NATIONAL NEWS

Tinawag na fake news ng Malakanyang ang kumakalat na memorandum na sinasabing galing sa Office of the President na nagrerekomendang patalsikin sa pwesto si House Speaker Martin Romualdez.

Pinalalabas din na pirmado ni Executive Secretary Lucas Bersamin ang nasabing memorandum.

Kaugnay nito, sinabi ni Palace Press Officer Usec. Claire Castro, na hindi na dapat pagka-abalahan ang nasabing ulat dahil malinaw na mayroong nagpapakalat nito na layong siraan ang pamahalaan at ilang mga opsiyal.

Panawagan naman ni Usec. Castro, huwag basta maniwala sa mga nakikitang dokumento, lalo na sa social media dahil uso ngayon ang fake news. —ulat mula kay Gilbert Perdez (Patrol 13)

Tiniyak ng Malacañang na may ikakasa nang pag-uusap para sa gagawin na ring pagdadala ng supply ng 20 pesos kada kilo ng bigas sa Luzon at Mindanao.

Sa gitna ito ng nakatakdang launching ng 20-pesos per kilo rice program ngayong araw, Mayo 1, sa Cebu.

Ayon kay Palace Press Officer Atty. Claire Castro, kasama rin sa dapat na plantsahin ay kung paano ang magiging sistema sa pagbalikat ng subsidiya ukol dito sa hanay ng mga nasa lokal na pamahalaan.

Ito ang dahilan, dagdag ni Usec. Castro, kung bakit sa gawi ng visayas unang dadalhin ang 20-peso per kilo rice, gayung sa nasabing area unang nakuha ng national government ang kooperasyon hinggil sa magiging ambag ng mga LGU sa subsidy.

Naging mabilis aniya ang pagsang-ayon ng mga opisyales sa Visayas na sila ay tutulong para maisakatuparan ang murang bigas para sa taumbayan.—ulat mula kay Gilbert Perdez (Patrol 13)

Tiniyak ng Department of Agriculture na hindi mahahaluan ng pulitika ang bentahan ng bente pesos kada kilo ng bigas sa Visayas.

Kasunod ito ng pambabatikos ni Vice President Sara Duterte na istratehiya lamang ng pamahalaan ang 20 pesos rice project para manalo sa halalan ang mga kandidatong nasa ilalim ng alyansa para sa bagong Pilipinas.

Sa panayam ng DWIZ, sinabi ni Agriculture Assistant Secretary Genevieve Velicaria – Guevarra, na mahigpit na ipinababawal ng commission on elections na gamitin ng mga kandidato ang 20 pesos na bigas para sa pangangampanya.

Pagbabawalan na ang mga Airport Security personnels na hawakan ang passports ng mga pasaherong papasok ng terminal airlines.

Ito ay ayon mismo sa pamunuan ng Ninoy Aquino International Airport matapos ang insidente ng “punit passport” Na naitala kamakailan lamang.

Bunsod nito, aasahan ng mga pasahero ang mas pinaigting na seguridad kung saan ipapakita na lamang sa checking at verification ang passport, na hawak mismo ng may-ari.

Magugunitang nitong Abril 15 ay may isang pasaherong hindi napahintulutang lumipad patungong Bali, Indonesia dahil sa maliit na punit na nakita sa kanyang passport.

Nagpaalala naman ang Department of Transportation sa mga pasahero na tiyakin ang validity at kondisyon ng kanilang mga pasaporte bago bumiyahe. —sa panulat ni Jasper Barleta

Aabot sa mahigit isang libo tatlong daan ang sinibak ng Philippine National Police sa puwesto dahil sa misconduct sa nakalipas na taon, ayon sa law enforcement agency.

Ayon sa PNP, naresolbo ang nasa tatlong libo anim na raang kaso laban sa police officers mula 2024 ng Abril hanggang Abril 2025.

Nagresulta ang mga kaso sa 172 demotions, 1,456 suspensions, at iba pang parusa gaya ng salary forfeitures, restrictions at reprimands.

Pagbibigay diin pa ng law enforcement agency na ang mga hakbang na ito ay sumasalamin sa sinumpaang pangako ng PNP na paigtingin ang disiplina ng ahensya at pagtataguyod ng tiwala ng mga tao.—sa panulat ni Jasper Barleta

Nagsama-sama sa isang press conference ang puwersa ng mga pangunahing grupo ng mga manggagawa sa ilalim ng National Wage Coalition upang i-anunsyo ang kanilang nakatakdang Labor Day Mobilization.

Lalahok sa naturang protesta ang Bukluran ng Manggagawang Pilpino (BMP), Kilusang Mayo Uno (KMU). Nagkaisa! Labor Coalition, at ang Trade Union Congress of the Philippines (TUCP).

Layon ng nasabing mobilization na kalampagin ang pamahalaan na kaagad na isabatas ang 200 pesos dagdag sahod para sa mga manggagawa sa ilalim ng mga pribadong sektor sa buong bansa.—sa panulat ni Jasper Barleta

Siniguro ng Commission on Elections na hindi sila nakompromiso kasunod ng pagkakaaresto sa sinasabing chinese spy malapit sa kanilang tanggapan.

Tiniyak mismo ni COMELEC Chariman George Erwin Garcia na walang dapat ikabahala sa pangyayari dahil wala silang election data sa main office.

Aniya pa, nagsagawa ang poll body ng pagsusuri, kung saan wala namang lumabas na anomalyang nangyari sa kanilang sistema.

Magugunitang nagpahayag ng pagkabahala ang national bureau of investifation kamakailan lamang hinggil sa pagkakahuli sa dayuhan, ilang linggo bago ang midterm elections 2025.

Siniguro naman ng nbi na patuloy silang makikipag-ugnayan sa COMELEC sakaling may matuklasan pa sa isinasagawang imbestigasyon.—sa panulat ni Jasper Barleta

64% ng mga Pilipino ang naniniwalang may mga problemang umiiral sa demokrasya sa Pilipinas.

Ito ayon sa pinakabagong survey ng Social Weather Stations (SWS) kung saan lumalabas na 37% sa mga Pilipino ang naniniwalang mayroong “major problems” Sa demokrasya habang 27% naman ang nagsasabing mayroong “minor problem” dito.

Kaugnay ng nasabing survey, kinumpirma ni Ateneo School of Government Dean Philip Arnold Tuaño na 67% sa mga Pilipino ang naniniwalang kurapsyon at fake news o disinformation ang pinakapinag-uugatan ng problema sa demokrasya.

Dagdag pa rito, ang iba pang isyung may kaugnayan sa problema sa demokrasya ay ang burukrasya (22%), nepotismo (21%), kawalan ng kredibilidad ng mga institusyon (18%), red tape (10%), kawalan ng transparency (10%), kawalan ng pagpapahalaga sa karapatang pantao (5%), at kawalan ng partisipasyon sa paggawa ng desisyon (1%).—sa panulat ni Jasper Barleta

Napabilang ang silvanas ng Pilipinas sa  ‘50 best cookies in the world.’

Batay sa listahan ng TasteAtlas, nasa ika-29 na pwesto ang naturang Filipino frozen cookie sandwich, na may 4.0 na rating.

Inilarawan ang silvanas bilang bersyon ng isang traditional Filipino dessert na sans rival.

Hinirang naman na ‘best cookie in the world’ ang alfajores ng Argentina.