RONDA PROBINSYA

Timbog ang tatlong drug suspects, kabilang ang dalawang menor de edad, sa magkahiwalay na operasyon sa lungsod ng Muntinlupa.

Sa Brgy. Bayanan, nadakip ang 16 anyos na si alyas Dodoy at maging ang 17 anyos na si alyas Ninay kung saan nasabat mula sa mga ito ang 200 pisong buy-bust money at 17,000 pisong halaga ng umano’y shabu.

Sa isa pang operasyon sa Purok Dos sa Bayanan pa rin, timbog din sa anti-illegal drug operation ang isang Ruel Esplana, 38 taong gulang.

Nasamsam mula sa suspek ang halos dalawang gramo ng umano’y shabu na tinatayang nagkakahalaga ng mahigit 8,000 piso.

Nagwakas ang maliligayang araw ng dalawang hinihinalang drug pusher matapos madakip sa ikinasang buy-bust operation sa Paranaque City.

Kabilang sa mga naaresto sina Joseph Estacio, 22 taong gulang, at Louis Nathaniel Calago, 21 taong gulang.

Maliban sa 500 pisong buy-bust money at isang kaha ng sigarilyo, nasabat din mula sa kanila ang nasa 13,600 pesos na halaga ng umano’y shabu.

Nahaharap ang mga suspek sa kasong paglabag sa comprehensive dangerous drugs act.

Sa kulungan ang bagsak ng isang lalaki dahil sa umano’y pagtutulak ng ipinagbabawal na droga sa MLQ St., Brgy. Bagumbayan, Taguig City.

Kinilala ang suspek na si Nicko Arvin Grafil, 26 na taong gulang, at nakatira sa nasabing lungsod.

Nakuha mula skay Grafil ang limang plastic sachets na naglalaman ng hinihinalang shabu at nagkakahalaga ng 27,200 pesos, kasama ang 200 pisong buy-bust money at pitaka.

Sasampahan ng kaukulang kaso ang naturang suspek.

Patay ang isang lalaki matapos manlaban sa mga otoridad sa ikinasang buy-bust operation sa Pangasinan.

Kinilala ang suspek na si Rodirick Dizon alyas “rick”, nasa hustong gulang ng Barangay San Agustin, Pangasinan.

Nakahalata umano ang suspek na isang pulis ang kanyang katransaksyon kung saan nagresulta ito sa pagbunot ng baril sabay putok sa kausap.

Masuwerte umanong hindi tinamaan ng bala ang pulis sabay ganti ng putok sa suspek na siya nitong ikinamatay

Nakuha sa crime scene ang isang caliber 9mm pistol, limang basyo ng bala, isang plastic sachet ng shabu na may timbang na apat na gramo at halagang aabot sa labin-limang libong piso at isang motorsiklong motorstar na may plakang ca49799 na ginamit umano ng suspek. —sa panulat ni Kim Gomez 

Arestado ang SK  Chairman sa Cavite matapos mahulihan ng mga otoridad at Philippine Drug Enforcement Agency (PDEA) ng marijuana sa ikinasang buy-bust operation.

Kinilala ang suspek na si Reymart Digma alias “resma” 26-anyos, residente ng Brgy. Poblacion 4, Alfonso, Cavite.

Nakuha sa suspek ang siyam na plastic na sachet na naglalaman ng mga pinatuyong dahon ng marijuana.

Nahaharap si Digma sa kasong paglabag sa ra 9165 o comprehensive dangerous drugs act.

Pumalo na sa pito katao ang patay habang nasa 120 pa ang nakaratay sa ospital matapos ang diarrhea outbreak sa Siargao.

Ayon kay Surigao Governor Francisco matugas, ang sanhi ng diarrhea ay ang tubig poso na ininom ng mga residente dahilan sa pahirapan ang malinis na inuming tubig na ibiyahe sa kanilang lalawigan.

Sinabi ni Matugas na marami ngayon ang mga naka confine sa Siargao District hospital dahil sa naturang diarrhea.

Dahil dito, nanawagan si Matugas ng karagdagang suplay ng gamot at dextrose para sa mga nakaratay sa mga pagamutan.

Samantala, patuloy namang umaapela si matugas ng tulong tulad ng mga pagkain, malinis na tubig, gamot, kumot at iba pa para sa mga apektadong residente ng kanilang hurisdikyon. —sa panulat ni Kim Gomez 

Itinanggi ng Philippine National Police (PNP) na walang naganap na nakawan sa kasagsagan ng kakapusan ng pagkain matapos hagupitin ng bagyong Odette ang Siargao, Surigao Del Norte at Dinagat Islands.

Tiniyak ni Pnp-Caraga Public Information Office Chief Police Major Dorothy tumulak , na ang mga tauhan na idineploy sa nasabing mga lugar ang magpapatotoo na walang insidente ng nakawan dito.

Sinabi rin ni tumulak, na wala silang natanggap na ulat nang nakawan o looting sa mga nasabing lugar.

Matatandaang, naalarma si Bohol Governor Arthur Yap dahil sa kanilang sitwasyon na paubos na ang kanilang suplay ng pagkain kaya umapela ito bago pa man magkaroon ng nakawan sa kanilang lugar. —sa panulat ni Kim Gomez 

Ipinagdiwang ng mga nakaligtas na residente ng bagyong Odette sa Hinundayan, Southern Leyte ang noche buena sa mga evacuation center na may dalang mga relief goods.

Sinabi ng ilang evacuees na magdiriwang pa rin sila ng pasko sa kabila ng kanilang kabuhayan at mga tahanan na sinira ng bagyo.

Ipinabatid ni Hinundayan Mayor Elisa Dela Cruz-Cadingan na dalawang ektaryang lugar ang ilalaan para sa mga biktima ng bagyo upang muling maitayo ang kanilang mga tahanan.

Gayunpaman, umapela sila sa pamahalaan ng karagdagang donasyon kabilang ang pagkain, malinis na tubig, at gatas para sa mga bata. —sa panulat ni Kim Gomez

Kalaboso ang isang miyembro ng LGBT community sa Ilocos Sur, matapos mangikil sa ang isang construction worker kapalit ng hindi pagpapakalat nito ng maseselan niyang larawan.

Kinilala ang biktima na si Alyas Jestoni, habang kinilala naman ang suspek na si Alyas Samantha.

Ayon sa awtoridad, nagpakilalang residente ng ibang bayan ang 19-anyos na suspek, at sinabing namamasukan siya bilang isang kasambahay at nang magkapalagayan ng loob ay nagpalitan na ng maseselang larawan ang dalawa.

Pagkatapos nito ay doon na daw siya kinontak ng galit na nagpakilalang nobyo ng suspek at nagbanta ito na ikakalat ang kaniyang maseselang larawan at video kung hindi magbibigay ng 7,000 pesos.

Ngunit sa pagdaan ng mga araw ay patuloy ang pangbablackmail ng suspek sa biktima, kung kaya’t nagpasya na siyang humingi na ng tulong sa mga otoridad at tagumpay na naaresto ang suspek sa isinagawang entrapment operation, kung saan kalaunan ay natuklasan kamag-anak pala ang dalawa.

Sa kabila nito desidido ang biktima na idemanda ang supek. —sa panulat ni Mara Valle

Ilang araw bago mag pasko, patay ang tatlong maganak matapos makulong sa kanilalang nasuusnog na bahay sa Negros Occidental.

Nakulong sa nasusunog nilang bahay ang magkapatid na edad 9 at 6, pati ang pinsan nitong 3 taong gulang.

Sugatan naman at nagtamo ng second degree burn ang lola ng mga bata.

Ayon sa imbestigasyon, wala raw kuryente sa lugar nang sandaling iyon dahil sa epekto ng nagdaang bagyong odette nang umalis sandali ang ina ng mga bata para magpa-load ng cellphone.

Bukod sa bahay ng mga biktima, 11 bahay pa ang nadamay sa sunog. Patuloy namang inaalam ng mga otoridad kung ang gamit na gasera sa bahay ng mga biktima ang pinagmulan ng sunog. —sa panulat ni Mara Valle