit, ang Aklan ay nakapagtala ng 131 cases ng COVID-19 kung saan pito (7) ang nasawi at 107 naman ang gumaling.