RONDA PROBINSYA

Patay ang isang pahinante ng truck matapos masagasaan ng pampasaherong bus sa Quezon.

Kinilala ang biktima na si Jose Oscar Plaza II, 25-anyos.

Sa report ng Gumaca Police, nasagasaan bigla umanong tumawid ang biktima habang paparating ang St. Jude bus na biyaheng Maynila galing Naga City sa Maharlika Highway.

Isinugod pa ito sa ospital subalit idineklara na itong dead on arrival ng doktor sa Gumaca District hospital.

Naaresto naman ng mga pulis ang driver ng bus na si Gerry Mojos na nahaharap sa kasong Reckless Imprudence Resulting to Homicide.  —sa panulat ni Mara Valle

Nagsaksakan ang dalawang magkaribal na lalaki dahil lamang sa isang babae sa Cavite.

Isinugod si Nestor Pillo, 43 taong gulang, Sa Las Piñas District Hospital habang sa Perpetual Help Hospital naman ginagamot si Larry Llamido, 42-anyos.

Sa ulat ni P/Cpl. Edilberto Reyes jr. ng Bacoor City Police, habang nasa labas ng kanilang inuupa­hang bahay si Pillo at nanonood ng mga palabas sa kalsada nilapitan siya ni Llamido at tinanong kung nililigawan niya ang live-in partner nitong si Shirley Alcantara, nang hindi sinagot ni Pillo ay agad sinaksak ni Llamido ng ice pick ang kaliwang tiyan ni Pillo at bagama’t sugatan, nagawang maagaw ni Pillo ang panaksak ni Llamido at panagsasaksak ito.

Isinugod sa magkahiwalay na ospital ang dalawa kung saan kasalukuyang nasa kritikal na kalagayan si Llamido. —sa panulat ni Mara Valle

Arestado ang 81 na indibidwal sa ikinasang One-day Simultaneous Anti-Criminality Law Enforcement Operation ng mga otoridad sa Bulacan.

Kabilang sa mga nadakip ng pulisya ang dalawang most wanted person sa Central Luzon na kinilalang sina Marwin Morelos alyas ‘Awin’ at Marion Morelos alyas ‘Aaron’ dahil sa dalawang kaso ng frustrated murder.

Nagsagawa rin ng 27 anti-illegal drugs operation ang pulisya kung saan nahuli ang 35 na hinihinalang drug peddlers.

Nasabat rin sa operasyon ang 134 pakete ng shabu na may timbang na 41.886 gramo at apat na pakete ng ‘damo’ na may kabuuang halaga na P285,624.

Samantala, 11 katao naman ang arestado sa tatlong magkakahiwalay na anti-illegal gambling operation kung saan nasamsam ang gambling paraphernalias at bet money. —sa panulat ni Mara Valle

Niyanig ng magnitude 4.4 na lindol ang Agno, Pangasinan.

Ayon sa Philippine Institute of Volcanology and Seismology (PHIVOLCS), naganap ang pagyanig kaninang alas-otso ng umaga. Tectonic ang pinagmulan ng lindol na may lalim na labing-isang kilometro.

Wala namang inaasahang danyos sa imprastaktura o aftershocks sa naturang pagyanig.

Patay ang isang call center agent habang sugatan ang dalawa pa nitong kasama matapos barilin ng hindi pa nakikilalang riding in tandem sa bayan ng Cabuyao, Laguna.

Kinilala ang nasawi na si Bryan Perez, 23-anyos.

Batay sa imbestigasyon, isang motorsiklo ang huminto ay binaril ng angkas nito ang tatlong magkakaibigan.

Agad na tinamaan si Peres sa dibdib at sugatan naman sina Geraldine Tambaoan at Alfredo Torayao na pawang mga kasamahan ng nasawi sa trabaho.

Samantala, inaalam pa ng otoridad ang mnotibo sa naturang insidente. —sa panulat ni Airiam Sancho

Naghihimas ng malamig na rehas na bakal ang dalawang indibidwal, kabilang ang isang babae, matapos mahuling nagbebenta umano ng ipinagbabawal na droga sa Taguig City.

Sa Purok trese, Brgy. South Daang Hari, nadakip sa Oplan Galugad ang 50 taong gulang na si Renelyn Palmares kung saan nasabat mula rito ang 20,400 pesos na halaga ng hinihinalang shabu.

Nasakote naman sa buy-bust operation ang isa pang drug suspect na si Eladio Marayag sa Martinez St., Brgy. Central Signal.

Maliban sa 200 pisong buy-bust money, nakumpiska rin ng mga awtoridad ang higit 17,000 pisong halaga ng umano’y shabu mula suspek na ngayo’y nahaharap sa kaukulang kaso.

Kalaboso ang isa pang kilabot umanong tulak ng droga matapos masabat mula rito ang mahigit 100,000 pisong halaga ng hinihinalang shabu sa Purok Uno, Brgy. Sucat, Muntinlupa City.

Kinilala ang suspek na si Flornel Galorpot, 26 na taong gulang, at nakatira sa nasabing barangay.

Sa tulong ng Philippine Drug Enforcement Agency (PDEA), nadakip si Galorpot at nasamsam mula rito ang higit 15 gramo ng umano’y shabu na tinatayang nagkakahalaga ng mahigit 102,000 pesos, maliban sa 500 pisong buy-bust money.

Nahaharap ang suspek sa kasong paglabag sa Comprehensive Dangerous Drugs Act of 2002.

Nakakulong ngayon ang isang lalaki matapos umanong mangholdap ng taxi driver sa C6 Road, Brgy. Sta. Ana, Taguig City.

Kinilala ang suspek na si Neil Marasigan, 24 na taong gulang, at naninirahan sa nasabing lungsod.

Sumakay umano sa biktimang taxi driver ang tatlong lalaki bago nagdeklara ng holdap at tinangay ang kanyang cellphone na nagkakahalaga ng 7,000 piso, dash cam na nagkakahalaga ng 25,000 pesos, at alahas na nasa 1,200 pesos ang halaga.

Nakatakas ang dalawang lalaki habang agad ding nasakote ng mga barangay tanod si Marasigan na ngayo’y nahaharap sa kasong robbery.

Isa na namang kilabot umanong drug pusher ang nasakote sa buy-bust operation sa Brgy Almanza Dos, Las Pinas City.

Kinila ang suspek na si Lonie Obeja, 35 taong gulang.

Bukod sa 300 pisong buy-bust money, nasabat din mula kay Obeja ang higit 22,000 pesos na halaga ng hinihinalang shabu.

Inihahanda na ang kaukulang kasong isasampa laban sa suspek.