NEWS

Inamin ni dating Philippine Charity Sweepstakes Office General Manager Royina Garma, na nagpasok siya ng mga kamag-anak niya sa PCSO, kabilang na ang anak nito bilang isang “confidential agent.”

Ito’y kasunod ng pagkwestyon ni House Committee on Public Order and Safety Representative Dan Fernandez sa ginawang hakbang ni Garma at sinabing maliban sa may sakit ang anak nito ay hindi nito naabot ang qualifications para sa nasabing posisyon kabilang na ang karanasan sa law enforcement.

Kaugnay nito, nilinaw ni Congressman Fernandez na kinakailangang mayroong Bachelor’s Degree sa Criminal Justice at may karanasan sa law enforcement upang maitalagang confidential agent.

Mariing itinanggi naman ni Garma ang mga sinabi ng kongresista na may sakit na ang anak niya ng pumasok ito sa PCSO at sinabing dyslexia pa lamang ang diagnose rito. – sa panulat ni Alyssa Quevedo

Hinimok ni Pangulong Ferdinand Marcos Jr. ang mga taga-media na huwag tumigil sa pagpapamalas ng kahulugan ng isang tunay na mamamahayag.

Sa ika-limampung anibersaryo ng Publishers Association of the Philippines o PAPI, sinabi ni PBBM na dapat patuloy na mag-innovate at sumabay sa pagbabago at pangangailangan ng makabagong panahon ang mga mamamahayag nang hindi nakokompromiso ang kanilang prinsipyo.

Giit ng Pangulo, isang pangangailangan ang pagkakaroon ng mulat at maalam na mamamayan sa bansa, upang magabayan ang mga ito sa tama at matalinong pagdedesisyon kaugnay sa kanilang mga lider, sa kanilang sitwasyon, at sa kasalukuyan nilang kondisyon.

Kasabay nito, nangako ang punong ehekutibo na sa ilalim ng kanyang administrasyon, nakasuporta ito sa paggampan ng mga mamamahayag ng kanilang tungkulin.

Paliwanag pa ni Pangulong Marcos, katuwang ng gobyerno ang media sa paghahatid sa publiko ng tama o totoong impormasyon.

Patay ang isang kapitan ng barangay matapos pagbabarilin ng ‘di pa nakikilalang salarin sa San Nicolas, Ilocos Norte.

Idineklarang dead on arrival sa ospital ang biktima na kinilalang si Jojo Bagay, first-term barangay chairman ng Barangay 5 San Silvestre.

Batay sa inisyal na imbestigasyon, nakaupo sa garahe ng kanilang bahay ang biktima nang lapitan ng gunman bago pinagbabaril.

Patuloy ang imbestigasyon ng mga awtoridad upang matukoy ang pagkakakilanlan ng salarin at ang posibleng motibo sa pamamaslang.

Pangangasiwaan na ng new NAIA Infrastructure Corporation ang operasyon at maintenance ng Ninoy Aquino International Airport simula ngayong araw.

Ayon kay Manila International Airport Authority Executive Assistant Chris Bendijo, sasailalim sa upgrade ang operasyon at pasilidad ng paliparan.

Bagama’t hindi ito magagawa ng ‘overnight,’ tiniyak naman ni Bendijo na gaganda at mapapabuti ang NAIA.

Kabilang aniya sa mga pagbabagong ito ang mas maraming upuan sa waiting at pre-departure area; pag-aayos ng elevator, walkalator, escalator, generator set at air conditioning, pag-upgrade sa passenger boarding bridges at paggamit ng visual docking system.

Samantala, nag-abiso rin ang MIAA official na tataas ang bayad sa NAIA sa susunod na taon.

Umarangkada na ang dry run ng cashless toll collection sa Manila-Cavite Expressway o CAVITEX.

Saklaw ng dry run para sa full cashless system ang Parañaque at Kawit toll plazas.

Kaugnay nito, dapat na mayroong radio frequency identification o RFID ang mga motorista na dumadaan sa CAVITEX toll plazas.

Una nang sinabi ng PEA Tollway Corporation, operator ng CAVITEX, na aalisin na ang mga cash lane sa isasagawang dry run, ngunit papayagan pa rin namang makadaan ang mga motoristang walang RFID.

Gayunman, oobligahin na ang mga ito na magpakabit ng RFID sticker sa kanilang mga sasakyan.

Sa oras na matapos ang dry run, pagmumultahin na ang mga motoristang walang RFID stickers, maging ang mga walang sapat na load at mga gagamit ng tampered o pekeng RFID device.

Hinatulan ng 2 consecutive life sentence na walang posibilidad ng parole, at karagdagan na 50 taon ang isang social media personality na binaril at napatay ang kanyang Filipino American na asawa at isang lalaki sa loong apartment sa East Village sa San Diego, California.

Si Ali Abulaban, 32, na kilala sa bilang content creator na may pangalan na “JinnKId”, ay hinatulan noong Mayo ng 2 two counts of first-degree murder sa pagbaril-patay kay Ana Abulaban, 28, at Rayburn Cardenas Barron, 29 noong October 21, 2022.

Ayon sa suspek, ilang buwan nang naghinala ito sa kanyang asawa na may kalaguyo, nangibabaw ang kanyang poot nang makita ang kanyang asawa sa sofa na may kasamang ibang lalaki.

Sisimulan na sa susunod na linggo ang dry run ng full cashless toll collection sa Manila-Cavite Toll Expressway o CAVITEX.

Ayon sa PEA Tollway Corporation, tatanggalin na ang lahat ng cash lanes sa CAVITEX, kaya’t magiging 100% cashless na ang pagdaan dito, at tanging radio frequency identification device o RFID na lamang ang tatanggapin sa mga toll plaza, simula September 14.

Kaugnay nito, pinapayuhan ang mga motorista na tiyaking may load ang kanilang mga RFID.

Sinabi naman ng Toll Regulatory Board, na sakop ng dry run para sa full cashless system sa CAVITEX ang Parañaque at Kawit toll plazas.

Isinailalim na rin sa state of calamity ang lalawigan ng Bukidnon dahil sa tumataas na kaso ng dengue.

Batay sa resolusyon na ipinasa ng sangguniang panlalawigan, lumampas na sa five-year epidemic threshold ang kaso ng dengue sa probinsya mula noong Enero hanggang nitong Hulyo.

Batay sa report, nakitaan ng pagtaas ng kaso ang dalawang lungsod at labingsiyam na bayan, na may mahigit limang libong dengue cases, kung saan labingpito ang napaulat na nasawi sa naturang sakit.

Una nang sinabi ng provincial health office na naitala ang pinakamaraming kaso ng dengue sa Malaybalay City, na may 926 cases, na sinundan ng Valencia City na nakapagtala ng 508 cases.

Sa pamamagitan ng nasabing deklarasyon, magagamit na ng lokal na pamahalaan ang kanilang calamity fund para labanan ang dengue.

Isang sundalo ang nasawi makaraang magkasagupaan ang pwersa ng militar at hinihinalang rebeldeng grupo sa Barangay Lugban, Bula, Camarines Sur.

Ayon sa ulat, nagsagawa ng operasyon ang militar matapos magsumbong ng ilang residente kaugnay sa presensya ng grupo sa lugar.

Sangkot umano ang grupo sa extortion activities sa lugar.

Inaalam pa ng mga awtoridad kung mayroong mga nasawing miyembro ng rebeldeng grupo habang patuloy ang pagtugis sa iba pa nilang kasamahan upang matiyak ang kaligtasan ng komunidad. - sa panulat ni Ralph Dela Cruz

“Nonsense” o kalokohan ang mga paratang na kasosyo umano ni Pangulong Ferdinand “Bongbong” Marcos Jr. ang illegal Chinese gambling operators dahil mismong ang presidente ang nag-utos na ipagbawal ang kanilang operasyon.

Ito ang iginiit ng mga personalidad na kilalang-kilala si Pangulong Marcos. Anila, “accommodating” lamang ang pangulo sa mga nais na magpakuha ng litrato sa kanya, hindi lamang sa mga guest, kundi pati sa mga waiter at waitress ng Hao Hao Restaurant.

Ayon kay Ricky Alfonso na kilala si Pangulong Marcos sa loob ng 50 taon, humiling lamang ang Chinese customers na magpa-picture kay First Lady Liza Araneta-Marcos at Pangulong Marcos na noong panahong iyon ay hindi pa kumakandidato bilang lider ng bansa.

Kwento naman ng food business operator at kaibigan ng pangulo na si Sandy Daza, nais lamang ng illegal Chinese gambling operators na magpakuha ng litrato kay Pangulong Marcos at kaagad rin silang umalis.

Ganito rin ang salaysay ni Pepe Ortega na present din sa nasabing restaurant. Ayon sa malapit na kaibigan ng pangulo nang higit 40 taon, kumain lamang sila sa restaurant at mayroong humiling sa kanilang magpa-picture kasama ang “rockstar” na si Pangulong Marcos.

Pagdidiin naman ni Noel Patrick Prudente na matalik na kaibigan ni Pangulong Marcos at ng unang ginang, kinuha ang malisyosong larawan na kumakalat ngayon sa social media bago pa man siya naihalal bilang presidente.

Aniya, palaging nakakahanap si Pangulong Marcos at ang kanyang mga kaibigan ng oras para sa publiko, anuman ang katayuan nila sa lipunan, dahil sa taglay nilang kabaitan.