NEWS

Nasa kalagitnaan pa lang ng 2024, ngunit tatlong kampeonato na ang naiuwi ng sabong sensation na si Ka Rex Cayanong sa Big Time Derby.

Noong Agosto 20, naging solo champion si veteran broadcast journalist Cayanong sa Big Event Early Bird Edition, 6-Stag Derby na ginanap sa New Antipolo Coliseum sa Antipolo City.

Sa ilalim ng entry name na KA REX 1.5M No Pot 6-STAG NOV 5 Pasay/Sky Walker, nakamit ni Cayanong ang perpektong anim na puntos at naiuwi ang P500,000 premyo.

Pinanalo ni Cayanong ang laban gamit ang mga malulupit na bloodlines na Bostabo, Pumpkin Sweater, at Grey.

Tinalo niya ang mga tigasing entries tulad ng CP Horse Power ni Engr Cueto sa unang laban at SMC ni Tady Palma sa ikalawa.

Siniyapol din ng mga warriors ni Cayanong ang mga entries na RBS Sta. Clara, Ryan Design, 3M 718 Pateros, at GALLOTECH ni Von Cruz.

Ang ginamit ni Ka Rex sa kanyang huling laban ay ang Grey.

Kasama ni Cayanong sa paghahanda ng kanyang mga manok sina Anteng, Jharet, at Roel Bullecer, habang si Juan Carlo “Taho” Bullecer ang gaffer.

Siyam na entries ang naka-limang puntos at nagbahagi ng P300,000 sa event na umabot sa 224 na laban.

Naunang itinaguyod ni Cayanong ang kanyang unang kampeonato ngayong taon sa 3-Cock Derby sa Angono Cockpit, sinundan ng 4-Cock Derby sa San Roque Marikina Cockpit.

Nakadagdag pa sa kinang ng sabungan ang pagiging kasador ni comedian actor Long Mejia.

Sa kasagsagan ng sultada, dumating din ang sikat na breeder at former World Slasher Cup champion Biboy Enriquez ng Fire Bird GameFarm.

Samantala, kasama sa mga kilalang sabungero na naroon sa venue sina Mandy Garcia at Don King, na siyang magpapalabas ng Big Event 7-Stag Derby sa San Pedro Coliseum sa Setyembre 29.

Nabatid na ang susunod na laban ni Cayanong ay ang “Ka Rex B-Day 1.5M 6-Stag National Invitational Derby” na gaganapin sa Pasay Cockpit Arena sa Nobyembre 5.

Binabatikos ng mga netizen ang dating “bad boy” na ngayon ay politician na si Sen. Robin Padilla at ang kanyang asawang si Mariel Rodriguez dahil sa umano’y tila pabiro nilang pagtrato sa isang sensitibong isyu kaugnay sa consent sa loob ng kasal.

Sa isang social media post, ibinahagi ni Mariel ang isang larawan nila ni Sen. Robin na naghahalikan at may caption na, “Oh may consent yan ah.”

Sumagot naman dito si Sen. Robin ng, “Hello, babe, I’m in heat.”

Dinagdagan pa ito ng actress-TV host na nag-reply ng, “It’s a tie… I’m feeling hot hot hot.”

Matatandaang naging kontrobersyal si Sen. Robin matapos tanungin kamakailan sa isang senate hearing si Atty. Lorna Kapunan, isang women’s and children’s rights advocate, tungkol sa kasalukuyang kahulugan ng rape.

Ayon kay Atty. Kapunan, “no means no”, kahit pa sa konsteksto ng kasal.

Dito na kwinestiyon ni Sen. Robin ang naging tugon ng abogada.

Isang araw matapos ang senate hearing, ipinost na ni Mariel ang larawan nila ng kanyang mister na may caption na tila pasaring sa naging diskusyon tungkol sa consent.

Umani ang mga komento ng mag-asawa ng negatibong reaksyon mula sa mga netizen dahil nagpapakita umano ito ng kawalan ng respeto sa mga biktima ng karahasan. Anila, hindi dapat ginagawang biro ang isyung ito, lalo na’t may mga nagdurusa dahil sa marital rape.

Humingi naman ng paumanhin si Sen. Robin sa mga na-offend sa kanyang mga pahayag; ngunit nanindigan siyang wala siyang binanggit na pwedeng pilitin ng mister ang kanyang misis na makipagtalik kahit ayaw nito. Paglilinaw niya, “Ang punto ay kung ano ang pwedeng gawin ng asawang lalaki para maging legal ang paghingi ng sex ng isang lalaki at hindi maging rape.”

“Ang may-ari ng Magsasaka Partylist ay ang mga Magsasakang Pilipino kaya ang pagkapanalo sa Supreme Court ay pagkapanalo ng lahat ng ating mga magsasaka!”

Ito ang naging pahayag ni Congressman, Atty. Argel Cabatbat, matapos maglabas ng desisyon ang Korte Suprema kung saan idineklara nito kung sino ang nararapat na maging kinatawan o representative ng partylist sa Kongreso.

Batay sa desisyon ng SC, ipinunto na hindi maaaring ituring na kinatawan ng Magsasaka Partylist ang respondent na si Soliman Villamin Jr. dahil matagal na itong sinibak bilang opisyal ng grupo.

Iginiit ng Mataas na Hukuman na dapat ay ibinasura ng Commission on Elections (Comelec) ang representasyon ni Villamin sa kanyang sarili bilang national chairperson ng grupo lalo pa’t matagal na itong tinanggal bilang national chairperson.

“This Court finds that the Comelec gravely abused its discretion when it focused on purely procedural matters and disregarded the substantive issues raised by Magsasaka the proceedings below, refused to acknowledge established party practice, and substituted its mandate over that of Magsasaka, thereby unlawfully instituting Villamin as its national chairperson,” ayon sa pasya ng SC.

Binanggit din sa hatol ng Kataas-taasang Hukuman na dahil hindi na national chairperson ng Magsasaka si Villamin, ang kanyang nominado na si Roberto Gerard Nazal Jr. ay hindi dapat naiproklama bilang partylist representative sa Kamara.

Samantala, habang nakabinbin ang petisyon ng kampo ni Cabatbat, patuloy itong nagbibigay ng tulong, sa kanyang personal na kapasidad, para sa mga Pilipinong magsasaka at tiniyak ang kanilang kapakanan at kabuhayan.

Sinaklolohan din ni Cabatbat ang mga magsasaka na Ilokano sa Amai na makarating sa Malacañang upang tugunan ang kanilang mga problema matapos silang paalisin sa kanilang mga lugar.

Bukod dito, naging katuwang si Cabatbat sa pag-uulat sa Commission on Human Rights (CHR) sa pagpatay sa mga magsasaka sa Siaton, Negros Oriental at ang pag-bulldoze sa kanilang mga tirahan.

Matagumpay namang naibigay ang lupa ng mga magsasaka sa Coron, Palawan, sa tulong ni Cabatbat, gayundin ang lagoon ng Tagbanua Indigenous People, na tinangkang angkinin ng isang dayuhan.

Isinusulong na sa Senado ang paglilimita sa mga holiday sa Pilipinas.

Ito ang napagkasunduan ng mga senador ayon kay Senate President Francis “Chiz” Escudero.

Dahil mahigit isang buwan ang holidays sa buong bansa, nababawasan umano ang pagiging competitive ng mga kumpanya at mga manggagawa. Ayon pa sa senate president, naapektuhan ng napakaraming holidays ang pondo ng mga kumpanya.

Gaya ng inaasahan, umani ito ng negatibong reaksyon mula sa mga manggagawa at estudyanteng apektado ng naturang panukala.

Ayon sa isang netizen, kalokohan ang polisiyang ito. Aniya, sa holiday na nga lang tumataas ang sahod nila, babawasan pa. Hindi rin umano totoong hindi competitive ang mga manggagawa dahil sa halip na makapagpahinga, pinipili pa rin nilang pumasok para sa karagdagang bayad.

Maraming netizen din ang nagsasabing madaming isyu ang bansa na dapat gawing prayoridad kaysa pagbabawas sa holidays. Anila, kabilang sa mga dapat unahin ang pagpapataas sa sahod ng mga manggagawa.

Iba-iba man ang komento ng mga netizen, iisa lamang ang nais nilang iparating: kailangan ng mga manggagawa ang holiday upang madagdagan ang kanilang kakarampot na sahod.

Gayunman, nilinaw ni Sen. Escudero na hindi nila planong bawasan ang kasalukuyang holidays, kundi limitahan lamang ang pagdadagdag ng mga bagong holiday.

MISMONG ang Department of Information and Communications Technology (DICT) na ang mangunguna sa pagpapatupad ng kautusan ni Pangulong Ferdinand Marcos Jr. na magtulungan ang gobyerno at pribadong sektor sa pagpapalawak ng broadband connectivity sa bansa.

“Internet links which require no lease obligation, like setup fees and rental payment, will be a key factor in all efforts to expand connectivity even in the remotest area in the country,” ani DICT spokesman Renato Paraiso.

Sabi ni Paraiso, nagsasagawa na ang DICT ng inisyatibo para makatulong sa pagpapabilis ng pagpapatupad ng batas na magkakaloob ng lease-free wifi connectivity.

“We will coordinate with both the telco providers and legislators in pursuing efforts that would resolve issues that impede the expansion of broadband connectivity,” pahayag ni Paraiso.

Dagdag pa niya: “There are House measures seeking for a lease-free setup of wifi connection. DICT is fully committed to support their immediate passage in the Senate.”

Nabatid na ang tinutukoy ni Paraiso ay ang House bills 900 at 8534 na inakda nina Reps. Christian Yap at Joey Salceda, ayon sa pagkakasunod, na naglalayong amyendahan ang National Building Code at ipatupad ang no-fee setup ng internet link tulad sa instalasyon ng water at electricity supply.

“One of our mandates is the upgrade and expansion of internet services in the country. For this purpose, DICT is conducting series of dialogues with telco providers to help them secure proper coordination with realty owners for the broadband connectivity,” pagbibigay-diin ni Paraiso.

Tinatayang mahigit 600 real property at building owners na ang pumayag na gamitin ng telco companies ang kanilang mga pasilidad nang libre, nagbibigay-diin sa bentahe ng pagpapaupa sa mga espasyo na may malakas na wifi connection bilang kanilang marketing teaser.

Ipinunto ni Paraiso na ang internet connection ay isa na ngayong ‘basic human right’ kaya patuloy ang DICT sa paglalagay ng Free WiFi for All sites upang bigyan ng internet access ang mga Pilipino.

Hinikayat ng isang telecommunications company (telco) ang mga kustomer na suportahan ang fair network use at labanan ang signal pollution para mapanatili ang kalidad ng network service para sa lahat.

Habang patuloy ang Globe sa pagpapalawak at pagpapahusay ng network coverage sa buong bansa, sinasabing naaapektuhan naman ng mga hindi awtorisadong signal repeater ang kalidad ng network service.

Nabatid na ang maling paggamit ng signal boosters ay nagiging sanhi ng putol-putol na tawag, malabong linya, robotic voice, at paghina o pagkawala ng signal sa mga lugar na malapit sa mga device na ito.

Sa ilalim ng Memorandum Order No. 01-02-2013 ng National Telecommunications Commission (NTC) at alinsunod sa Public Telecommunications Policy Act, ipinagbabawal ang pagbebenta, pagbili, pag-import, pagmamay-ari o paggamit ng portable cellular mobile repeaters at cell site equipment.

Nakasaad sa 2013 memo na tanging ang mga lisensyadong mobile network operators at mga ahensya ng gobyerno na may tungkuling may kinalaman sa national defense at security ang pinapayagang bumili, mag-import, mag-may-ari, at gumamit ng signal boosters.

Kung may problema sa pagtawag o pagpapadala ng SMS, maaaring gamitin ang Voice Over WiFi (VOWiFi) sa halip na bumili ng signal boosters.

Napag-alaman na ang VOWiFi ay isang teknolohiya kung saan maaaring gamitin ang WiFi connection sa pagtawag kung saan walang karagdagang bayad sa paggamit nito.

Ayon sa Globe, para magamit ang VoWiFi, kailangan ng WiFi connection at isang device na may WiFi Calling capability.

Maaaring pumunta sa connectivity settings ng mobile phone, i-activate ang “WiFi Calling” habang maaari ring tingnan kung ang gamit na device ay may ganitong feature sa pamamagitan ng listahang ito.

Samantala, para naman sa karagdagang impormasyon tungkol sa Globe, mangyaring bisitahin ang globe.com.ph.

Nanatiling matatag ang performance rating ni Pangulong Ferdinand Marcos Jr.

Sa pinakahuling nationwide survey na isinagawa ng Publicus Asia para sa second quarter ng 2024, lumabas na napanatili ni Pangulong Marcos ang kanyang performance rating sa 51%.

Maging ang kanyang approval rating sa 44% at trust rating sa 33% ay nananatiling matatag.

Samantala, kapansin-pansin na malaki ang ibinaba ng approval rating ni Vice President Sara Duterte, mula 53% sa first quarter na ngayon ay 46% na lamang para sa second quarter.

Makikitang bumaba rin ang trust rating ng bise presidente ng limang puntos, kung saan nakakuha siya ngayon ng 41% na dati ay 46%.

Sa kabilang banda, nauna nang nilinaw ni Pangulong Marcos na hindi siya gumagawa ng mga patakaran batay sa resulta ng survey.

Sa halip, nagsisimula nang maramdaman ng mga Pilipino ang aktwal na epekto ng mga istruktural na pagbabago sa ilalim ng kanyang administrasyon.

IGINIIT ng Trabaho Partylist na importante rin na mabigyan ang mga empleyado ng mga karagdagang non-wage benefits para mapagbuti nila ang kanilang pamumuhay.

“Hindi lang dapat nakatali sa income ang disenteng pamumuhay kundi maging sa pagkakaroon ng benefits partikular sa health,” pahayag ni Atty. Filemon Ray Javier, tagapagsalita ng grupo, matapos matanong sa isang panayam tungkol sa mga solusyong makakatulong sa mga manggagawa at empleyado sa tuwing hindi naaapruhaban ang mga nakaambang na wage hike.

Aniya, hindi dapat nakadepende lamang sa wage increase para matugunan ang mga pang-araw-araw na pangangailangan ng mga pamilyang Pilipino.

Ipinunto niya na sa mga long-term na solusyon, kinakailangang palakasin ang ekonomiya, paramihin ang mga investors, magbigay ng mga training para sa skilled workers, at pagkakaaroon ng representasyon kagaya ng Trabaho Partylist sa kongreso upang maisabatas ang marami pang importanteng benepisyo para sa mga maggagawang Pilipino.

INIHIRIT ng isang consumer group sa pamahalaan na maglaan ng karagdagang budget para sa internet infrastructure sa bansa.

Giit ng Bantay Konsyumer, Kalsada, Kuryente (BK3), ang mga Pilipino ay nabubuhay ngayon sa digital age kung saan maraming operasyon ang isinasagawa online.

Sabi ng grupo, na sumusuporta rin sa pagpasa ng batas na nagsusulong sa ‘zero lease’ para sa digital connectivity, ang internet connection ay isa na ngayong karapatang pantao, at ang investments sa broadband infrastructure ay dapat maging prayoridad dahil ang access sa cyber space ay hindi dapat limitado.

“Hindi na dapat luho ang pag-access sa internet… ang dulot ng connectivity ng internet sa mga transaksyon sa pagitan ng mga konsyumer at mga negosyante, sa pagkalap ng impormasyon at pakikipag-ugnayan hanggang ordinaryong mamamayan, at sa pangkalahatang pagpapadala at pagpapasimple ng marami sa ating ordinaryong gawain,” diin ng BK3.

“Kailangang matugunan ang isyu ng kakulangan sa access sa internet sa lalong madaling panahon,” dagdag pa ng grupo.

Batay sa datos ng pamahalaan, lumabas na milya-milya pa ang layo ng Pilipinas sa mga kalapit na bansa pagdating sa broadband connectivity dahil sa kawalan ng imprastruktura para sa internet connection.

Ayon naman sa 2021 data mula sa National Telecommunications Commission (NTC), natuklasan na may mahigit 22,000 cell sites sa bansa, wala pang one-third ng 90,000 ng Vietnam, at pinagsasaluhan pa ang mga ito ng tatlong telcos.

Matatandaang iminungkahi ng Private Sector Advisory Council (PSAC) ang 35,000 karagdagang cell sites.

Pahayag naman ng Asian Development Bank (ADB), ang Pilipinas ang may pinakamababang coverage rates ng telecom towers sa Southeast Asian region at mangangailangan ng karagdagang 60,000 towers sa 2031 sa remote areas.

Isinusulong naman ng ilang mambabatas at stakeholders sa telecommunications industry ang pagrebisa sa National Building Code of 1977 kung saan layon nitong alisin ang lease fee para sa telecommunications infrastructure upang matulungan ang telcos na mas mabilis na magkaroon ng access sa cell sites at matugunan ang problema sa internet connectivity ng mga Pilipino.

Napag-alaman na ang House Bill Nos. 8534 at 900, na may magkaparehong layunin, ang dalawang panukala na inihain sa House of Representatives na naglalayong bigyan ang property developers ng tiyak na mga tuntunin at depinisyon sa kung gaano kalaking espasyo ang dapat nilang ilaan upang magkaloob ng kinakailangang telecommunication services.