NATIONAL NEWS

Iniha-halintulad ni Senate President Pro-Tempore Panfilo “Ping” Lacson sa isang “planned robbery” ang paggamit ng mga allocables sa pambansang budget na umano’y konektado sa mga kickback.

Ayon kay Senador Lacson, ang mga opisyal ng pamahalaan na nagbigay ng anya’y “wishlist” ng mga proyekto upang kumita, o kickback mula sa allocable funds ay parang nagnanakaw na rin sa bansa.

Iginiit ni SP Pro-Tempore na walang papel ang mga mambabatas sa pagtukoy ng mga proyekto sa National Expenditure Program (NEP), na inihahanda ng ehekutibo.

Dapat din anyang limitado lamang ang tungkulin ng Kongreso sa pagsusumite ng mga amendments matapos maipasa ang NEP.

Nabatid na nitong mga nakaraang linggo, lumitaw ang tinatawag na “Cabral Files,” kung saan sinasabing naglalaman ng mga detalyadong listahan ng mga proyekto sa bawat legislative district at ang kanilang mga itinalagang proponents.

Kumpiyansa ang Kamara na pagbibigyan ng Korte Suprema ang kanilang motion for reconsideration sa impeachment case laban kay Vice President Sara Duterte.

Ayon kay Tingog Party-List Rep. Jude Acidre, hinihintay ng Kamara ang desisyon ng Kataas-taasang Hukuman sa nakabinbing mosyon at inaasahang magpapatuloy ang proseso ng impeachment kung saan ito itinigil.

Ang pahayag ni Rep. Acidre ay kasunod ng pagtitiyak ni Senate President Vicente Sotto III na kikilos ang Senado forthwith o agad-agad sa anumang impeachment case na ipapadala sa mataas na kapulungan ng Kongreso.

Samantala, naghahanda ang mababang kapulungan ng Kongreso na ma-adopt ng mga bagong patakaran sa impeachment para sa 20th Congress na nakaayon sa pinakahuling jurisprudence ng Korte Suprema.

Malámig ang political analyst na si Professor Dennis Coronacion kung gagana ba ang isinusulong na Anti-Dynasty Bill sa Kamara.

Ayon kay Prof. Coronacion, kahirapan at ang pagiging “personality-oriented” ng pulitika sa Pilipinas ang dahilan kung bakit anya nananatili sa kapangyarihan ang mga pamilyang nasa pulitika.

Sa panayam ng DWIZ, naniniwala si Coronacion na, dahil sa ugali ng mga Pilipino pagdating sa pagboto, nagagawa nilang haluin ang pulitika at negosyo.

Dagdag pa ni Coronacion, nakadepende rin ang pagbuwag ng mga political dynasties sa panukalang maipapasa sa Kamara.

“Walang batayan at hindi makatwiran”

Ito ang binigyang-diin ni House Speaker Faustino “Bojie” Dy the Third laban sa impeachment complaint na inihain laban kay Pangulong Ferdinand Marcos Jr.

Ayon kay Speaker Dy, malinaw na ginagampanan ni Pangulong Marcos ang mandatong ipinagkatiwala sa kanya ng taumbayan, alinsunod rin sa batas.

Para kay Dy, hindi biro ang usapin ng impeachment dahil ito ay seryoso, mabigat, at dapat masusi ang pagproseso.

Sinabi ni Dy na sa ilalim ng Saligang Batas, responsibilidad ng Mababang Kapulungan na tanggapin at suriin ang mga reklamo at ito ay dapat isinasagawa nang may lubos na pag-iingat at paggalang sa Konstitusyon.

Aniya, hindi ito dapat ginagamit sa pamumulitika na nagreresulta lamang ng pagkakawatak-watak sa institusyon.

Tiniyak naman ni Dy na sa muling pagbubukas ng sesyon, nakatutok ang Kamara sa pagpasa ng mga makabuluhang batas na tunay na mag-aangat sa buhay ng sambayanang Pilipino.

Nagbabala si Marikina City Mayor Maan Teodoro sa mga kawani ng city government laban sa hindi magalang na pakikitungo sa publiko, kasunod ng mga reklamong natanggap mula sa mga nagbabayad ng buwis at nagre-renew ng business permit sa City Hall.

Ayon sa alkalde, hindi katanggap-tanggap ang mga ulat na may ilang taxpayers at aplikante ng business permit ang nasungitan at nagkaroon ng hindi magandang karanasan sa transaksyon, lalo na ngayong dagsa ang mga nagbabayad ng real property tax at nag-aasikaso ng permit sa simula ng taon.

Inihayag ni Mayor Maan ang kanyang pagkadismaya at iginiit na hindi nito sinasalamin ang serbisyong ipinagmamalaki ng lungsod.

Narito ang tinig ni Mayor Teodoro

Paalala ng alkalde, dapat manaig sa lahat ng oras ang galang, respeto, at malasakit, anuman ang bigat ng trabaho o haba ng pila, bilang bahagi ng core value ng lungsod na Alagang Marikina.

Hahawakan ng 4th Division ng Sandiganbayan ang kasong graft ni dating Senador Ramon “Bong” Revilla, habang ang 3rd Division naman ang tututok sa kasong malversation laban sa kanya.

Kasunod ito ng isinagawang raffle ng korte sa Quezon City.

Ito ang isinampa ng Office of the Ombudsman noong nakaraang linggo hinggil sa kasong malversation sa pamamagitan ng pamemeke umano ng mga dokumento at katiwalian.

Kaugnay ito ng umano’y P92.8-milyong “ghost” flood control project sa Pandi, Bulacan.

Kabilang sa mga kinasuhan sina dating Department of Public Works and Highways (DPWH) Bulacan Assistant District Engineer Brice Hernandez, Engr. Jaypee Mendoza, Engr. Arjay Domasig, Engr. Emelita Juat, DPWH Bulacan First District Engineering Office finance section chief Juanito Mendoza, at DPWH Bulacan First District Engineering Office cashier Christina Pineda.

Sa ngayon, wala pang detalye kung kailan sisimulan ng korte ang pagdinig sa kaso ni dating Senator Revilla.

Mahigit 100 unconsolidated public utility vehicle (PUV) operators at drivers ang sumugod sa tanggapan ng Department of Transportation (DOTr) sa Connecticut, EDSA, upang ipanawagan ang pagbabalik ng limang taong prangkisa para sa pampublikong transportasyon at ipaglaban ang karapatang ma-renew ang kanilang mga dokumento.

Ayon kay Ka Mody Floranda, presidente ng PISTON, patuloy nilang tinututulan ang PUV Modernization Program (PUVMP) dahil nagdulot ito ng malawakang pagkawala ng kabuhayan, na nakaapekto sa halos 500,000 driver at operator sa nakalipas na sampung taon.

Bagama’t una nang sinabi ni dating Transportation Secretary Vince Dizon na hindi angkop ang programa, ipinagtataka ng mga operator at driver ang pagpapatuloy nito.

Aniya, maraming malalaking korporasyon ang nakikinabang habang ang mga maliliit na operator ang nagbabayad, kaya’t tila higit na nakatuon ang programa sa malalaking negosyo kaysa sa mga mamamayan.

Dahil dito, naglunsad ang mga operator ng caravan mula DOTr patungong central office ng Land Transportation Franchising and Regulatory Board (LTFRB) upang ipaglaban ang karapatan nilang ma-renew ang kanilang prangkisa at kaukulang dokumento.

Iginiit ng kontratistang si Pacifico “Curlee” Discaya na hindi siya “front” ni dating House Speaker Ferdinand Martin Romualdez hinggil sa umano’y binilí nitong high end property sa isang posh subdivision sa Makati City.

Ito ayón kay Discaya ay dahil pinalalaki lamang ang isyu na kulang na kulang naman sa mga ebidensya. Muling sinabi ni Discaya na isang beses lamang niyang nakita ng personal si Congressman Romuladez at hindi nya ito nakausap man lang.

Gayunman ..ipinabatid ni Discaya na handa nyang akuin ang sinasabing bahay na ipasasama nya sa listahan ng mga asset na binubusisi ng Anti Money Laundering Council. “Kahit hindi pumayag ang aking mga abogado sa restitution, personal kong papayagan na magamit ang property sa Makati para sa restitution at maibalik ito sa publiko”, pahayag pa ni Discaya.

Binigyang diin pa ni Discaya na maituturing itong pinakamalaking restitution dahil tiyak anyang multi bilyong piso ang halaga ng naturang property. “Sigurado akong ito ang magiging pinakamalaking restitution kahit pagsamahin pa ang kina DPWH Undersecretary Roberto Bernardo, dating DPWH Bulacan District Engineer Henry Alcantara, dating DPWH Regional Director Gerard Opulencia at contractor Sally Santos dahil tiyak na multi bilyon ang halaga ng mga ari Arian sa nasabing Makati Village”, dagdag pa ni Discaya.

Samantala ..inihayag ni Senate Protempore Panfilo Ping Lacson na kakausapin nya ang dating may ari ng nasabing property bago ang muling pagbubukas ng imbestigasyon ng Senate Blue Ribbon Committee bukas, January 19 ..matapos nyang ibunyag ang nakuhang impormasyon na ginamit umano ng dating House Speaker ang pamilya Discaya bilang conduit sa pagbili ng naturang ari arian.