NATIONAL NEWS

Visa-free na ang pagpasok ng Chinese nationals sa Pilipinas simula ngayong araw, Enero a-disi sais.

Kinumpirma ito ng Department of Foreign Affairs kung saan pinapayagan ang kanilang pananatili sa bansa sa loob ng labing-apat na araw para sa tourism o business purposes.

Ayon sa DFA, saklaw ng visa-free entry ang mga darating sa pamamagitan ng Ninoy Aquino International Airport at Mactan-Cebu International Airport.

Nilinaw ng ahensiya na required pa rin ang mga Chinese national na magpakita ng passport, confirmed hotel accommodation o booking, at return o onward ticket sa susunod na destinasyon.

Binigyang-diin ng DFA na epektibo ang visa-free entry arrangement sa loob ng isang taon.

Kinumpirma ni Philippine Ambassador to the United States Jose Manuel Romualdez na hindi kabilang ang Pilipinas sa listahan ng mga bansang sususpindihin ang pagproseso ng U.S. visa.

Kasunod ito ng anunsyo ng Amerika na sususpindihin nito ang pagproseso ng visa mula sa pitumpu’t-limang bansa kabilang na ang Russia, Iran, at Afghanistan, mula Enero 21.

Ayon sa U.S. State Department, immigrant visas lamang ang sakop ng suspension at hindi kasama ang tourist at business visa.

Kasalukuyan, tinatayang may higit apat na milyong Filipino-American ang naninirahan sa Estados Unidos at pangatlong pinakamalaking Asian-American community.

Kinumpirma ni Negros Occidental 3rd District Rep. Javi Benitez na magsasanib-puwersa ang Kamara at Senado para sa nakatakdang public consultation upang alamin ang kalagayan ng industriya ng asukal sa bansa.

Ayon kay Congressman Benitez, pangungunahan ni House Committee on Agriculture Chairman Mark Enverga at Senador Kiko Pangilinan ang nasabing konsultasyon.

Ipinunto ng kongresista na nagpo-produce ang Negros Occidental ng mahigit 1.8-milyong metriko tonelada ng asukal kada taon o mahigit kalahati ng kabuuang produksyon ng bansa. Kaya nararapat lamang anyang magkaroon ng makatarungang presyo ng asukal at mga patakarang tunay na magpo-protekta sa mga magsasaka.

Itinuturing na isang hamon para sa mga tauhan ng Philippine National Police – Criminal Investigation and Detection Group (PNP-CIDG) ang pag-aresto sa business tycoon na si Charlie “Atong” Ang. Gayunman, nagbabala si CIDG Director Major General Robert Alexander Morico II sa mga magkakanlong at magtatangkang pigilan ang pagsisilbi ng arrest warrant kay Ang na hindi sila magdadalawang-isip na arestuhin din ang mga ito dahil sa obstruction of justice.

Ayon kay MGen. Morico, may mga impormasyon na sila hinggil sa lokasyon ng mga pag-aari at property ng negosyante sa Metro Manila, Calabarzon, at Palawan. Dagdag pa niya, nasa loob pa rin ng bansa ang business tycoon na itinuturong mastermind sa kaso ng mga nawawalang sabungero.

Samantala, iginiit naman ng kampo ni Ang na hindi ito susuko at gagawin nila ang lahat ng legal remedy sa anila’y premature na arrest order.

Nagsampa ng kasong libel si Batangas 1st District Rep. Leandro Legarda Leviste laban kay Palace Press Officer Usec. Atty. Claire Castro dahil umano sa pagpapakalat nito ng “fake news.”

Itinuturing ni Leviste na libelous statements ang mga pahayag ni Castro tungkol sa kanyang solar business at pagbenta umano ng prangkisa nito.

Nilinaw ni Leviste na wala siyang prangkisa na ibinenta, iba ang kumpanyang kanyang ibinenta, at nananatili pa rin sa kanyang pagmamay-ari ang mga kumpanyang mayroong prangkisa.

Pinuna rin ni Leviste ang pagiging interesado at madalas na pagbanggit sa kanyang pangalan ni Castro sa mga vlog nito.

Aniya, walang katotohanan ang mga pahayag ni Castro at hindi niya ginagawang negosyo ang mga prangkisa ng gobyerno.

Ayon kay Leviste, criminal case sana ang kanyang ihahain at ayon na rin sa kanyang legal counsel na si Atty. Ferdinand Topacio ay malakas ang kanilang laban dahil sa mga grounds kay Castro.

Pero dahil sa ayaw niyang masaktan at makulong si Castro, libel case na lamang ang kanyang inihain.

Umaasa naman si Leviste na sa pamamagitan ng ginawang hakbang ay matatapos na ang pagpapakalat ng umano’y fake news ni Castro.

Iginiit din ni Leviste na hindi niya kaaway ang administrasyon at suportado niya ang mga hakbang ni Pangulong Ferdinand Marcos Jr. kontra korapsiyon.

Maghahain ng panibagong ethics complaint ang National Unity Party (NUP) para hilingin na i-expel o tuluyan nang alisin sa Kamara si Cavite 4th District Rep. Kiko Barzaga.

Ito ang kinumpirma ni House Deputy Speaker at Antipolo Rep. Ronaldo “Ronnie” Puno dahil sa paulit-ulit na paninira sa social media at pagbabalewala ni Barzaga sa desisyon ng House Committee on Ethics and Privileges.

Para kay Puno, hindi sapat na suspensyon lang ang ipataw kay Barzaga dahil sa patuloy na pag-iimbento nito ng kuwento na nakasisira hindi lamang sa mga mambabatas kundi sa buong institusyon.

Aniya, ginagawang laro ng bagitong mambabatas ang paggawa ng negatibong isyu nang walang batayan at hindi makatotohanan.

Nilinaw din ni Puno na bukod sa pagsusulong ng expulsion, itutuloy pa rin nila ang pagsasampa ng kaso sa korte laban kay Barzaga hinggil sa alegasyon nito na tumanggap umano ng suhol ang mga miyembro ng NUP sa bilyonaryo at negosyanteng si Enrique Razon para suportahan si dating House Speaker Martin Romualdez sa 2025 midterm elections.

Umaasa si Puno na maikukonsidera ng Kamara ang pagsibak sa neophyte lawmakers upang matapos na ang problema ng institusyon kay Barzaga.

Mariing itinanggi ni Atty. Ade Fajardo, ang abogado at tagapagsalita ni dating House Speaker Martin Romualdez, ang mga ulat na nag-uugnay sa dating Speaker sa umano’y pagbili ng isang ari-arian gamit ang pamilya Discaya bilang “front.”

Sa isang pulong balitaan, inihayag ni Senate Blue Ribbon Committee Chairperson Sen. Panfilo “Ping” Lacson na mayroong testigo na makapagpapatunay sa ugnayan ni Romualdez at Discaya.

Ito umano ang may-ari ng property na binili ni Romualdez kung saan ang mga Discaya ang nagsilbing “front” sa transaksyon.

Ayon kay Atty. Fajardo, walang batayan at walang kinalaman sa nasabing transaksyon si Romualdez at wala rin itong ugnayan sa pamilya Discaya.

Sinabi ni Atty. Fajardo na hindi pa umano personal na nakaharap o nakatagpo ni Romualdez ang mga Discaya at nakilala lamang ang pangalan ng mga ito sa pamamagitan ng mga ulat sa media.

Iginiit ng kampo ni Romualdez na walang basehan ang mga paratang dahil, batay na rin sa sinumpaang testimonya ni Curlee Discaya noong September 2025 sa Kamara, malinaw na walang direktang transaksyon at anumang uri ng pakikipag-ugnayan ang mga Discaya kay Romualdez.

Ayon pa kay Discaya, ang pangalan ng Speaker ay ginagamit lamang ng ibang tao o “name-dropping,” at hindi niya ito personal na nakita o naka-transaksyon.

Tiniyak naman ng kampo ni Romualdez na igagalang ang institutional process at umaasang malilinis ang kaniyang pangalan sa anumang imbestigasyon nang may patas at nakabatay sa mga ebidensya.—ulat mula kay Geli Mendez (Patrol 30)