RONDA PROBINSYA

Sugatan ang limang katao matapos sumabog ang dalawang magkasunod na tricycle na parehong may dalang mga paputok sa Tarlac City.

Sa impormasyong nakuha ng mga otoridad, tatlo ang sakay ng unang tricycle habang dalawa naman ang sakay sa kasunod pang tricycle kung saan, dalawa sa mga biktima ang may malubhang kalagayan.

Patuloy pa ang imbestigasyon ng mga otoridad sa nangyaring insidente. —sa panulat ni Kim Gomez 

Halos P149,445 ng mga ilegal na paputok at pyrotechnic device ang nasamsam at winasak ng mga otoridad sa Camp General Pantaleon Garcia sa Cavite.

Ang Ceremonial Disposal ay pinangunahan ng mga Opisyal ng Cavite Philippine National Police (PNP), bureau of fire protection  (BFP), at mga kinatawan ng Local Government Units (LGUs).

Ang mga ipinagbabawal na paputok ay nakumpiska mula sa iba’t ibang bahagi ng lalawigan sa isinagawang Three-Day Simultaneous Anti-Criminality and Law Enforcement Operations.

Sa seremonya, nagpahayag ng simpatiya si Cavite Pnp Provincial Director Col. Arnold Abad sa pagkawala ng puhunan sa negosyo sa mga nagbebenta ngunit muling iginiit na dapat unahin ang kaligtasan ng publiko. —sa panulat ni Kim Gomez 

Patay ang isang pitong taong gulang na babae matapos masagasaan ng bus sa isang terminal sa Maynila.

Ayon sa inisyal na imbestigasyon ng Manila Police District, naka-park sa loob ng Philippine Rabbit Bus Terminal ang bus.

At nang umandar ito ay aksidenteng nasagasaan ang biktima na naglalaro umano ng tagu-taguan na dahilan ng agaran nitong pagkamatay.

Sa ngayon, nasa kustodiya na ng mga otoridad ang drayber ng bus. —sa panulat ni Joana Luna

Inabandona ang apat na batang magkakapatid sa harap ng San Isidro Parish Church sa Cotabato.

Kabilang sa apat na na-rescue ang 8-anyos na babae, 6-anyos na lalaki, 2-anyos na babae, at 3 buwang sanggol na nadatnan ng mga pulis na umiiyak at namumutla na.

Binigyan naman ng Libungan Police ng pagkain ang mga bata habang pinalitan ng diaper at pinainom ng gatas ang sanggol.

Ayon sa mga otoridad, dalawang araw namalagi sa himpilan ng pulisya ang mga bata kasama na rin ang ina nila na kalauna’y binalikan sila.

Nagpapasalamat naman ang ina na natulungan sila ng mga pulis lalo na sa panahong hirap silang makapag-pasko na buo ang pamilya. —sa panulat ni Mara Valle

Patay ang isang ginang habang sugatan naman ang anak nito matapos pagsasaksakin sa Camarines Norte.

Kinilala ang biktima na Sina Eden Salen Clacio, 46-anyos at ang anak niyang si alyas ‘nadya’, 13-anyos.

Nadatnan ng mga pulis ng labo na naliligo sa sariling dugo at patay ang biktima habang sugatan ang anak nito na dalagita matapos pasukin sa kuwarto at pagtatagain ng hindi pa nakikilalang lalaki.

Hindi naman napaano ang isa pang anak ni Clacio na si alyas ‘joel’, 11-anyos.

Samantala, patuloy naman ang pagiimbestiga ng mga otoridad sa puno’t dulo ng krimen at paghahanap ng lead kung sino ang may kagagawan nito. —sa panulat ni Mara Valle

Sugatan ang apat na katao habang nagkalat naman sa highway ng Tagkawayan, Quezon ang mga bote at lalagyan ng beer nang maaksidente ang truck na kinalalagyan ng naturang inumin.

Ayon sa tagkawayan Municipal Police Station, patungo sa Bicol ang trailer truck habang tinatahak naman ng mga inararong sasakyan ang direksyon pa-maynila.

Mabilis ang takbo ng trailer truck kaya tumagilid ito sa highway matapos iwasan ang iba pang kasalubong na mga sasakyan.

Sa pagtagilid ng truck, nagkalat sa highway ang serbesa.

Nasugatan ang rider ng dalawang motorsiklo, driver ng delivery van at ng truck.

Ito na ang ika-limang aksidente na naganap sa quirino highway sa loob lamang ng isang linggo kung saan lima na ang nasasawi. —sa panulat ni Mara Valle

Nahuli ang isang security guard matapos niyang paluin ng bakal at saksakin ang isang lalaking sakay ng golf cart sa Ilocos Sur.

Kinilala ang biktima na si Tristan Tabboga, 38-anyos, at ang suspek na si Francis Figueres, 38-anyos.

Ayon sa Caoayan Police, lasing umano ang suspek nang mangyari ang insidente.

Nagulat na lang ang biktima nang bigla siyang paluin ng bakal sa kamay ng suspek at nang tanungin niya kung ano ang problema ng nito ay muli siyang inatake.

Bukod sa palo ng bakal, nagtamo din ng sugat dulot ng patalim sa tiyan at hita ang biktima.

Agad namang humingi ng tulong ang biktima sa kaniyang ama at nadakip rin si Figueres kinalaunan.

Idinahilan naman ng suspek na mayroon umanong motorista na nanakit sa kaniya at inakala niyang si Tabboga ito.

Sa kabila ng paliwanag ng suspek, desidido ang biktima na sampahan ng kaso ang sekyu dahil muntik na siyang mapatay nito. —sa panulat ni Mara Valle

Dalawang linggo matapos hagupitin ng bagyong Odette, problemado parin ang mga residente ng Siargao kung papaano sasalubungin ang bagong taon ngayong back to zero ang kanilang lugar.

Ayon sa mga residente, hindi nila inaasahan na magiging malungkot ang kanilang pasko at bagong taon dahil sa delubyong iniwan ni bagyong Odette.

Sa ngayon, patuloy na nananawagan ng tulong ang mga residente sa lugar kung saan, lubos na nangangailangan ng malinis na ma-iinom, pagkain at damit ang pamilyang apektado.

Sa ngayon, apat naraang libong pamilya ang magba-bagong taon nang walang maayos na tirahan.  —sa panulat ni Angelica Doctolero

Patay ang limang armadong suspek habang sugatan naman ang apat na pulis sa naganap na engkwentro sa Pikit, Cotabato.

Ayon kay SOCCSKSARGEN Police Director Brig. Gen. Alexander Tagum, maghahain sana sila ng warrant of arrest nang manlaban ang mga suspek dahilan para gumanti ang mga otoridad.

Nakatakas ang isa sa mga suspek na kinilalang si Joel Manampan na itinuturing na “most wanted” sa bansa dahil sa kasong murder at may patong na nagkakahalagang P175, 000.

Samantala, nakuhanan naman ng isang rifle at mga bala si Mohidin Dalagonan Mantok na ngayon ay hawak na ng mga otoridad.

Sa ngayon, iniimbestigahan na ng Regional Police ang mga nasamsam na motorsiklo.  —sa panulat ni Angelica Doctolero