RONDA PROBINSYA

Sumirit na sa mahigit dalawang daan ang bilang ng mga aktibong kaso ng COVID-19 sa Valenzuela at Navotas.

Ayon sa Valenzuela City government, nasa 238 na ang active cases sa kanilang lungsod matapos madagdagan ng walumpung bagong kumpirmadong kaso.

Sa Navotas, nagkaroon naman ng 99 new cases kung kaya’t sumampa na sa 220 ang mga aktibong kaso sa lungsod.

Samantala, ipinasara naman ng Pateros LGU ang lahat ng mga basketball courts sa kanilang lugar makaraang umakyat sa tatlumpu’t walo (38) ang active cases sa naturang bayan.

Patay ang isang dating alkalde sa bayan ng Anda sa Pangasinan matapos pagbabarilin ng dati umano nitong bodyguard sa Barangay Namagbagan.

Kinilala ang biktima na si Aldrin Cerdan, limampung taong gulang, at nakatira sa nasabing lugar.

Batay sa inisyal na imbestigasyon, nagpapahinga sa kanyang farm si Cerdan nang dumating ang suspek na si William Cagampan at pinagbabaril ang biktima.

Agad namang naaresto ang suspek na ngayo’y nahaharap sa kaukulang kaso.

Isang sunog ang sumiklab sa Tondo, Maynila kaninang madaling araw.

Batay sa ulat, nag-umpisa ang sunog dakong alas tres ng madaling araw sa isang residential area sa kanto ng Aguilar Street at Masangkay Street.

Limang pamilya na naninirahan sa gilid ng estero ang naapektuhan ng sunog at sinasabing apat na pamilya rin na naninirahan sa warehouse ang nadamay.

Kabilang rin sa naapektuhan ng sunog ang isang warehouse na mayroong mga produkto na ibinebenta sa online.

Tinatayang hindi bababa sa isang milyong piso ang halaga ng mga ari-ariang tinupok ng apoy.

Nagdulot ng mabigat na daloy ng trapiko sa ilang kalsada sa Southbound Lane ng Edsa Kamuning Flyover ang pagbaligtad ng isang AUV makaraang bumangga sa mga concrete barriers.

Ayon sa mga otoridad, galing sa balintawak para bumili ng prutas na ihahanda sa bisperas ng bagong taon ang naturang driver nang makaramdam ng antok at nakaiglip sa gitna ng kaniyang pagmamaneho.

Dahil dito, apat na concrete barriers ang nasira, na agad namang nilinis ng mga tauhan ng MMDA. —sa panulat ni Angelica Doctolero

Nakahanda na ang P500M halaga ng pautang mula sa Agricultural Credit Policy Council ng Department of Agriculture (DA) para sa pagpapatupad ng survival and recovery assistance program o sure para sa mga naapektuhan ng bagyong Odette.

Sa ilalim ng sure assistance program, makakautang ng (P25K) ang mga magsasaka at mangingisda para makapagsimulang muli na nakatira sa mga lugar na naisailalim sa “state of calamity”.

Samantala, sinabi ng DA, na bukod sa walang interes at walang collateral ang loan ay magaan ang payment period nito dahil babayaran ang utang sa loob ng tatlong taon. —sa panulat ni Kim Gomez 

Patay ang isang matandang negosyante matapos pagsasak-sakin ng hindi pa nakikilalang lalaki sa Quezon Province.

Kinilala ang biktima na si Julieta Calixto, 66 anyos, store owner, na nagtamo ng walong saksak sa iba’t ibang parte ng katawan.

Ayon sa ulat, naglalaba ang biktima nang pasukin ng salarin at inundayan ng sunud-sunod na saksak na ikinamatay ng matanda.

Sa ngayon, patuloy pa ang imbestigasyon ng mga otoridad upang makilala ang salarin at kung may nawala sa bahay ng biktima. —sa panulat ni Kim Gomez 

Inaalam ng mga otoridad ang pagkakakilanlan sa isang bangkay na natagpuan ng isang residente sa bahagi ng Tayabas City, Quezon Province.

Ayon sa mga otoridad, nakasuot ng kulay gray na brief at medyas ang biktima na tinatayang nasa edad 30 hangang 40 anyos at may taas na 5’7.

Bukod pa dito, may balot din ng masking tape ang buong mukha at ulo, nakatali ang mga kamay at paa at may mga palatandaang pinahirapan muna bago pinatay sa hindi pa malamang pamamaraan ng biktima.

Patuloy pang iniimbestigahan ng mga otoridad kung sino ang responsable sa pagpaslang sa biktima. —sa panulat ni Kim Gomez 

Sugatan ang limang katao matapos sumabog ang dalawang magkasunod na tricycle na parehong may dalang mga paputok sa Tarlac City.

Sa impormasyong nakuha ng mga otoridad, tatlo ang sakay ng unang tricycle habang dalawa naman ang sakay sa kasunod pang tricycle kung saan, dalawa sa mga biktima ang may malubhang kalagayan.

Patuloy pa ang imbestigasyon ng mga otoridad sa nangyaring insidente. —sa panulat ni Kim Gomez 

Halos P149,445 ng mga ilegal na paputok at pyrotechnic device ang nasamsam at winasak ng mga otoridad sa Camp General Pantaleon Garcia sa Cavite.

Ang Ceremonial Disposal ay pinangunahan ng mga Opisyal ng Cavite Philippine National Police (PNP), bureau of fire protection  (BFP), at mga kinatawan ng Local Government Units (LGUs).

Ang mga ipinagbabawal na paputok ay nakumpiska mula sa iba’t ibang bahagi ng lalawigan sa isinagawang Three-Day Simultaneous Anti-Criminality and Law Enforcement Operations.

Sa seremonya, nagpahayag ng simpatiya si Cavite Pnp Provincial Director Col. Arnold Abad sa pagkawala ng puhunan sa negosyo sa mga nagbebenta ngunit muling iginiit na dapat unahin ang kaligtasan ng publiko. —sa panulat ni Kim Gomez