RONDA PROBINSYA

Naglunsad ng search and rescue operations ang Philippine Coast Guard para mahanap ang 14 na mangingisda matapos lumubog ang sinasakyang bangka ng mga ito sa Pangasinan.

Ayon kay pcg Spokesperson Commodore Armand Balilo, dalawang nakaligtas na tripulante ng fishing boat na Aqua Princess ang nag-ulat sa insidente.

Batay sa salaysay ng mga tripulanteng kinilalang sina Pedro Manalo at Jerby Regala, madaling araw ng Oktubre a-7, Miyerkules nang lumubog ang kanilang sinasakyang barkong pangisda.

Anila, inutusan sila ng kapitan na si Eddie Ariño na maglayag patungong pampang para humingi ng tulong.

Gayunman, kaninang umaga na sila nakarating ng Infanta at naiulat ang insidente.

Sugatan ang 8 indibidwal matapos ang nangyaring vehicular accident sa Bangui, Ilocos Norte.

Base sa ulat ng mga otoridad, paliko na sana ang trak sa pakurbadang daan na sakop ng barangay baruyen nang bigla itong tumagilid, matapos mawalan ng preno.

Dalawa sa walong katao na nasaktan ang labis na nagtamo ng pinsala sa katawan makaraang ma-trap sa ilalim ng cargo truck na naglalaman ng mga ididiliver na steel bars.

Agad namang dinala sa pagamutan ang mga sugatang biktima, habang patuloy ang isinasagawang imbestigasyon ng pulisya sa nabanggit na insidente.

Tinamaan ng coronavirus disease 2019 (COVID-19) ang executive assistant ni contact-tracing czar at Baguio City Mayor Benjamin Magalong.

Sa isang post ng Public Information Office, dito humihingi ng dasal si Doy Tabilog para sa lahat ng COVID-19 patients, sa kanilang pamilya, at gayundin sa lahat ng frontliners.

Nanawagan din si Tabilog sa lahat ng kanyang officemates at mga nakasalamuha niya mula Oct. 1 hanggang Oct. 3 na magpakonsulta sa doktor lalo na kung may nararanasan silang sintomas.

Pinatawan ng hanggang sampung taong pagkakakulong ang dating alkalde, bise-alkalde at siyam na konsehal sa isang bayan ng Catanduanes bunsod ng sinasabing anomalya sa pagbili ng isang backhoe loader na nagkakahalaga ng mahigit P13 million noong 2005.

Batay sa desisyon ni Sandiganbayan Associate Justice Ronald Moreno, napatunayang guilty sa kasong paglabag sa Anti-Graft and Corrupt Practices Act si dating Viga municipal mayor Jose Torres.

Ginawaran din ng katulad na senstensya sina dating vice mayor Yolando Tuquero at Sangguniang Bayan members Lourdes del Rosario, Asuncion Odi, Rosario Mollasgo, Horacio Aquino Jr., Domingo Villanueva, Orbel T. Tonio, William T. Tuplano, at Gomercindo T. Litong.

Nagpalabas naman ng arrest warrant ang anti-graft court laban sa isa pang council member na si Nerissa Usero na hindi pa rin nahuhuli ng mga awtoridad hanggang sa kasalukuyan.

Maaari nang bilhin ng kumpaniyang More Electric and Power Corporation (MORE POWER) ang lahat ng distribution assets ng dating power firm sa Iloilo na Panay Electric Company (PECO).

Kasunod ito ng naging kautusan ng Iloilo City Regional Trial Court na maisama ang jba pang mga asset ng PECO sa inihaing Writ of Possession  laban dito ng MORE Power.

Batay sa 22 pahinang desisyong inilabas ni Iloilo RTC Judge Nestle Go, kinatigan nito ang mosyon ng More Power na maisama maging ang Category C assets ng PECO sa Writ of Possession na una nang ipinalabas ni Iloilo RTC Judge Emerald Requina Contreras noong Pebrero 2020.

Ginawa ito ng Korte matapos igawad ng Kongreso ang 25 taong legislative franchise para sa bagong distribution utility na More Power salig sa Republic Act 11212.

Sa panig naman ng MORE Power, malugod nilang tinanggap ang naging desisyon na ito ng Korte para mapagbuti pa nila ang operasyon gayundin ang pagdaragdag ng substations.

Ayon naman kay Atty Allana Mae Babayen-on, Legal Counsel ng MORE Power, hihintayin nila ang Court sheriff na iturn over sa More Power ang mga assets gaya ng naging proseso ng naging pagexpopriate ng iba pang assets ng PECO.