RONDA PROBINSYA

Hinamon ni Basilan Rep. Mujiv Hataman ang Armed Forces of the Philippines (AFP) na patunayan ang alegasyon nitong ginagamit na breeding ground ng mga rebelde  ang Madrasa o Muslim schools sa Mindanao.

Giit ng mambabatas, produkto siya ng Madrasa school at sa limang taon ng kaniyang pag-aaral at hindi aniya siya nakarinig kahit minsan na may nag-uudyok sa kanila na gumawa ng terrorismo.

Ginawa ni Hataman ang pahayag bilang reaksyon sa naging pahayag ni AFP Chief of Staff Gen. Gilbert Gapay na tinitingnan nila ang posibilidad na radikalisasyon sa Madrasa schools na siyang ugat ng pagdami ng suicide bombers sa bansa.

Iginiit pa ng mambabatas na lubhang mapanira ang naging pahayag na ito ni Gapay na tila hinuhusgahan na ang mga Muslim na sangkot sa anumang kaguluhan sa bansa na aniya’y malinaw na walang matibay na batayan.

Nasabat ng mga awtoridad mula Philippine Drug Enforcement Agency (PDEA) at NAIA Inter-Agency Drug Interdiction Task Group ang higit sa 150 gramo ng raw ecstacy sa central mail exchange center sa lungsod ng Pasay.

Nabatid na nagmula ang parcel sa Jansen J. J. K. sa Amersfoort, Netherlands at idineklarang ‘keychain’ na ipadadala sana sa Cebu City.

Pero nang isailalim ang naturang parcel sa phyisical examination, napag-alaman itong iligal na droga na aabot sa 750,000.

Sa ngayon, hawak na ng mga awtoridad mula sa PDEA ang naturang kargamento.

Timbog ng mga tauhan ng Philippine National Police – Anti Kidnapping Group (PNP – AKG) ang isang kidnap for ransom suspect sa Marawi City.

Kinilala ang suspek bilang si Michael Estanol na naaresto sa bisa ng warrant of arrest na inilabas ng Ginoog City Regional Trial Court.

Kasalukuyang nahaharap sa kasong murder si Estanol dahil sa pagpatay nito sa negosyanteng si Ernesto Rementizo noong 2018

Bukod pa rito sangkot din ang suspek sa kidnap for ransom sa grupo ni Ibrahim Langco Salic kung saan, tina-target nito ang mga negosyante sa Marawi City at iba’t-ibang lugar sa Mindanao.

Samantala, sangkot din si Estanol sa iba pang iligal na mga aktibidad tulad ng gun-for-hire at pangingikil o extortion. — ulat mula kay Jaymark Dagala (Patrol 9)

Dapat na umanong ipatupad sa Indonesian suicide bomber na nahuli sa Sulu nitong October 10 ang anti-terrorism law.

Ito ang iginiit ni Sen. Panfilo Lacson kung saan maaari aniyang maging test case sa pagpapatupad ng anti-terrorism law ang pagkahuli kay Nana Isirani alyas Rezky Fantasya Rullie.

Si Rullie ay nadakip kasama ang dalawang iba pang babaeng hinihinalang asawa ng mga Abu Sayyaff nakumpiska sa mga ito ang mga improvised explosive device vest at iba pang mga pampasabog.

Giit ni Lacson halimbawa ito ng “inchoate offenses” na nakasaad sa bagong batas kung saan maaari ring ipagharap sa kasong kriminal ang mga kasama sa pagpaplano at paghahanda sa pagsasakatuparan ng isang terrorism act.

Sa ilalim ng batas, reclusion perpetua o habang buhay na pagkakakulong na ang parusang maaaring ipataw sa mga ito.