NATIONAL NEWS

Ipinatupad ni US President Donald Trump ang 90-araw na pagpapahinto sa taas-taripa sa karamihan ng mga bansa bukod sa China.

Sinabi ni President Trump na tanging mga bansang hindi tumutol sa naunang ipinataw na taripa ng Amerika ang makakakuha ng 10% US tariff hanggang sa Hulyo, kabilang na rito ang Pilipinas, na dating may 17% tariff rate.

Bukod sa Pilipinas, nakatanggap din ng mas pinababang taripa ang Vietnam, Thailand, Indonesia, Malaysia, Cambodia, at iba pa.

Habang ang China naman, mula sa dating 34% na tariff rate ay itinaas ito sa 125%.

Kasabay nito, binigyang-diin ni Pres. Trump ang mga katagang “When you punch at the United States of America, President Trump is going to punch back harder”.—sa panulat ni John Riz Calata

Trabaho, healthcare at food security ang nangungunang plataporma na hinahanap ng mga botanteng Pilipino sa mga kandidatong tumatakbo sa 2025 midterm elections.

Ito ay batay sa pinakahuling survey na inilabas ng social weather stations, kung saan 92% ng mga respondents ang nagsabing iboboto nila ang mga kandidatong may adbokasiyang may kaugnayan sa pagkakaroon ng trabaho; na sinundan naman ng healthcare at food security, na may 91%; at 90% naman para sa pantay na access sa edukasyon.

89% naman ng mga respondent ang sumusuporta sa mga kandidatong nagtataguyod ng mga karapatan ng mga manggagawa at kapakanan ng mga OFW; at 86% naman ang may gusto sa mga kandidatong target mabawasan ang gutom at kahirapan.

Isinagawa ng SWS ang nasabing survey noong March 15 hanggang 20 na kinabilangan ng 1,800 respondents.—sa panulat ni John Riz Calata

Planong magsagawa ng Department of the Interior and Local Government (DILG) ng pagsusuri sa mga gusali sa Metro Manila at mga karatig-lugar upang matiyak ang katatagan ng mga ito dahil sa pinangangambahang pagtama ng  “The Big One”.

Ayon kay DILG Undersecretary for Local Government Marlo Iringan, gagamitin ng ahensya ang “Harmonized Infrastructure Audit” Tool upang magkaroon ng pambansang pamantayan sa pagsusuri ng katatagan ng mga public infrastructures laban sa malakas na lindol.

Sinabi ni Usec. Iringan na unang gagamitin ang audit tool sa Metro Manila, Central Luzon, at Southern Tagalog.

Nakikipag-ugnayan na rin aniya sila sa mga educational institution upang makatulong ang mga fourth at fifth year Engineering Student sa gagawing assessment.

Batay sa PHIVOLCS, may tinatayang mahigit 3,000 istruktura ang nakatayo sa kahabaan ng West Valley Fault.—sa panulat ni John Riz Calata

 Kumpiyansa si Senador Sherwin Gatchalian na mas iigting pa ang kampanya o crackdown sa smuggling ng electronic vape.

Ito ay matapos mangako ni Pangulong Ferdinand Marcos Jr. na susuportahan ng pamahalaan ang kampanya laban sa smuggling ng vapes.

Ayon kay Senador Gatchalian, umaasa sila na mapapanagot na ang mga sangkot sa smuggling ng vapes at mabubuwag na ang mga operasyon nito dahil determinado ang pangulo na buwagin at lutasin ang problema ukol sa nasabing produkto.

Binigyang-diin ng mambabatas na ang smuggling ay hindi lang nakakapinsala sa ekonomiya ng bansa kundi nakaaapekto rin sa kapakanan at kalusugan  ng mga consumer.—sa panulat ni John Riz Calata

Kinondena ng Malakanyang ang paggamit ng mga bastos na pahayag ng ilang mga kandidato sa pangangampanya.

Ayon kay Palace Press Officer Claire Castro, sinabi ni Pangulong Ferdinand Marcos Jr na “unacceptable” o hindi katanggap-tanggap ang ganitong naratibo dahil dapat mapanatili ng bawat kandidato ang pagsulong ng respeto, integridad, at katotohanan habang nagbibigay ng pangako sa mga botante.

Dagdag pa ni Usec. Castro, hindi dapat gawing idolo ang mga ganitong klaseng pulitiko at higit sa lahat ay hindi dapat pamarisan.

Bilin ng Palasyo, kailangan palaging manaig ang respeto ng mga kandidatong nagnanais na maging lider ng bansa.

Samantala, sinabi ni Usec. Castro na masaya ang pangulo sa mabilis na pag-aksyon ng COMELEC sa mga mapambastos na biro ng mga kandidato.—sa panulat ni John Riz Calata

Sinisikap na ng defense team ni dating Pangulong Rodrigo Duterte na mas mapabilis ang confirmation proceedings ng dating pangulo sa International Criminal Court.

Ito ayon sa Lead Counsel ni Duterte na si Nicholas Kaufman, ay bilang tugon sa mga katanungang ibinigay sa kanila ng Pre-Trial Chamber 1.

Kabilang sa mga katanungan na ito ay kung may batayan ba si Duterte o alibi upang maibasura ang kaso laban sa kanya?; Nais ba nito na magsagawa ng imbestigasyon bago ang confirmation hearing?; Gusto bang magpresinta ng ebidensya ng dating pangulo?; May ihaharap ba itong mga testigo?

Gayundin, kung nais ba ng dating pangulo na magpadala ng ‘written testimonial evidence’ sa confirmation hearing, at kung oo, anong format ang gagamitin nito?; at kung may mga libro, dokumento, o litrato ba si duterte na maaaring inspeksyunin ng prosekusyon at maaaring gamiting ebidensya alinsunod sa rule 78 ng “the rules”?

Bagamat sinabi ni Atty. Kaufman na hindi pa sila nakapagsususmite ng detalyadong sagot sa mga katanungan ng ICC, tiniyak naman nito na nangangalap na sila ng mga ebidensya upang makatugon sa mga katanungan ng korte.—sa panulat ni John Riz Calata

Pinag-aaralan na ng International Criminal Court ang posibleng pag-aresto sa iba pang mga personalidad na sinasabing sangkot sa war on drug campaign sa ilalim ng administrasyon ni dating Pangulong Rodrigo Duterte.

Ayon kay ICC Spokesman Fadi El Abdallah, patuloy ang imbestigasyon at paghahanap ng sapat na ebidensya ng ICC Prosecutor, upang maisumite ito sa mga hukom, na magdedesisyon kung maglalabas ba ang pandaigdigang korte ng arrest warrant sa iba pang mga sangkot sa drug war ng Duterte administration.

Kaugnay nito, binigyang-diin ni Dr. Abdallah na mahalagang aspeto ang “confidentiality” upang maging matagumpay ang imbestigasyon kung kaya hindi muna aniya siya magbibigay ng iba pang mga detalye ukol sa nasabing usapin.

Bagama’t walang pinangalan ang tagapagsalita ng ICC, naunang sinabi ni Senador Ronald ‘Bato” Dela Rosa na inaasahan na niyang kabilang siya sa iba pang aarestuhin ng ICC, dahil isa siya sa mga mga naging Hepe ng Philippine National Police at nanguna sa implementasyon ng giyera kontra droga noong administrasyong Duterte.—sa panulat ni John Riz Calata

Aalisin na ang travel ban ng 17 Overseas Filipino Workers sa Qatar matapos maaaresto ng Qatari authorities dahil nagsagawa ng illegal na kilos protesta sa nabanggit na bansa.

Ito mismo ang kinumpirma ni Migrant Workers Secretary Hans Leo Cacdac kasabay ng pagbasura sa kaso ng mga OFW.

Ayon sa Kalihim, ilang bansa na ang naka-monitor sa aktibidad ng Filipino communities partikular ang kanilang ginagawang mass actions kaya nanawagan ito sa mga OFW na mag-ingat at sundin ang mga patakaran ng kanilang host country.

Una nang tiniyak ng Qatari government na hindi na papatawan ng multa at mananatili pa rin ang mga Pilipino sa kanilang trabaho.