NATIONAL NEWS

Tinawag ni Lanao del Sur 1st District Rep. Zia Alonto Adiong na “napakalabo,” at “shapeless o walang hugis,” ang umano’y nakaambang impeachment complaint laban kay Pangulong Ferdinand Marcos Jr.

Binigyang-diin ng mambabatas na wala pa namang naisusumiteng reklamo at hindi rin batid kung sinu-sino ang mga sinasabing maghahain nito.

Tinukoy rin ni Cong. Adiong ang isang kapwa mambabatas na nagsiwalat sa media tungkol sa umano’y tangkang pag-endorso ng isang reklamong impeachment laban sa pangulo.

Bagama’t hindi pinangalanan ni Cong. Adiong ang naturang mambabatas, matatandaang sinabi ni House Senior Deputy Minority Leader at Caloocan City 2nd District Rep. Edgar Erice na may ipinaalam sa kanya na ang reklamo ay kasalukuyang “binubuo” at isa umanong “kolektibong hakbang ng grupong maka–VP Sara.”—sa panulat ni Daniela De Guzman

Pinuna ng Department of Justice si Atty. Gabriel Villareal, abogado ng gambling tycoon na si Atong Ang, dahil sa payo nito na huwag sumuko ang kanyang kliyente.

Tinawag ito ng DOJ na “ill-advised at unethical” na taliwas sa utos ng korte.

Pinaalalahanan ni Justice Spokesperson Polo Martinez si Atty. Villareal na may epekto ang kanyang mga pahayag, kapwa sa kanya bilang abogado at sa kanyang kliyente, na inaaakusahan ng pagkakasangkot sa pagkawala ng dose-dosenang mga sabungero.

Dagdag pa niya, may mga parusa ang Revised Penal Code laban sa pagtutol o paghadlang sa pagpapatupad ng mga warrant.

Para kay Martinez, inilalagay ng naturang payo sa alanganing posisyon ang abogado at si Ang, dahil maaari rin, anyang, managot si Atty. Villareal sa ilalim ng Code of Professional Responsibility and Accountability.—sa panulat ni Daniela De Guzman

Naniniwala si Julie “Dondon” Patidongan, whistleblower sa kaso ng mga nawawalang sabungero, na malaki ang posibilidad na nakalabas na ng bansa si Charlie “Atong” Ang.

Ayon pa kay Patidongan, naniniwala siya na mula pa noong Disyembre ng nakaraang taon ay nakalabas ng Pilipinas si Ang.

Marami rin, anyang lugar sa bansa na maaaring pagtaguan ni Ang, nang hindi nanghihingi ng tulong sa mga retirado at kasalukuyang opisyal.

Matatandaang nahaharap si Ang sa 15 counts ng kidnapping at serious illegal detention, pati na rin ang apat na bilang ng kidnapping with homicide.—sa panulat ni Daniela De Guzman

Binatikos ni Ombudsman Jesus Crispin “Boying” Remulla ang Senado, partikular na ang pamumuno ni Senador Ronald “Bato” Dela Rosa, kaugnay sa anya’y pagpapabaya nito sa imbestigasyon sa kaso ng mga nawawalang sabungero.

Ayon kay Ombudsman Remulla, sa mga naunang imbestigasyon na pinangunahan ni Senador Dela Rosa, tila binigyan ng walang seryosong atensyon ang kaso, na para bang isang laro lamang, bago ito inilipat sa Criminal Investigation and Detection Group at National Bureau of Investigation para sa mas malalim na pagsusuri.

Inamin din ng Tanodbayan na inabot ng mahigit 43 months ang paghahanda ng gobyerno upang maisagawa ang arrest warrant laban sa gaming tycoon na si Charlie “Atong” Ang.

Binigyang diin pa ng opisyal na tila walang gustong gumalaw at ginawang laro-laro lang sa Senado ang imbestigasyon.

Dagdag pa nito, habang tumatagal, dumarami ang mga pamilya na hindi na lumalapit sa kanila dahil, anya, sa mga pribadong kasunduan o aregluhan.

Sa kasalukuyan, dalawang korte na ang naglabas ng arrest warrants laban kay Ang para sa kasong non-bailable kidnapping with homicide at serious illegal detention.—sa panulat ni Daniela De Guzman

Naniniwala si Senate Deputy Majority Leader JV Ejercito na dapat nang ipaubaya sa Office of the Ombudsman ang imbestigasyon sa maanomalyaing flood control projects.

Ito ay matapos matanong ang senador kung dadalo ito sa gaganaping pagdinig ng Senate Blue Ribbon Committee sa Lunes, Enero 19.

Ayon kay Senador Ejercito, dapat na ring ipasa ng Independent Commission for Infrastructure ang lahat ng impormasyon na nakalap nito kaugnay sa sinasabing katiwalian, upang magtuloy-tuloy, anya, ang pagsasampa ng kaso ng Ombudsman.—sa panulat ni Daniela De Guzman

Kinumpirma ng Embahada ng Pilipinas sa Korea na walang pilipinong nadamay o nasaktan sa aksidente ng isang bus sa Seoul, South Korea.

Sa isang social media advisory, sinabi ng embahada na nakipag-ugnayan ito sa Seo-Dae-Mun Police Station kaugnay ng insidente.

Ayon sa ulat, dalawa sa labing-tatlong nasugatang indibidwal ang nasa malubhang kondisyon.

Kabilang sa mga nasugatan ang drayber ng bus at dalawang pedestrian.

Kaugnay nito, pinayuhan naman ng Philippine Embassy ang Filipino community sa Korea na manatiling mapagmatyag at mag-ingat, lalo na habang bumabyahe.—sa panulat ni Daniela De Guzman

Kinumpirma ni Public Works Secretary Vince Dizon na may mga maling coordinates na na-upload sa Transparency Portal ng Department of Public Works and Highways noong Agosto, bago pa siya maupo sa posisyon.

Ayon kay Secretary Dizon, ang mga error na ito ay nagdulot ng hindi tamang impormasyon sa ilang flood control projects, kaya’t nagpasya ang DPWH na i-review at muling i-validate ang mga proyekto ng flood control sa buong bansa.

Sinabi pa ng kalihim na hindi lang distorted datas ang naging epekto ng maling coordinate, kundi nagdulot din ito ng maling impormasyon sa ilang proyekto.

Sa ngayon, nire-review na ng DPWH ang higit sa tatlumpung libo na kasalukuyang proyekto upang tiyakin na tama ang kanilang mga lokasyon.

Nakadiskubre niya, anya, ang mga maling impormasyon noong nakaraang taon habang tinitingnan ang mga flagged projects sa “Sumbong sa Pangulo” website.

Tinukoy din niya na posibleng may mga tao sa loob ng ahensya na nagmanipula ng sistema.

Pumalo na sa mahigit dalawang libong indibidwal ang apektado ng Bagyong Ada.

Ayon sa Department of Social Welfare and Development, karamihan sa mga apektado ay mula sa Bicol at Caraga Region.

Kaugnay nito, wala pang pamilyang inilikas dahil sa Bagyong Ada.

Nakapaghahatid na rin ang DSWD ng halos kalahating milyong pisong halaga ng paunang tulong sa mga apektado ng bagyo.

Tuloy-tuloy rin anila ang pre-positioning ng mga family food packs at non-food items sa mga lugar na posibleng daanan ng bagyo.

Tiniyak ng Malakanyang na mananatiling saklaw ng imbestigasyon ang sinumang dating opisyal ng gobyerno na dawit sa anomalya sa flood control projects, kahit pa sila ay nagbitaw na sa pwesto o nakalabas na ng bansa.

Sa palace press briefing, sinabi ni Palace Press Officer Claire Castro na walang naging espesyal na kasunduan sa pagitan ni Pangulong Ferdinand Marcos Jr. at ng mga nagbitaw na opisyal, ngunit malinaw ang direktiba ng pangulo na imbestigahan ang lahat ng posibleng sangkot sa anomalya.

Sinabi pa ni Usec. Castro na kung may ebidensyang mag-uugnay sa mga dating opisyal, kabilang ang mga cabinet secretaries at undersecretaries na nag-resign, hindi ligtas ang mga ito sa pananagutan at maaari pa ring masampahan ng kaso.

Nabatid na hindi pa rin nakakabalik ng bansa si dating Public Works Secretary Manny Bonoan, na tinanggal sa pwesto dahil sa isyu ng flood control corruption.

Mayroon nang libre, ligtas, at maaasahang Wi-Fi sa labing pitong EDSA Busway stations matapos itong ilunsad ng Department of Transportation at Department of Information and Communications Technology.

Ayon kay Transportation Secretary Giovanni Lopez, makatutulong ang libreng internet sa online transactions, access sa government services, at cashless payment gamit ang e-wallets nang hindi gumagamit ng mobile data.

Tiniyak naman ni DICT Secretary Henry Aguda na palalawakin pa ang free Wi-Fi sa iba pang pasilidad ng transportasyon.

Nilinaw ng DOTr at DICT na ligtas ang serbisyo at may labing dalawang oras na session kada araw ang naturang libreng Wi-Fi.