NATIONAL NEWS

Dadalo si Vice President Sara Duterte sa preliminary investigation ng Department of Justice dahil sa reklamong inihain laban sa kanya ng National Bureau of Investigation.

Ito’y matapos matanggap ni VP Sara ang summons mula sa office of the prosecutor dahil sa reklamo ng NBI hinggil pahayag nitong ipapatay si Pangulong Ferdinand Marcos Junior, First Lady Liza Araneta-Marcos, at House Speaker Martin Romualdez.

Ayon kay VP Sara, haharap siya sa DOJ pero tinatapos lang ng kanyang kampo ang counter-affidavit.

Una nang sinabi ni Prosecutor General Richard Fadullon na isasagawa ang preliminary investigation Mayo 9 hanggang 16.

Nakatakdang simulan ngayong buwan ang pagrerepaso sa minimum wage rates sa ilang rehiyon.

Ito ang kinumpirma ni Labor Bureau of Local Employment Head Assistant Secretary Patrick Patriwirawan Junior alinsunod sa utos ni Pangulong Ferdinand Marcos Junior na itaas ang sahod ng mga manggagawang Pilipino.

Ayon kay Patriwirawan, handa ang Department of Labor and Employment na ipatupad ang dalawandaang pisong legislated wage hike sakali maipapasa ito ng kongreso at aprubahan ni PBBM.

Patuloy naman anya nakikipagdiyalogo ang kagawaran sa iba’t ibang sektor kasama ang labor sector and employer sector bago maipatupad ang taas-sahod ng mga obrero.

Naniniwala ang Department of Justice na may mabigat na ebidensiya ang prosecutors na nagsampa ng kasong human trafficking si dating Presidential Spokesman Harry Roque.

Ayon kay Justice Secretary Jesus Crispin Remulla, marapat na sagutin ni Roque ang kasong kinakaharap niya.

Nilinaw pa ng Kalihim na maaaring masagot lamang ito kapag nakauwi na ang dating presidential spokesman.

Magugunitang kabilang si Roque na sinampahan ng human trafficking dahil iniuugnay ito sa operasyon ng iligal na Philippine Offshore Gaming Operator sa Pampanga.

Pinaigting ng Kalibo Municipal Police Station ang imbestigasyon sa pagpatay sa batikang mamamahayag at dating Alkalde ng Kalibo, Aklan na si Juan “Johnny” Dayang.

Sa panayam ng DWIZ, sinabi ni Aklan Police Provincial Office Spokesperson Captain Aubrey Ayon, na patuloy nilang tinututukan ang backtracking at forward tracking ng mga available CCTVs sa lugar upang matukoy ang pagkakakilanlan ng gunman.

Gayunman, tiniyak ni Captain Ayon na makakamit ang hustisya sa biktima lalo na’t tinitignan ng pulisya ang iba’t ibang anggulo at motibo sa krimen.

Bukas naman ang pnp sa anumang report o impormasyon na makatutulong sa agarang pagresolba sa kaso.  —sa panulat ni Mark Terrence Molave

Ikinabahala ni Senate Committee on basic Education Chairman Sherwin Gatchalian ang mataas bilang ng mga ‘functional illiterate’ sa bansa o ang hirap umunawa ng kanilang nababasa.

Ipinunto ng Senador na ang nasabing ‘functional illiterate’ na mga mag-aaral ay nakapagtapos ng pag-aaral sa high school.

Maliban dito, naitala din noong nakaraang taon ang 5.8 million na mga Pilipino ang tinatawag naman na “Basic illiterates” o ito yung mga taong “No read, no write” o hindi nakakapagbasa, hindi nakakasulat at hindi rin nakakapagbilang.

Dahil dito, kinalampag ni Senador Gatchalian ang education sector sa bansa na agad tugunan ang nasabing problema partikular ang department of education na maging proactive sa pagtiyak na walang estudyante ang magtatapos sa pag-aaral na hindi marunong magbasa, magsulat at umunawa.

Nakahanda si Vice President Sara Duterte na kasuhan ang mga sinasabing may kasalanan sa pag-aresto sa kaniyang amang si dating Pangulong Rodrigo Duterte.

Ayon sa Bise Presidente, dapat managot ang sino mang may pakana sa tinawag niyang pagdukot sa kaniyang ama.

Gusto anya ng kanilang pamilya na makita na may makasuhan at managot sa pagdadala sa kaniyang ama sa detention facility ng International Criminal Court.

Kaugnay nito, pinasalamatan naman ng pangalawang pangulo si Senador Imee Marcos sa pagbubukas ng mga usapin sa kung ano ang mga maling nagawa kaugnay sa pag-aresto sa dating pangulo.

Matatandaang, inaresto nuong marso ang dating pangulo at kasalukuyang nakakulong sa The Hague, Netherlands sa kasong crimes against humanity dahil sa sinasabing madugong war on drug ng kanyang administrasyon.—sa panulat ni Kat Gonzales

Handang harapin nina Philippine National Police Chief Gen. Rommel Marbil at Criminal Investigation and Detection Group Director Maj. Gen. Nicolas Torre III, ang anumang kaso na isasampa sa kanila kaugnay sa pag-aresto kay dating Pangulong Rodrigo Duterte.

Ayon kay PNP Spokesperson Brig. Gen. Jean Fajardo, naniniwala ang dalawang opisyal wala silang nilabag na batas sa pag-aresto sa dating pangulo.

Binigyan-diin pa ni Brig. Gen. Fajardo na naninindigan ang mga ito na nasa mandato ng kani-kanilang opisina ang ginawang paghuli.

Una rito, hiniling ni Senador Imee Marcos sa Office of the Ombudsman na imbestigahan ang dalawang PNP officials at ilan pang opisyal ng pamahalaan kaugnay sa sinasabing mga paglabag sa pag-aresto at paglipat kay Duterte sa detention facility ng International Criminal Court sa The Hague, Netherlands.—sa panulat ni Kat Gonzales

Pumalo na sa 13 ang bilang ng mga naiulat na namatay sa kabuuang 35 insidente ng election-related violence.

Ito ayon sa Commission on Elections kasunod ng muling pagpapaalala ni COMELEC Chairman George Erwin Garcia sa mahigpit na pagbabantay ng mga otoridad sa mga lugar na itinuturing na election hotspots upang maiwasan pa ang pagdami ng naitatalang insidente.

Una nang naiulat na may pinakamataas na kaso ng election-related incidents sa Cordillera at Bangsamoro regions na may 11 at 8 kaso.

Samantala, bagama’t nakababahala ang mga nasabing karahasan, nilinaw naman ng Commissioner na maituturing pa rin na mas mapayapa ang kasalukuyang election period kung ikukumpara ito sa nagdaang halalan.

Kaugnay nito, siniguro ng poll body na puspusan ang kanilang pakikipagtulungan sa PNP, AFP at iba pang ahensya upang masiguro ang maayos at mapayapang halalan.—sa panulat ni Jasper Barleta

Pasok sa top 50 beaches sa buong mundo ang dalawang beach sa Pilipinas.

Pumangalawa sa nasabing listahan ang Entalula Beach na matatagpuan sa El Nido, Palawan, mula sa fourth-place ranking nito noong 2024.

Umangat din ang pwesto ng Bon Bon beach sa Romblon Island, na nasa 38 na ngayon.

Napabilang naman sa top 5 beaches ngayong 2025 ang Cala Goloritze sa Italy, Bang Bao Beach sa Thailand, Fteri Beach sa Greece, at PK 9 beach sa French Polynesia.