RONDA PROBINSYA

Patay ang isang lalaki matapos manlaban sa mga otoridad sa isang operasyon ng Philippine National Police Anti-Kidnapping Group (PNP AKG) sa Barangay Naugsol, Subic, Zambales.

Ayon kay Col. Villaflor Banawagan, commander ng AKG Luzon Field Unit, maghahain lang sana sila ng arrest warrant laban sa suspek na si Edison Villaran dahil sa kasong murder nang paputukan nito ang mga operatiba.

Dahil dito, gumanti ng putok ang mga pulis kay Villaran na ikinamatay nito.

Sinabi ni Banawagan na siV ang nasa likod ng pagpugot ng ulo ng isang lalaki sa Cardona, Rizal noong Agosto nang taong 2019.

Si Villaran aniya ay miyembro ng grupo na pinamumunuan ng dating pulis na si Patrolman Maray na sangkot sa robbery at kidnap for ransom groups na naka-engkuwentro na rin ng mga pulis sa Rizal nitong Hulyo.

Nakuha sa crime scne ang isang kalibre .45 baril.

Isinailalim sa lockdown ang 23 lugar sa iba’t ibang barangay sa Baguio City dahil sa clsutering ng kaso ng coronavirus disease 2019 (COVID-19).

Ayon sa Baguio City Public Information Office, umiiral ang hard lockdown sa Purok 7 sa City Camp Central at sa Purok 7, Malaya sa Dominican Hill.

Lockdown naman ang ipinatutupad sa 21 pang barangay sa lungsod tulad ng Purok 3 sa Barangay Ambiong,  Interior B, Balacbac sa Sto. Tomas Proper, Yang Subdivision at Purok 5 sa Bakakeng Central, Purok Greenhills Purok, Divisoria, Purok Tondo, Purok Ayala A at Purok Ayala B sa Sto Niño-Slaughter at Sadjo, Purok Bubon sa Loakan Proper.

Kahapon, ipinag-utos ni Baguio City Mayor Benjamin Magalong ang pagsasara ng buong Rillera Bldg. at buong Vanilla Alley sa Baguio City Public Market hanggang ika-9 ng Oktubre para isagawa ang disinfection at contact tracing.

Suspendido muna ang pagbibigay ng travel authority sa mga locally stranded individuals (LSI)’s na patungong Negros Occidental.

Ito ang inianunsyo ng Philippine National Police (PNP), alinsunod na rin sa Joint Resolution ng Western Visayas Regional Inter-Agency Task Force (RIATF) kung saan nakasaad ang pag-apruba sa pansamantalang pagsususpindi sa pag-uwi ng mga lsis at residente sa probinsya mula ika-3 hanggang ika-9 ng Oktubre.

Samantala, ipinabatid na ng Directorate for Operations sa lahat ng regional offices ng pulisya, Aviation  Security Group at Maritime Group upang mapaigting ang pagpapatupad ng naturang hakbang.

Ang travel authority ay isang pangangailangan  upang makaalis at magtungo sa iba’t ibang lugar sa bansa batay  sa utos ni Department of Interior and Local Government (DILG) Secretary  Eduardo Año. — sa panulat ni John Jude Alabado

Aksidenteng nahukay ng isang backhoe operator ang nasa 1000 pounds ng vintage bomb sa Barangay Isabela Proper, Isabela City, Basilan.

Ayon kay Joint Task Force Basilan Commander Col Domingo Gobway, agad na rumesponde ang tropa ng 16th Special Forces Company at PNP Explosive Ordnace Division Team sa lugar nang makatanggap sila ng impormasyon hinggil dito.

Agad nagsagawa ng proper evaluation at assessment sa vintage bomb ang mga awtoridad bago ito dinala sa 4th Special Forces Battalion headquarters na nasa Barangay Cabunbata.

Ayon naman kay Western Mindanao Command Chief Lt. Gen. Corleto Vinluan, Jr., sa ngayon at naghihintay nalang sila ng report mula sa EOD team para matukoy ang classification ng vintage bomb.

Gayunman, sinabi ni Vinluan na patuloy pa rin silang naka alerto sa lugar para sa anumang hindi inaasahang mga pangyayari.

Patay ang isang doktor at kasambahay nito sa Barangay Sambag Uno sa Cebu City matapos ma-trap sa nasusunog nitong bahay.

Kinilala ang mga biktima na sina Dr. Glenda Mayol-Neri, 80-anyos, at Francisca Epel Fomentera, 71-anyos.

Ayon kay Fire Officer 2 Fulbert Navarro, natagpuan ang mga biktima sa ikalawang palapag ng naturang bahay kung saan may takip pa ng unan ang mukha ng mga ito para hindi anila makalanghap ng usok.

Sinubukan pang isugod ng mga otoridad sa ospital ang mga biktima subalit binawian na ng buhay ang mga ito sa ambulansya pa lamang.

Kuwento ng mga kapitbahay ng mga biktima, narinig nilang humihingi ng tulong ang mga ito na nirespondehan naman nila subalit hindi sila makapasok dahil nakakando ang gate ng bahay.

Halos P5-milyon ang danyos ng naturang sunog na nakaapekto rin sa tatlong pamilya.

Patuloy namang iniimbestigahan ng Bureau of Fire Protection ang dahilan ng nasabing sunog.

Nakataas ngayon ang alert level 1 sa Bulkang Kanlaon na nasa isla ng Negros.

Ito’y makaraang makapagtala ng apat na pagyanig ang bulkan sa nakalipas na magdamag.

Ayon sa Phivolcs, maliban sa mga pagyanig, nagbuga rin ng usok ang nasabing bulkan na umabot sa 400 metro.

Dahil dito, mahigpit na pinaalalahanan ng Phivolcs ang mga negrense na huwag lumapit sa 4 kilometer radius permanent danger zone.

Patuloy na binabantayan ng Phivolcs ang nasabing bulkan dahil sa posibilidad na posibleng paglala ng aktibidad nito.