RONDA PROBINSYA

Tiniyak ng pamunuan ng Philippine Military Academy (PMA) na walang magiging white wash sa nangyaring pamamaril sa loob ng Fort Del Pilar sa Baguio City.

Ayon kay Maj. Cherryl Tindog, masusi ang ginagawa nilang imbestigasyon sa insidente gayundin naman ang Baguio City Police Office.

Magugunitang isang sundalo ang patay habang dalawa ang nasugatan matapos mag-amok si ariman 2nd Class Christopher Lim sa kanilang barracks noong Setyembre 30.

Sumunod na binawian ng buhay si Staff Sgt. Jeoffrey Truqueza kinabukasan matapos ang pamamaril habang nitong Biyernes nasawi ang huling survivor na si Staff Sgt. Vivencio Raton.

Nabatid na dumaranas ng problema sa pag-iisip si Lim nang isakatuparan nito ang krimen sa nabanggit na petsa gamit ang isang M16 rifle.

Natiklo ng mga operatiba ng Antipolo Police ang dalawang staff members ng Rizal Provincial Security Division dahil sa pamemeke ng COVID-19  test results.

Narekober ng mga otoridad mula sa mga suspek na sina Arnel Ignacio at Edgardo Juanilo ang ilang fake COVID-19 test results, marked money, at isang motorsiklo.

Ikinasa ang entrapment operation laban sa mga naarestong suspek matapos ang reklamo ni Jonathan Berutso.

Nagtungo umano sa Berutso sa kapitolyo para magpa-rapid test pero sinabihan daw sya ng gwardya na wag nang pumila dahil bibigyan na lamang daw s’ya nito ng fake na negative result sa halagang P1,700 at dagdag na P200 para umano sa pagkain.

Hindi umano sumunod sa payo ng gwardya si Berutso bagkus nagpatuloy ito sa pagpila para sa rapid test kung saan nagpositibo ito sa COVID-19.

Pero nagnegatibo naman ito makaraang isailalim rin sa swab testing.

Matapos nito, agad na naghain ng complaint sa himpilan ng pulisya si Berutso  dahilan upang agad na ikasa ang operasyon na ikinaarersto ng dalawang gwardya na nahaharap ngayon sa mga kasong robbery, extortion, at falsification of public documents.

Sinabi naman ni Police Lieutenant Colonel Jose Arandia, na huwag pamarisan ang ginawa ng dalawang kawani ng pamahalaan na nakuha pang pagkakitaan ang pandemya sa pamamagitan ng pamemeke ng mga resulta ng COVID-19 test.

Inihirit ng isang mambabatas na suspendihin muna ang ipinatutupad na “no beep card, no ride policy” ng Land Transportation Franchising and Regulatory Board (LTFRB).

Ito’y ayon kay Gabriela Partylist Rep. Arlene Brosas ay dahil tila ginagawang sangkalan nito ang pandemya ng COVID-19 para pigain at pagkakitaan ang mga kawawang commuter at manggagawa.

Dapat aniyang itigil ang nasabing polisiya dahil na rin sa maanomalyang presyo nito na P80 bawat isa, may P100 load subalit kailangang i-maintain ang P65 gayundin ang P5 convenience fee sa kada reload sa mga third party service provider.

Kasunod nito, hiniling din ni Brosas na i-refund sa mga komyuter ang ibinayad nila para sa card na napilitan lang ding bumili para sa cashless payment na nais ng Department of Transportation (DOTr).