RONDA PROBINSYA

Kritikal ang isang security guard matapos na saksakin ng icepick ng kanyang kapitbahay nang matapos hindi pahiramin ng pera sa Cavite.

Kinilala ang biktima na si Amado Robea, 25-anyos, habang nasa kustodiya naman ng Bacoor Custodial Center ang suspek na si Willie Dionog, 58-anyos.

Ayon kay Pat. Marco Romero Cupo, ng Bacoor City Police, gabi nang puntahan ng suspek sa bahay ang biktima sa molino upang manghiram ng pera subalit sinabihan siyang wala itong maipapahiram na siya namang ikinagalit ng suspek.

Agad na tumakas si dionog, ngunit sa follow up operation ng otoridad ay agad rin namang naaresto ang suspek. —sa panulat ni Mara Valle

Lubos na nangangailangan ngayon ang mga residente sa Cebu City matapos manalasa ang bagyong Odette sa kanilang lugar.

Ayon sa mga residente, isa sa matinding pangangailangan ng bawat isa sa kanila ay ang pagkain at malinis na maiinom.

Ang ilan sa kanila ay nagtyatyaga nalang pumila ng mahigit apat na oras sa kabila ng mainit na sikat ng araw para lang makakuha ng malinis na tubig.

Dahil dito, nangako si Cebu City Mayor Michael Rama, na kanilang tutugunan ang problema sa tubig ng mga residente sa kanilang lugar kung saan, naglaan na ang city government ng 1 billion pesos para sa rehabilitasyon ng lungsod. —sa panulat ni Angelica Doctolero

Pito ang patay habang 118 pang indibidwal ang naka-confine ngayon sa ospital matapos makaranas ng diarrhea at vomiting outbreak sa Surigao del Norte.

Sa naging pahayag ni Governor Francisco “Lalo” Matugas, sumakit ang tiyan at nagsusuka ang mga biktima kung saan, punuan na ang mga ospital dahil sa epidemic sa kanilang lugar.

Ayon kay Matugas, kulang ang mga barko at bangkang ginagamit sa kanilang lugar upang maghatid ng food supplies at malinis na inumin mula sa Surigao City patungong Siargao.

Bukod pa dito, sira na din ang mga water refilling stations dahil sa pananalasa ng bayong odette kung saan, tanging dalawa na lamang ang gumaganang istasyon subalit hindi ito sapat para sa buong residente sa Isla.

Samantala, umaasa naman si Matugas na makakahiram ang kanilang lugar ng LCTO O Landing Craft Tank upang magamit sa mga bigas, canned goods, maging drinking water sa kanilang lugar. —sa panulat ni Angelica Doctolero

Binawian ng buhay ang apat na indibidwal kabilang ang dalawang pulis sa nangyaring shoot out sa North Cotabato.

Kinilala ang mga nasawing magkapatid na sina John Kevin Papna at Jerson Rey Papna habang ang mga pulis ay sina Master Sergeant Fletcherlyn Dominic Pido at Staff Sergeant Arman Alquiza Bada.

Ayon sa imbestigasyon, nagtangka ang mga nasabing pulis na isilbi ang warrant of arrest laban sa dalawang magkapatid nang mangyari ang palitan ng putok sa dalawang panig.

Makalipas ang ilang minuto ay nakita na lamang ng mga residente na nakahandusay na ang apat na indibidwal.

Samantala, patuloy ang imbestigasyon ng otoridad sa nangyaring insidente. —sa panulat ni Airiam Sancho

Mariing kinondena ng Police Regional Office 10 o Northern Mindanao PNP ang nangyaring pamamaril sa Sitio Pulao, Brgy. VII, Tangub City, Misamis Occidental.

Ayon kay Northern Mindanao Regional Police Director P/BGen. Benjamin Acorda Jr, kabilang sa mga biktima ay sina Misamis Occidental 2nd District Rep. Henry Oaminal, Lopez Jaena Mayor Michael Gutierrez at Jason Almonte.

Batay sa inisyal na ulat, nagsasagawa ng Christmas Party ang grupo nila Oaminal sa Business Center sa nabanggit na lugar nang paulanan sila ng bala mula ilang nakatagong sniper.

Tinamaan ng bala ng baril sa batok si Gutierrez habang natalsikan naman ng mga basag na salamin sina Oaminal at Almonte at agad silang isinugod sa ospital.

Kinailangang operahan si Gutierrez sa Misamis Occidental University Medical Center habang nasa ligtas nang kalagayan ang dalawa.

Dahil dito, agad ipinag-utos ni Acorda sa Misamis Occidental Provincial Police Office ang pagbuo ng Special Investigation Task Group (SITG) para tutukan ang imbestigasyon.

Nabatid na tumatakbo sa pagka-bise Gubernador ng lalawigan si Gutierrez habang kumakandidato rin sa pagka-Kongresista ng unang Distrito si Almonte. —sa ulat ni Jaymark Dagala (Patrol 9)

Kalunos-lunos ang sinapit ng lalawigan ng Bohol matapos masalanta ng bagyong Odette.

Dahil sa pinsalang iniwan ng bagyo, wala paring kasiguraduhan kung kailan maibabalik sa lugar ang turismo na pangunahing kabuhayan ng lalawigan.

Ayon sa mga residente, mayroong mga dumarating narelief goods mula sa gobyerno at meron ding galing sa mga Non Government Organization (NGO) ngunit hindi ito sapat dahil sa kakulangan sa aspeto ng logistics dahil sa limitadong daraanan ng mga trak.

Maaalalang malaki rin ang naging dagok ng pinsala sa naturang lugar ng Covid-19 pandemic. —sa panulat ni Mara Valle

Nasawi ang tatlong bata matapos na masunog ang kanilang bahay sa San Carlos City.

Ayon kay Fo2 Neil Bantillo, natutulog umano ang magkakapatid nang mangyari ang trahedya.

Nang makaresponde ang otoridad tumambad sa kanila ang bangkay ng magkakapatid na edad 9, 7, at 3 anyos sa loob ng kanilang kwarto.

Base naman sa report ng fire investigator, sa loob mismo ng kwarto ng mga bata nagsimula ang apoy dahil sa napabayaang kandila na nakalagay sa sahig. —sa panulat ni Mara Valle

Nasawi ang isang 55 anyos na lolo matapos sagipin mula sa pagkalunod ang kaniyang mga apo sa Albay.

Ayon sa mga otoridad, namataan ng isang mangingisda na si Ronaldo Arquero ang biktimang si Azupardo at ang kaniyang 3 apo sa dagat na humihingi ng saklolo kung saan, nailigtas ng lolo ang dalawang apo at nasagip naman ng mangingisda na si Ronaldo, ang isa pang apo ng biktima.

Sa pahayag ni Arquero, mabilis ang pangyayari kayat hindi na niya nakita ang lolo ng mga bata.

Dito na napag-alaman na pumailalim ito sa sumadsad na barge at lumutang na lamang makalipas ang mahigit kumulang 20 minuto.

Ayon sa mga otoridad hindi ito ang unang beses na may nalunod sa lugar kaya inabisuhan nila ang mga residente sa lugar na mag doble-ingat lalo na kung maliligo sa dagat. —sa panulat ni Mara Valle

Isinailalim Sa State Of Calamity ang Misamis Oriental na nasasakupang ng Northern Mindanao.

Dismayado ang ilang mga residente ng Barangay Sta. Ana sapagkat wala pa umano silang natatanggap na tulong matapos wasakin ng bagyong Odette ang kanilang mga bahay.

Naputol rin ang isang tulay na nagsisilbing daanan papasok at palabas ng mga mangangalakal sa kanilang lugar.

Sa ulat ng Regional Disaster Risk Reduction and Management Council Region X or RDRRMC, pinaka maraming tinamaan ng bagyong Odette sa Misamis Oriental, apat ang naiulat na nasawi at maraming pananim ang nawasak. —sa panulat ni Mara Valle

Arestado ang apat na katao matapos bentahan ng mga pekeng sigarilyo ang isang tindera sa Cavite.

Kinilala ang mga suspek na sina Rochelle Kaligayan, 40 anyos; Randy Oriola, 37 anyos; Rodessa Kaligayahan, 37 anyos at Armando Yedra, 75 anyos, na inireklamo ng isang Darren Hernandez, 32 anyos, ng Amadeo, Cavite.

Ayon kay Corporal Rey Kevin Manuel, ng Amadeo Police Station, ang mga suspek ay nahaharap sa kasong swindling, habang patuloy pang inaalam ng mga otoridad kung saan nanggaling ang mga pekeng sigarilyo.

—sa panulat ni Mara Valle