RONDA PROBINSYA

Dalawang kabahayan ang nawasak gayundin ang ilang bangkang pangisda sa dalampasigan ng Brgy. Marikaban, isla ng Tingloy sa Batangas.

Ito’y makaraang suyurin ng isang RoRo Vessel ang mga kabahayan sa nasabing lugar dulot ng masungit na panahong dala ng Bagyong Quinta.

Batay sa ulat na natanggap ng DWIZ patrol mula sa mga residente sa lugar, nangyari ito kaninang alas 8 ng umaga.

Nabatid na nawalan ng kontrol ang nasabing barko dahil sa malalakas na along dala ng pananalasa ng bagyo.

Humigingi ng tulong ang mga apektadong residente hinggil sa pinsalang kanilang tinamo mula sa pagsadsad ng nasabing barko. —ulat mula kay Jaymark Dagala (Patrol 9)

Binawian ng buhay ang alkalde ng Lian, Batangas na si Dr. Isagani Bolompo.

Sinasabing isinugod sa Western Medical Center si Bolompo noong October 17, 2020 at agad isinailalim sa swab testing.

Nang magpositibo sa virus si Bolompo ay inilipat ito sa Lung Center of the Philippines sa Quezon City kung saan ito pumanaw.

Si Bolompo ay dating nagsilbi bilang Batangas health officer bago naging alkalde ng bayan ng Lian.

Binuksan na muli sa publiko ang mga diving sites sa Mabini, Batangas ilang buwan matapos magsara dahil sa coronavirus disease 2019 (COVID-19) pandemic.

Ayon kay Florian Bueno, Mabini municipal tourism officer, inaprubahan na ng Inter-Agency Task Force for the Management of Emerging Infectious Diseases (IATF) ang pagbabalik-operasyon ng mga diving spots sa Anilao Proper at Anilao East.

Sinabi ni Bueno na umabot sa mahigit isang daang turista ang pumasok sa nabanggit na lugar nitong weekend.

Lubhang napinsala ng masungit na panahong dala ng Bagyong Quinta ang mga pasilidad ng iba’t ibang power distributor sa lalawigan ng Cagayan.

Ayon sa National Electrification Administration (NEA), ilan sa mga lugar na walang suplay ng kuryente dahil sa bagyo ay ang Claveria at Sta. Paraxedes.

Maliban kasi sa malakas na ulan dulot ng bagyo, nagkaroon din ng pagguho ng lupa at pagbaha sa lugar na nagresulta sa pagbagsak ng mga poste ng kuryente sa lugar.

Dahil dito, nakararanas ng blackout ang mga bayan ng Callungan, Magacan, Tokitok, San Andres at Namuac sa Sanchez Mira.

Gayundin sa mga Barangay Sta. Elena at Sta. Filomena na pawang nasa bayan ng Calanasan, lalawigan ng Apayao.

Pagtitiyak naman ng Cagayan Electric Cooperative 2, maibabalik nila ang suplay ng kuryente sa mga apektadong lugar sa sandaling umayos na ang lagay ng panahon.

Aabot sa 668 pasahero ang stranded ngayon sa pantalan ng Allen, Northern Samar.

Batay ito sa ulat ng Regional Disaster Risk Reduction and Management Office ng Eastern Visayas sa National Disaster Risk Reduction and Management Council (NDRRMC).

Maliban dito, hindi rin pinayagang makabiyahe ang nasa 276 rolling cargoes dulot ng masamang panahon habang siyam na iba pang mga sasakyang pandagat ang hindi rin pinabiyahe sa iba’t ibang pantalan sa rehiyon.

Isinara na rin ang mga paliparan ng calbayog gayundin sa Catarman dahil pa rin sa sama ng panahong dulot ng bagyo.

Samantala, nalubog din sa baha ang national road sa purok 5 sa Barangay Mercedes, Catbalogan City kaya’t pususan na ang ginagawang clearing operations.

Isinara na sa mga motorista ang ilang lansangan sa Eastern Visayas Region bunsod ng epekto ng Bagyong Quinta.

Ito’y batay sa natanggap na ulat ng National Disaster Risk Reduction and Management Council (NDRRMC) mula sa kanilang tanggapan sa rehiyon.

Kabilang sa mga hindi madaraanan ay ang napinsalang tulay Brgy. Caraycaray, bayan ng Naval, lalawigan ng Biliran; gayundin ang Calbayog – Catarman road sa Brgy. Nabang, Calbayog, Samar dahil sa nangyaring landslide.

Gayunman, nananatiling passable sa mga motorista ang Maharlika Highway sa Brgy. Jiaan sa kabila ng pagguho ng lupa sa nabanggit na lugar dahil sa patuloy pa ring pag-ulan.

Agad nang rumesponde ang mga kinauukulang ahensya ng pamahalaan para alalayan ang mga maaapektuhang motorista gayundin ay linisin ang mga gumuhong lupa na humambalan sa daanan.

Kanselado na ang biyahe ng lahat ng sasakyang pandagat sa rehiyon ng Calabarzon dahil sa banta ng Bagyong Quinta.

Batay ito sa anunsyo ng Calabarzon Regional Disaster Risk Reduction Management Council o RDRRMC kasunod na rin ng itinaas na signal number ng pagasa sa ilang lalawigan sa rehiyon.

Kasunod nito, pinapayuah ng ang mga manlalakbay na kansilahin mula ang nakatakda nilang mga biyahe para maiwasan ang pagdami ng mga mai-stranded sa mga pantalan.

Samantala, sa pinakahuling tala, nasa 532 pamilya o katumbas ng 1,789 na indibiduwal sa Guinobatan, Albay at Canaman Camarines Sur ang isinailalim na sa preemptive evcuation.

Habang nasa 662 na ang bilang ng mga na-stranded sa rehiyon.

Sumuko sa mga awtoridad ang isang hinihinalang supporter ng Abu Sayyaf Group (ASG) sa Basilan province.

Ayon kay Lt. Gen. Corleto Vinluan Jr., commander ng Western Mindanao Command (Westmincom), si Kahar Hamid Muktar ay kusang-loob na nagtungo sa 4th Special Forces Battalion ng Philippine Army.

Kasamang isinuko ni Muktar ng Lamitan City ang isang garand rifle at walong bala.

Sinabi ni Vinluan na si Muktar ay nasa ilalim ng grupo ni Basilan-based ASG leader Furuji Indama.