Magsasagawa ng special elections ang Commission on Elections sa ikalawang distrito ng Antipolo para punan ang nabakanteng pwesto ng yumaong si Rep. Romeo Acop.
Sinabi ni Comelec Chairman George Erwin Garcia na target na idaos ang manual na special elections sa darating na Marso.
Maglalaan ang poll body ng 98 million pesos na pondo para sa eleksyon sa distrito, na may hindi bababa sa tatlongdaang libo ang rehistradong botante.
Nabatid na pumanaw si Acop noong December 20 dahil sa atake sa puso.
Tiniyak ng National Food Authority-Bicol ang sapat na suplay ng bigas upang matugunan ang mga pangangailangan sa panahon ng kalamidad, kabilang na ang posibleng pag-aalburoto ng Bulkang Mayon.
Ayon kay NFA Assistant Regional Manager Julie Llenaresas, may kasalukuyang imbentaryo ang NFA na umaabot sa 104,237 na sako ng bigas na nakaimbak sa kanilang mga bodega sa iba’t ibang bahagi ng rehiyon.
Bukod pa rito, inaasahan ding madaragdagan pa ang kanilang suplay dahil sa patuloy na isinasagawang paggiling ng palay na ngayo’y nasa 764,870 na sako pa.
Kaugnay nito, aktibo ring nakikipag-ugnayan ang NFA Bicol sa iba’t ibang relief agencies upang magkaroon ng koordinasyon sa pagtugon sa mga pangangailangan ng mga mamamayan, partikular sa posibleng pagtaas ng demand kung magkaroon ng mas malawakang epekto ang pag-aalburoto ng bulkan.
Ipina-subpoena na ng Senate Blue Ribbon Committee ang mga tinaguriang “Cabral files” bago ipagpatuloy ang imbestigasyon sa sinasabing anomalya sa flood control projects.
Ayon kay Senate President Pro Tempore Panfilo “Ping” Lacson, layon ng subpoena na makuha ang mga dokumento mula sa Department of Public Works and Highways, na iniwan anya ng yumaong Undersecretary Maria Catalina Cabral.
Sinasabing naglalaman ang mga dokumento ni Cabral ng alokasyon ng pondo sa National Expenditure Program.
Giit ni Senador Lacson, mas pabor ang Senado na makuha ang orihinal at opisyal na kopya ng mga dokumento mula sa kagawaran, sa halip na umasa sa sinasabing kopya nito mula kay Rep. Leandro Leviste.
Samantala, magpapatuloy na muli ang Blue Ribbon hearing sa Enero a-disi-nwebe kung saan imbitado rin ang nabanggit na kongresista.
Target ng Metropolitan Manila Development Authority ang limang minutong responde sa mga insidente ng banggaan sa kalsada habang sampung minuto para sa clearing operations.
Ito ang binigyang-diin ni MMDA General Manager Usec. Nicolas D. Torre III sa kaniyang courtesy visit kay Pateros Mayor Gerald German.
Aniya, layon ng mas mabilis na responde na mabawasan ang pagsisikip ng trapiko at agad na matugunan ang mga insidenteng nagdudulot ng abala sa mga motorista.
Inilahad din ni Usec. Torre ang iba pang plano ng MMDA upang paigtingin ang operasyon ng ahensya, kabilang ang mas mahigpit na koordinasyon sa mga lokal na pamahalaan.
Hinimok ng pamilya ng mga nawawalang sabungero ang pangunahing akusado na si Charlie ‘Atong’ Ang na sumuko na sa mga otoridad.
Sa gitna pa rin ito ng paghahanap ng mga otoridad kay Ang makaraang maglabas ng arrest warrant ang Sta. Cruz, Laguna Regional Trial Court Branch 26 laban sa negosyante at pagkaka-aresto sa labing-pitong kapwa nito akusado.
Naniniwala si Charlene Lasco, kapatid ng isa sa mga nawawalang sabungero at e-sabong master agent na si Ricardo ‘Jon Jon’ Lasco, na magbibigay-daan ang pagsuko ni Ang upang matahimik ang lahat.
Ito rin anya ang paraan upang malinis ng gaming tycoon ang pangalan nito sa mga akusasyon laban sa kanya.
Samantala, naniniwala si Lasco na may iba pang pinaniniwalaang sangkot sa pagkawala ng mga sabungero na nakalusot mula sa unang bugso ng mandamiento de aresto na inisyu ng korte.
Nagbabala ang Department of Social Welfare and Development sa publiko na huwag maniwala sa mga mensaheng nangangakong mapapabilis ang pagproseso ng kahilingan para sa cash aid sa pamamagitan ng sinasabing backer o insider.
Sa mga post nito sa mga social media platform, mariing itinanggi ng DSWD na ang mga komunikasyon o transaksyon kaugnay ng kanilang mga programa ng tulong ay ginagawa sa pamamagitan ng private messages o personal na mga account.
Kalakip ng post ang isang screenshot ng mensahe kung saan inalok ng nagpadala na isama ang tatanggap sa listahan ng mga benepisyaryo ng DSWD sa pamamagitan ng isang kamag-anak na sinasabing nagtatrabaho sa ahensya.
Dahil dito, pinaalalahanan din ng DSWD ang publiko na huwag madaling malinlang ng mga pangakong may backer umano sa loob ng DSWD para lamang mas mabilis na makakuha ng tulong.
Hinikayat din ng ahensya ang mga Pilipino na maging mapanuri sa ganitong mga alok at tiyaking kumukuha lamang ng tama at mapagkakatiwalaang impormasyon mula sa mga lehitimong sources at official pages ng DSWD.
Bahagyang bumaba ang bilang ng mga pamilyang Pilipino na nakaranas ng gutom noong Nobyembre 2025.
Batay sa survey ng Social Weather Stations (SWS), nasa 20.1% ng mga pamilya ang nakaranas ng involuntary hunger, mas mababa kumpara sa 22% noong Setyembre 2025.
Naitala ang pinakamaraming gutom sa Mindanao na nasa 26.7%, sinundan ng Metro Manila at Visayas na parehong 20.3%, at Luzon na 16.7%.
Samantala, 51% ng mga pamilya ang nag-rate sa kanilang sarili bilang mahirap, habang 40% naman ang nagsabing food-poor sila.
Isinagawa ang fourth quarter 2025 survey mula November 24 hanggang 30 sa pamamagitan ng face-to-face interviews sa isanlibo dalawangdaang respondents sa bansa.
Isiniwalat ni Senate President Pro Tempore Panfilo “Ping” Lacson na nakakuha siya ng impormasyon na ginamit ni dating House Speaker Martin Romualdez ang mga “discaya” para makabili ng house and lot sa isang sikat na subdivision sa Makati.
Ayon kay Senador Lacson, nakatakda siyang makipag-usap sa unang may-ari ng bahay bago ang naka-schedule na Blue Ribbon Committee hearing sa Lunes, Enero a-disi-nwebe.
Kung anuman anyang impormasyon ang makukuha rito, magsisilbi itong mitsa para simulan ang imbestigasyon sa posibleng koneksyon ni Romualdez sa mga discaya.
Ipinunto ng senador na kung nagtiwala si Romualdez sa mga discaya para ipangalan dito ang biniling property, ibig sabihin malalim ang kanilang ugnayan.
Samantala, hinimok naman ni Senador Lacson si Senador Imee Marcos na dumalo sa paparating na pagdinig kung may maiaambag itong ebidensya laban sa kanyang pinsan.
Patuloy na pinaghahandaan ng Pamahalaang Panlalawigan ng Albay ang “worst case scenario” sakaling tumindi pa ang pag-aalburoto ng Bulkang Mayon.
Ayon kay Albay Governor Noel Rosal, pinag-aaralan na nilang palawakin ang “permanent danger zone” sa paligid ng bulkan kung saan pagbabawalan ang mga residente na manirahan.
Nasa labin-tatlong libong pamilya anya ang posibleng maapektuhan sa oras na ideklarang permanente na ang pito hanggang walong kilometro ng danger zone.
Samantala, nilinaw naman ni Governor Rosal na hanggat nananatili sa alert level 3 ang Mayon, na “precaution” pa lamang, ay hindi pa nangangailangan ng malawakang evacuation.
Kadalasang rason sa pagre-resign ay hindi magandang pamamahala ng isang kumpanya sa mga empleyado, minsan nais lamang magkaroon ng career growth ang isang tao.
Pero tila kakaiba ang naging rason ng babaeng nasa kwentong ito nang magdesisyon siyang mag-resign sa kaniyang tinatrabahuan dahil napahiya raw siya.
Kung ilang katrabaho ba ang inimbita ng babae? Eto.
Isang babae mula sa China ang ikinasal at dahil gusto niyang ibahagi ang mahalagang moment ng kaniyang buhay sa mga taong malapit sa kaniya, inimbitahan niya lahat ng kaniyang katrabaho para dumalo sa kaniyang kasal.
Aniya, kaibigan niya raw kasi lahat ng mga empleyado sa kaniyang pinagtatrabahuan pero iilan lang ang kaniyang maituturing na close friends, at para hindi raw sumama ang loob ng iba niyang katrabaho na hindi maiimbitahan, napagdesisyunan niyang imbitahan na lang lahat ng kaniyang katrabaho, na aabot sa 70 katao.
Pero nang dumating ang araw ng kaniyang kasal, nalaman niyang mentor niya lang ang dumating at wala ang 69 na iba.
Dahil dito, anim na mesa raw ang bakante at maraming pagkain ang nasayang dahil hindi nakain.
Napahiya rin daw siya sa harap ng kaniyang mga kamag-anak dahil marami siyang inimbita pero hindi naman lahat dumalo.
At para itago ang kaniyang kahihiyan sa trabaho, pinili niya na lang mag-resign.
Kaya naman nagpadala siya ng condolences card sa kaniyang pinagtatrabahuan na may nakasulat na “I’m sorry for your loss” at ipinaalam na magre-resign na siya.
Ikaw, anong gagawin mo kung isa lang sa mga inimbita mo ang dumalo sa imbitasyong ipinadala mo? Icu-cut off mo ba sila o tatanggapin mo na lang at mag-move forward?