RONDA PROBINSYA

Naglabas ng Executive Order ang Lungsod ng Cavite kaugnay sa pagbabawal sa paggawa, pagbebenta at pamamahagi ng mga paputok sa pagsalubong ng bagong taon.

Sa nilagdaang E.O NO. 51 ni Mayor Bernardo Paredes, mananagot at ipasasara ang sino mang may-ari, nagtitinda o namumuno ng anumang business establishment na mahuhuling ilegal na gumagawa o nagbebenta ng paputok dahil labag ito sa ipinatutupad na batas sa lungsod.

Layunin ng EO na mapanatili ang kaligtasan, kaayusan at seguridad sa kanilang lugar upang maging masaya ang pagsalubong ng bagong taon.  —sa panulat ni Angelica Doctolero

Naaresto ng mga tauhan ng Philippine National Police Drug Enforcement Group (PDEG) ang isang drug suspek matapos magkasa ng drug buy bust operation sa Mexico, Pampanga kaninang umaga.

Kinilala ni PDEG Director P/BGen. Remus Medina ang naaresto na si Muslimin Mohammad Salim, 29 anyos at residente ng Lower Bicutan, Taguig City.

Nasabat mula sa suspek ang humigit kumulang 50 pakete ng tig-340 gramo ng shabu na tumitimbang ng kabuuang 17 kilo at nagkakahalaga ng Php 115,600,000.00.

Nakuha rin ng mga awtoridad ang 2 libong piso buy bust money gayundin ang boodle money na siyang ginamit sa operasyon.

Nasa kostudiya na ng Special Operations Unit ng PDEG – National Capital Regon para isailalim sa documentation habang ikinakasa na ang kasong paglabag sa RA 9165 o Comprehensive Dangerous Drugs Act of 2002 laban sa suspek. —sa ulat ni Jaymark Dagala (Patrol 9)

Sinibak sakaniyang serbisyo ang isang babaeng traffic enforcer matapos mangotong sa isang truck driver sa silang Cavite.

Ayon sa Traffic Management Office, agad na nagsumbong sa kanila ang truck driver na kinilalang si Prince Alex kung saan, ipinakita nito ang kinuhanang video na nanghihingi ng halagang limandaang piso ang traffic enforcer.

Bukod pa dito, binantaan pa ng traffic enforcer ang driver kayat napilitan silang mag-abot ng pera.

Dahil dito, agad ring inalis sa serbisyo ni silang Mayor Corie Poblete ang traffic enforcer na hindi na pinangalan para sa proteksyon ng pamilya nito. —sa panulat ni Angelica Doctolero

Kulong ang apat na drug suspect matapos ikasa ng mga otoridad ang drug buy-bust operation sa magkakahiwalay na lugar sa Malabon City.

Kinilala ang mga suspek na sina Lloyd Cabueňas, 40-anyos; Paul Cabueňas, 42-anyos Jonalyn Ponti alyas “Jho”, 36-anyos at Marvin Rosit alyas “Abeng”, 29-anyos.

Nakuha sa mga suspek ang nasa 14.57 na gramo ng shabu na nagkakahalaga ng mahigit 1,000 piso at dalawang 500 pesos na marked money.

Nahaharap ang mga naarestong suspek sa kasong paglabag sa RA 9165 o Comprehensive Dangerous Drugs Act of 2002.

Sumuko ang 16 na rebelde sa tulong ng Camarines Norte Provincial Police at ng lokal na pamahalaan para magbalik loob sa pamahalaan.

Isang araw makalipas ang pagdiriwang ng Pasko ay sumuko din ang walo pang kasapi ng mga rebeldeng terorista sa headquarters ng 62 Infantry Battalion sa Brgy Libas, Isabela, Negros Occidental sa pamamagitan naman ng Joint Local Task Force (JLTF)-ELCAC at Local Peace Engagement Cluster.

Kasabay ng kanilang pagsuko ay ang pagsurrender ng kanilang mga armas na kinabibilangan ng ibat-ibang uri ng baril, bala, grenade rifle at iba pang mga armas at pampasabog.

Ayon sa mga sumuko, sila ay mga miyembro ng isang communist group at sangkot umano sa iba’t ibang krimen gaya ng paghingi ng revolutinary tax at pag ambush sa mga pulis at military sa rehiyon.

Matapos ang kanilang pagsuko ay sabay-sabay nilang sinunog ang kanilang CPP-NPA flag para ipakita ang kanilang pormal na pagsuko at pagkalas sa kanilang suporta at ugnayan sa CPP-NPA.

Bilang kapalit, nakatanggap ng christmas gifts at iba pang regalo ang dating mga rebelde mula sa JLTF-ELCAC ng Central Negros at 303rd Brigade. —sa panulat ni Angelica Doctolero

Patay ang isang ina matapos paluin sa ulo ng sariling anak sa Albay.

Ayon sa Albay Police, nagkaroon ng pagtatalo ang mag-ina at nang hindi na nga nakapagtimpi ang anak nitong babae ay hinampas niya ng dos por dos sa ulo ang kaniyang ina.

Isinugod sa ospital ang biktima pero huli na ang lahat at idineklara itong dead on arrival.

Agad namang sumuko ang 30-anyos na suspek sa mga otoridad at inaasahang mahaharap siya sa kasong parricide.—sa panulat ni Mara Valle

Lubog sa baha ang maraming lugar sa Oriental Mindoro dahil sa walang tigil na pag-ulan dulot ng amihan at shear line.

Ayon kay Municipal Disaster Risk Reduction and Management Office  (MDRRMO) Head Joery Gelario, isa na rin sa naging sanhi ng mabilis na pagbaha at pag-apaw ng tubig sa ilog.

Isolated na ang barangay san andres at masagana, umabot naman sa 581 ang bilang ng pamilyang inilikas sa bayan ng Baco ayon sa Municipal Social Welfare and Development Office.

Samantala, tiniyak naman ni Baco Vice Mayor Eric Castillo na pupunan ng lokal na gobyerno ang mga pangangailangan ng mga lumikas na residente.—sa panulat ni Mara Valle

Arestado ang isang AWOL na sundalo at dalawang sibilyan matapos magbenta ng ilegal na droga sa mga operatiba sa Zamboanga City.

Kinilala ang mga suspek na sina, Darwisa Ibbo, 48-anyos; Toto Samson, 32-anyos; at ang AWOL na sundalo at ngayong kasama sa PNP watch list ng mga high value individual na si Jaafar Ekong, 51-anyos.

Ayon kay City Police Chief, Col. Rexmel Reyes, maraming grupo ang nagplano at masusing isinagawa ang anti-illegal drug operation sa lobregat village sa upper calarian na nagresulta sa pagkakahuli ng mga ito.

Kasalukuyan namang nahaharap sa kasong Violation of Republic Act 9165 o Comprehensive Dangerous Drugs Act of 2002 ang mga suspek.—sa panulat ni Mara Valle

Pumanaw na si Vice Governatorial Aspirant at Lopez Jaena, Misamis Occidental Mayor Michael Gutierrez ilang araw matapos barilin ng sniper sa isang christmas party sa Tangub City.

Kinumpirma ni Andrea Gutierrez ang pagpanaw ng ama sa kanyang social media post, kahapon.

Bukod kay Gutierrez, nasugatan din ang Congressional aspirant na si Jason Almonte habang nagtamo ng kaunting pasa si Misamis Occidental Rep. Henry Oaminal.

Nag-Alok na si Oaminal ng P5M pabuya para sa ika-aaresto ng suspek.

Mag-a-alas-9 noong December 22 nang barilin ang alkalde habang dumadalo sa isang christmas party na inorganisa ni Oaminal na tumatakbo naman sa pagka-gobernador sa 2022 elections.

Batay sa imbestigasyon ng pulisya, tinamaan si Gutierrez sa kaliwang sentido at tumagos ang bala sa batok.  —sa panulat ni Drew Nacino

Patay ang dalawang magkapatid kabilang na ang isang pulis matapos masunog ang kanilang bahay sa Talisay, Negros Occidental.

Sa imbestigasyon ng mga otoridad at BFP Negros Occidental, natutulog ang magkapatid na sina PO2 Joeber Diasanta at kapatid nito nang matrap sa nasusunog nilang bahay.

Ayon sa Fire Marshal, napabayaang kandila sa living room ng pamilya diasanta ang dahilan ng pagkasunog ng naurang bahay dahil wala pa rin umanong suplay ng kuryente sa lungsod magmula ng tumama ang bagyong Odette sa lugar.—sa panulat ni Angelica Doctolero