RONDA PROBINSYA

Isang lalaki ang patay matapos saksakin umano ng kanyang lasing na tatay sa bayan ng Alimodian, Iloilo.

Kinilala ng Alimodian Municipal Police ang biktimang si Archie Caguilla, 27-anyos.

Ayon sa pulisya, umuwing lasing sa kanilang bahay sa barangay Banguingin-lanot ang suspek kahapon ng madaling araw at pinagalitan ang biktima dahil sa hindi nito pagtulong sa pagbabalot ng mga mangga.

Nagkaroon umano ng pagtatalo ang mag-ama na humantong sa suntukan hanggang sa bumunot ng kutsilyo ang suspek at pinagsasaksak sa dibdib si Archie.

Nakatakas ang ama matapos ang pamamaslang habang naisugod pa sa ospital ang biktima pero idineklara itong dead on arrival.

Nagsasagawa na ng Pursuit Operation ang mga otoridad.  —sa panulat ni Drew Nacino

Ilang lugar sa Oriental Mindoro at Northern Samar ang nalubog sa baha dahil sa walang tigil na pag-ulang dulot ng amihan at shear line.

Simula Lunes ng umaga, 8 barangay sa Bayan ng Naujan, Oriental Mindoro ang binaha makaraang umapaw ang Tubig River.

Ayon kay Municipal Disaster Risk Reduction and Management Office Head Joery Gelario, isolated din ang mga barangay ng San Andres at Masagana.

16 na barangay din ang binaha sa Bayan ng Baco habang abot-dibdib na ang tubig sa highway sa barangay Sta. Rosa kaya’t marami ang stranded patungo sa mga bayan ng San Teodoro at Puerto Galera.

Nasa 300 residente na ang nagsilikas at nasa 7K kabahayan na ang apektado ng pagbaha.

Samantala, nakaranas din ng pagbaha sa mga bayan ng Lavezares at Rosario, Northern Samar kaya’t nalubog ang ekta-ektaryang palayan.   —sa panulat ni Drew Nacino

Hindi na magre-renew ng kani-kanilang accreditation sa Philhealth ang pitong pribadong ospital Sa Iloilo City simula sa unang araw ng 2022.

Sa kabuuan tinatayang aabot sa 895 million pesos ang unpaid claims o utang ng Philhealth sa pitong ospital.

Ayon kay Dr. Danny encarnacion, Presidente at CEO ng Metro Iloilo Hospital at Medical Center Inc., nakapagpasya na ang pamunuan ng mga ospital na tumiwalag sa philheath.

Ani pa Encarnacion, nagkaroon na ng pagpupulong kasama ang state health insurer noong nakaraang linggo ngunit wala naman aniyang nangyari pagkatapos nito.

Dagdag pa ni Encarnacion, simula January 1, tutustusan pa rin ng pitong ospital ang mga miyembro ng Philhealth ngunit hindi na nila ibabawas ang mga benepisyo mula sa state health insurer. — sa panunulat ni Joana Luna

Nasawi ang lider ng Bangsamoro Islamic Freedom Fighters (BIFF) sa engkwentro sa Maguindanao.

Ayon kay Commander of Western Mindanao Command Lieutenant General Alfredo Rosario Junior, nakasagupa ng 6th Infantry Batallion ang miyembro ng BIFF-Karialan faction na si Zukarno Guilil Alias Motorola.

Sinabi naman ng AFP na kilala ang napaslang bilang bomb expert ng BIFF at mayroong warrants of arrest for murder. — sa panunulat ni Airiam Sancho 

Patay ang dalawang indibidwal matapos na sumalpok ang sinasakyang motorsiklo sa isang delivery van sa Barangay Santa Cecilia, Tagkawayan, Quezon Province.

Kinilala ang mag-asawang nasawi na sina Policarpio Oliva at Delia Oliva, residente ng Del Gallego, Camarines Sur.

Batay sa imbestigasyon, nag-overtake ang motorsiklo sa isa pang sasakyan dahilan para masalpok sila sa kasalubong na van.

Sugatan naman ang driver ng delivery van na si Orlando Jualo at nahaharap sa kasong reckless imprudence resulting to homicide and damage to property. — sa panunulat ni Airiam Sancho 

Arestado ang isang events planner matapos lokohin ang kliyente nitong magpapakasal.

Ayon kay Siniloan Police, Police Major Silver Cabanillas, sinabi aniya ng wedding coordinator na na-short siya sa bayad sa kaniyang supplier kaya’t nagamit niya ang pera ni Celine Disaula at groom na Si Jurie Mondigo.

Dahil dito, hinimatay dahil sa sama ng loob at isinugod sa ospital si Disaula.

Handa namang magsampa ng kasong estafa ang mag-asawa laban sa nasabing coordinator.  — sa panunulat ni Airiam Sancho 

Anim na indibidwal, kabilang ang 3 kabataan ang sugatan matapos umanong mamamaril ang 3 sundalo sa Taguig City.

Kinilala ang mga suspek na sina Capt. Neiljay Maguddayao na nakatalaga sa Command and Control Training and Doctrine Command sa Capaz, Tarlac; Second LT. Felomino Maguddayao, na nakadestino sa Attached and Assigned Headquarters and Headquarters Support Group sa Fort Bonifacio, Taguig City; at First LT. Minalyn Awat Ladyong, na nakatalaga naman sa Army Signal Regiment sa Fort Bonifacio.

Ayon sa National Capital Region Police Office (NCRPO) nag-iinuman noon ang tatlong sundalo nang pagbabatuhin sila ng anim na indibiwal.

Nagalit umano ang mga sundalo at pinagbabaril ang mga ito gamit ang M16 rifle.

Sa ngayon ay nagpapagaling sa osital ang mga biktima, habang ang tatlong sundalo naman ay hawak na ng Taguig City Police Office.  —sa panulat ni Hya Ludivico

Marami pa ring mga residente ng Siargao Island ang naghihintay na maabutan ng tulong tulad ng pagkain at tubig, mahigit isang linggo matapos ang pananalasa ng bagyong Odette.

Naantala kasi ang pagdating ng mga tulong sa isla matapos sumadsad ang barge na may lulan ng mga trak ng relief goods.

Sa ngayon ay wala na ring mapagkunan ng kabuhayan ang mga residente ngunit ayon kay Surigao del Norte Governor Francisco Matugas Jr., may cash for work program na maibibigay na alternatibong hanapbuhay sa mga residente na mula sa National Government.

Nangako  aniya ang gobyerno na magkakaloob ito ng P35M para sa mga apektadong pamilya ngunit hindi nito batid kung paano ito pagkakasyahin at sino lamang ang mga bibigyan gayong 40K pamilya ang naapektuhan ng nagdaang bagyo. —sa panulat ni Hya Ludivico

Aabot sa 29 na lumang bomba ang nahukay sa isang construction site sa barangay Cabatangan, Zamboanga City.

Ayon kay Lt. Mary Agnes Miro, Information Officer ng Zamboanga City Police Office, ang mga narekober na bomba ay pawang 75-mm high explosive anti-tank ammunition.

Unang nahukay ng isang construction worker ang 22 piraso na lumang bomba at sunod na nadiskubre ang 7 iba pa sa kaparehong lugar.

Nasa kustodiya na ng Explosive Ordnance Division (EOD) ang mga naturang bomba.  —sa panulat ni Hya Ludivico