RONDA PROBINSYA

Binigyang parangal ng Armed Forces of the Philippines (AFP) ang mga buhay na bayani ng Marawi siege, may 3 taon na ang nakalilipas mula nang ideklara itong malaya mula sa mga terrorista.

Sa simpleng programa na isinagawa kagabi sa AFP Lapu-Lapu Grandstand sa Kampo Aguinaldo, ginawaran ng Presidential Medal Order of Lapu-Lapu na may rangkong kamagi si B/Gen. Fabian Pedregosa gayundin si Col. Randy Pascua.

Iginagawad ang nasabing parangal mula mismo sa pangulo ng bansa dahil sa pagtupad ng mga ito sa adbokasiya ng punong ehekutibo na dalhin ang bansa tungo sa kapayapaan.

Ginawaran din ng distiguished conduct star sina Col. Jose Jesus Luntok, Capt. Arnel Lozada, 2/Lt. George Francisco At S/Sgt. Roland Saludes dahil sa ipinakita nilang tapang at kabayanihan sa kasagsagan ng bakbakan.

Tumanggap naman ng AFP chief of staff commendation medal at ribbon sina M/Gen. Generoso Ponio, B/Gen. Romeo Brawner, Col. Pompeyo Almagro, Col. Antonio Rota Jr, Lt/Col. Jason Jumawan, Maj. Christopher Noa Torres, Capt. Jennylyn Tamacay at Cpl. Eric Collado dahil sa kanilang natatanging ambag upang malansag ang puwersa ng ISIS inspired Maute terrorist group na kumubkob sa Marawi City sa loob ng 5 buwan nuong 2017.

Maliban sa mga nabanggit, ginawaran din ng Order of Lapu-Lapu na may rangkong magalong ang sibilyang si Dr. Isabel Conjuangco – Suntay dahil sa bukas palad na pagbibigay ng kaniyang sarili para sa paglilingkod sa kasagsagan ng Marawi siege.

Isang sanggol na ibinalot sa towel ang natagpuan malapit sa sapa ng barangay Calumpang, Liliw, Laguna.

Ayon sa isang lalake na nakakita sa sanggol, nagpapahinga lamang s’ya sa ilalim ng isang puno nang marinig ang iyak ng sanggol na nung una’y inakala nyang may nais lamang na manakot sa kanya.

Ngunit nang dumating ang isa pang lalake na naka-tricycle at narinig din nito ang iyak ng bata ay agad na nilang hinanap ang pinagmulan ng boses hanggang sa matagpuan nila ang sanggol sa gilid ng sapa.

Agad naman nila itong ipinagbigay alam sa mga kinauukulan dahilan upang mabilis na isinugod sa Nagcarlan District Hospital ang sanggol na ngayon ay nasa mabuti nang kalagayan.

Patuloy namang pinaghahanap ng mga otoridad ang iresponsableng taong nag-iwan sa sanggol.

Isinailalim sa 14-day lockdown ang 48 tirahan mula sa apat na barangay sa Dumaguete, Negros Oriental.

Itoy matapos na magpositibo sa COVID-19 ang isang abugado doon na kagagaling lamang ng Metro Manila.

Ayon sa mga otoridad, nagtatrabaho bilang provincial legal officer ang pasyente na nagtungo ng Quezon City noong October 1, kasama ang 8 iba pa.

Bumalik umano ng lalawigan ang nagpositibong abugado noong October 3, ngunit hindi sumailalim sa quarantine.

Agad din umano itong nagbalik sa kanyang trabaho at bumisita sa hall of justice at sa provincial jail.

Base naman sa imbestigasyon ni Barangay Bajumpandan Kagawad Juancho Gallarde, nakipag-inuman pa umano sa isang birthday party ang abugado, at nagtungo din umano ito sa beach noong nakalipas na linggo.

Matapos nito, nakaranas na ng trangkaso ang pasyente na sintomas ng COVID-19.

Nabatid na maging ang dalawang nakasama nito sa pagpunta ng quezon City ay nagpositibo din sa virus kabilang na ang 7 staff ng naturang lawyer.

Ipinag-utos ni Philippine National Police (PNP) chief Police General Camilo Cascolan ang agarang imbestigasyon sa umano’y nangyaring police brutality at pagnanakaw na kinasasangkutan ng mga tauhan ng intelligence section ng Calamba PNP.

Base sa ulat, kabilang sa mga naatasan na magsagawa ng paglilitis ay ang Internal Affairs Service, integrity monitoring and enforcement group, criminal investigation and detection group, at ang Police Regional Office 4A.

Pinatitiyak naman ni Cascolan sa regional director ng PRO-4A ang kahandaan ng lahat ng personnel ng Calamba City Police Station na humarap sa kanyang ipinatawag ng imbestigasyon.

Umaasa naman ang Chief PNP na lalabas ang katotohanan sa kanyang ipinatawag na independent investigation at tiniyak na mananagot ang mga mapatutunayang nagkasala.

Nabatid na isang Milagros Alora ang naghain ng reklamo laban sa mga tauhan ng Calamba PNP matapos na magpanggap umano ang mga ito na mga ahente ng PDEA, at sapilitang inaresto ang kanyang anak at kasamahan nito dahil umano sa kasong drug pushing.

Hinalughog din aniya ng mga nagpakilalang PDEA agent ang kanilang bahay at kinuha ang kita ng kanilang shop, mga CCTV camera, cellphones at ang motorsiklo ng kanilang tauhan.

Kwento ni Alora, hinanapan aniya ng warrant of arrest at search warrant ang mga naghalughog sa kanilang bahay ngunit wala umano silang maipakita.

Ipinagtataka rin ng complainant kung bakit wala sa kustodiya ng PDEA ang kanyang anak na si alyas Victor bagkus naroon ito sa himpilan ng Calamba PNP.

Bagsak sa kulungan ang isang barangay kagawad matapos madakip sa ikinasang buy-bust operation sa Barangay Poblacion sa Buluan, Maguindanao.

Ayon kay Western Mindanao Command Chief Lt. Gen. Corleto Vinluan, Jr., ang suspek na si Jahir Guipal ng bayan ng Mangudadatu ay nadakip ng pinagsanib na puwersa ng Wesmincom, Philippine Drug Enforcement Agency ng Bangsamoro Autonomous Region in Muslim Mindanao (BARMM) at Buluan Municipal Police Station.

Sinasabing si Guipal ay isang high-value target ng PDEA kung saan nasabat mula rito ang 20 gramo ng hinihinalang shabu at P14,000 na marked money.

Nasa custody na ngayon ng PDEA regional office ng BARMM ang suspek at nakatakda umanong sampahan ng kasong paglabag sa Comprehensive Dangerous Drugs Act of 2002.