Isinailalim sa state of calamity ang buong probinsya ng Leyte ngayon dahil sa pinsala ng bagyong Odette.
Ayon sa sangguniang panlalawigan, matindi ang danyos na iniwan ng kalamidad sa sektor ng komunikasyon, kuryente, transportasyon, imprastruktura at agrikultura sa probinsya.
Dahil dito, mas mabilis anilang magagamit ang calamity fund para maibigay ang tulong sa mga biktima ng bagyo.—sa panulat ni Airiam Sancho
Nasawi ang isang driver sa pamamaril nang hindi pa nakikilalang riding in tandem sa lalawigan ng Maguindanao.
Kinilala ang biktima na si Kaloy Umpal, 50 anyos.
Batay sa imbestigasyon, dinikitan ng nasabing suspek ang minamanehong sasakyan ni umpal sa barangay Awang Datu Odin Sinsuat at binaril ang biktima.
Patuloy naman ang imbestigasyon ng otoridad sa naturang insidente.—sa panulat ni Airiam Sancho
Nakatakas ang isang preso na may kasong murder mula sa isang sub-provincial jail sa Samar.
Kinilala ang nakatakas na preso na si Julito Dacles.
Ayon sa Police Regional Office 8, lumapit umano si dacles sa mga bantay na pulis dahil nahihirapan umano itong huminga, nang dinala ang preso sa lobby at iwanan saglit ng mga pulis ay bigla na itong nawala.
Inanunsiyo naman ang mga otoridad na marapat na kaagad ipagbigay alam sa kanila kung may makatukoy kung nasaan ang bilanggo upang agad nilang maaksiyunan, nagbabala rin ang mga ito na armado si Dacles. —sa panulat ni Mara Valle
Nadakip sa buy-bust operation ang dalawang big-time drug pushers sa harap ng isang private school sa Valenzuela City.
Kinilala ang mga suspek na sina, Gerhel Jumawan at Jeorge Javier, kapwa mga nakatira sa Caloocan City.
Nasabat sa mga ito ang may kabuuang 186 gramo ng iligal na droga na may market value na 1,258,000 pesos.
Kasalukuyang nahaharap ang mga tulak sa patong-patong na kaso at wala namang piyansa na inirekomenda ang piskalya. —sa panulat ni Mara Valle
Dead-on-the-spot ang isang senior citizen at isang babae nang araruhin ng pampasaherong bus sa Quezon.
Kinilala ang mga biktimang sina Jacobo Magdamit, 65-anyos, at ang babaeng natukoy lang sa alyas na ‘tess perida’ nasa edad-40.
Sa inisyal na ulat ng quezon police, patawid ng kalsada ang dalawa nang masagasaan ng dongfeng bragais bus na byaheng-maynila.
Sa bilis at lakas ng impact ay mabilis na binawian ng buhay ang dalawa.
Agad namang sumuko sa mga otoridad ang driver ng bus na si Michael Baraero, na nahaharap ngayon sa kasong reckless imprudence resulting in double homicide. —sa panulat ni Mara Valle
Patay sa engkuwentro ang limang hinihinalang magnanakaw ng motorsiklo habang 3 pulis at isang sibilyan naman ang nasaktan sa nangyaring engkuwentro sa North Cotabato.
Kinilala ang mga nasawing suspek na sina, Badrudin Masulot Dalid, Arbaya Dalid Panizares, Asraf Dalid Masulot, Bunta Kabantu at isa pang hindi nakikilalang lalake.
Natagpuan ng mga otoridad sa lugar ng sagupaan ang dalawang m60 machineguns, isang launcher para sa b-40 anti-tank rockets, tatlong m16 rifles, isang m14 rifle, isang m203 rifle fitted with grenade launcher, isnag vintage .30 caliber carbine, dalawnag .38 caliber revolvers at mga improvised explosive devices.
Nasabat din ng otoridad ang tinatayang nasa 442 na motorsiklo sa sinasabing hideout ng mga suspek. —sa panulat ni Mara Valle
Arestado ang isang lalaki matapos nitong pugutan ng ulo ang sariling anak sa Agusan del Norte.
Dinakip ang suspek na si William Becong, 46-anyos, na kilalang may sakit sa pagiisip sa kanilang lugar.
Ayon kay Caraga Regional Police Director Brig. General Romeo Carama, pinugutan ng suspek ng ulo ang kanyang anak gamit ang 14-pulgadang curved machete.
Matapos na arestuhin, dinala rin si Becong sa provincial hospital dahil sa tinamo nitong mga sugat sa katawan nang tadtarin din nito ang kaniyang sarili.
Napag-alam din sa imbestigasyon na may sakit rin sa pag-iisip ang kaniyang pinatay na 9 na taong gulang na anak.
Samantala, nahaharap ang suspek sa kasong parricide na isinampa ng Buenavista Police. —sa panulat ni Mara Valle
Patay ang mag-asawang matanda nang makulong ang mga ito sa kanilang nasusunog na bahay sa Baguio City.
Kinilala ang mga biktima na sina Juan at Lolita Velasco, kapwa 94-anyos.
Tumanggi namang magbigay ng pahayag ang anak ng mga biktima na si Cesar, ngunit ayon sakanya, ang mag-asawa lamang ang nasa bahay ng mangyari ang sunog.
May kapansanan at bed ridden na raw si Juan na nakita ang bangkay nito na nakahiga sa sofa samantala, natagpuan naman ang labi Lolita sa banyo.
Ayon sa Bureau Of Fire Protection ng lungsod, walang kuryente sa naturang lugar, kaya ang tinitignan na sanhi ng sunog ay napabayaang kandila o lampara. —sa panulat ni Mara Valle
Aabot sa 1.5K mga motor banca ang nasira matapos hagupitin ng bagyong Odette ang Puerto Princesa City, Palawan.
Ayon sa Lokal na pamahalaan ng Palawan, maraming pamilya ang apektado ngayon matapos mawalan ng hanapbuhay ang maraming mangingisda.
Bukod kasi sa mga nasirang bangka ay nawasak din ang kanilang mga pananim.
Dahil dito, nanawagan ng tulong ang mga residente sa lugar na matugunan ang kanilang pangangailangan partikular na ang pagkain at malinis na inumin. —sa panulat ni Angelica Doctolero
Naglabas ng Executive Order ang Lungsod ng Cavite kaugnay sa pagbabawal sa paggawa, pagbebenta at pamamahagi ng mga paputok sa pagsalubong ng bagong taon.
Sa nilagdaang E.O NO. 51 ni Mayor Bernardo Paredes, mananagot at ipasasara ang sino mang may-ari, nagtitinda o namumuno ng anumang business establishment na mahuhuling ilegal na gumagawa o nagbebenta ng paputok dahil labag ito sa ipinatutupad na batas sa lungsod.
Layunin ng EO na mapanatili ang kaligtasan, kaayusan at seguridad sa kanilang lugar upang maging masaya ang pagsalubong ng bagong taon. —sa panulat ni Angelica Doctolero