NATIONAL NEWS

Tumaas pa sa 4.1% ang unemployment rate sa bansa nitong abril kumpara sa 3.9% noong Marso batay sa pinaka-bagong datos na inilabas ng Philippine Statistics Authority.

Ang unemployment data ay katumbas ng mahigit dalawang milyong Pilipinong walang trabaho mula sa 1.9 na milyon na naitala noong Marso.

Gayunman, mababa ito kumpara sa 4.3% o 2.16 million unemployed noon namang Enero.

Patuloy namang tumataas ang bilang ng mga Pilipinong nagkakaroon ng trabaho at oportunidad sa bansa makaraang umabot sa 95.9% ang employment rate noon ding abril, katumbas ng 48.67 milyong Pilipinong may trabaho.

Bahagya itong mas mataas kumpara sa 48.02 milyong Pilipino na may trabaho noong Marso at 48.35 milyon sa kaparehong buwan noong isang taon.

Samantala, umakyat din sa 14.6% ang underemployment rate noong Abril kumpara sa 13.4% noong Marso.

Nilinaw ng Malakanyang na magpapatuloy ang performance evaluation ni Pangulong Ferdinand Marcos, Jr. Sa ilang miyembro ng gabinete kahit naglabas na siya ng desisyon sa courtesy resignation ng mga ito.

Ayon kay Palace Press Officer at Communications Usec. Claire Castro na mananatiling “on notice” o babantayan ang cabinet officials kung sila ba ay nakasusunod sa mandatong ipatupad ang mga polisiya ng pangulo.

Hindi aniya natatapos sa pagtanggap at pagtanggi ng pangulo sa mga isinilbing courtesy resignation ang papel ng gabinete, dahil mas malaki ang responsibilidad ngayon ng mga piniling manatili sa pwesto.

Binigyan-diin pa ni Usec. Castro, hindi rin pwedeng maging kampante ang mga opisyal na hindi tinanggap ang resignation, dahil inaasahan ngayo ang mas ramdam na presensya ng kanilang mga programa at tanggapan.

Nananatiling problema sa maraming Pilipino ang mataas na presyo ng pagkain.

Batay sa pinakahuling datos ng Philippine Statistics Authority, patuloy ang pagtaas ng presyo ng karne; isda; seafoods; dairy products at itlog.

Ito anila ang dahilan kung bakit nananatili sa 0.7% ang food inflation nuong Mayo.

Dahil mataas na na bilihin, umaasa ang publiko na maipatutupad ang umento sa sahod ng mga manggagawa.

Gayunman, binigyan-diin ng ilan na malaki rin ang posibilidad na tumaas ang mga bilihin, oras maisabatas ang 200 pesos wage hike. —sa panulat ni Kat Gonzales

Binigyan-diin ni Senate Committee on Labor Chairman Joel Villanueva na posibleng mauwi lamang sa veto ng pangulo kung i-a-adapt ng Senado ang inaprubahang 200 pesos minimum wage hike bill ng Kamara.

Ayon sa Senador, kailangang timbangin ang lahat ng aspeto dahil posibleng isinusulong ng Kamara ang nasabing umento sa  sahod para tuluyang ma-veto ng presidente at hindi rin matuloy ang isandaang pisong wage increase ng Senado.

Kaugnay nito, nais ni Senador Villanueva, makita ang basehan ng pagaaral ng kamara sa ipinasa na wage hike lalo na sa aspeto kung kakayanin ba ito ng mga employers.

Samantala, ipinunto sa naman ng Senador na mas madali at mas praktikal kung ang isandaang piso na dagdag sahod sa pribadong sektor na ipinasa ng Senado ang aaprubahan sa  Bicameral Conference Committee.a

Binigyan-diin ni Senate Minority Leader Koko Pimentel na paglabag sa konstitusyon kapag basta na lamang ibinasura ng senado ang impeachment case laban kay Vice President Sara Duterte.

Sa harap ng ipinapaikot ni Senator Ronald Bato Dela Rosa na resolusyon na nagsusulong na ibasura ng senado ang impeachment case laban sa bise presidente

Giit ni Senador Pimentel malinaw na sinasabi sa konstitusyon na “trial by the senate shall forthwith proceed’.

Kung meron man anyang impeached na impeachable official,  kailangan marinig ng taong bayan ano ba ang mga ebidensiya mayroon ang kanilang mga representante o ang mga kongresista na nag impeach kay VP Sara.

Dagdag pa ng Senador, kailangan ding bigyan ng pagkakataon ang na impeached na opisyal na depensahan at linisin ang pangalan niya kaya dapat magsagawa ng paglilitis ang Senado sa impeachment case laban sa Bise Presidente.

Paliwanag pa ng opisyal, kung susundin ang rules of court, dapat na aksyunan at talakayin ang resolusyon o’ anumang  mosyon na ibasura ang impeachment case ng bise president kapag nag-convene na ang senado bilang impeachment court.—sa panulat ni Kat Gonzales

Masusing pinag-aaralan ni Pangulong Ferdinand Marcos Jr. ang panukalang batas na naglalayong magpatupad ng 200 pesos across-the-board na umento sa sahod ng mga manggagawang Pilipino.

Ayon kay Palace Press Officer Claire Castro, layunin ng pangulo na matiyak na ang anumang hakbang kaugnay sa dagdag-sahod ay tunay na makatutulong sa mga manggagawa.

Gayunman, kailangang isaalang-alang din ang magiging epekto nito sa kabuuang kalagayan ng ekonomiya.

Binigyan-diin ni Usec. Castro na patuloy na tinitimbang ng pangulo ang naturang usapin upang mapanatili ang balanse sa pagitan ng pagbibigay ng nararapat na benepisyo sa mga manggagawa at ang pagpapanatili ng katatagan ng ekonomiya, pati na rin ang kapakanan ng ibat ibang sektor ng lipunan.

Kabilang sa isasaalang alang ay ang magiging opinyon ng wage board na nilikha rin ng kongreso upang magtakda ng nararapat na sahod sa bawat rehiyon.

Isinusulong sa Senado ni Senate President Pro Tempore Jinggoy Ejercito Estrada  ang panukalang batas na naglalayong tanggalin na ang mandatory senior high school level sa K to 12 program

Ayon kay  Senador Estrada, ito’y upang gawing mas makabuluhan ang sistema na basic education sa bansa.

Bigo naman ayang maisakatuparan ang dapat sanay pakinabang na matatamo sa senior high school

Binigyan-diin pa ng Senador na samu’t saring batikos at pagtutol mula sa iba’t ibang sektor ang kanilang narinig nang ipatupad ang repormang ito sa edukasyon.

Sa loob ng labingdalawang taon, mula nang maisabatas ito, hindi pa rin anya ganap na nakakamit ang layunin  ng  Republic Act no. 10533 o ang Enhanced Basic Education Act of 2013.

Giit pa ng Senador, hindi natin pwedeng hayaan na patuloy na maging pasanin ng mga estudyante at kanilang mga magulang ang dagday na oras at gastos ng senior high school.

Sa inihaing Senate Bill no. 3001 ni estrada, amyendahan ang  RA 10533 kung saan iminumungkahi ang isang taong edukasyon sa kindergarten, anim na taon sa elementarya at apat na taon sa secondary education.

Posibleng makaapekto sa mga investor ang panukalang 200 pesos na taas-sahod.

Ayon kay Labor Secretary Bienvenido Laguesma, maaaring hindi na matuloy ang ilang investor o kaya naman hindi na palawigin ng ibang namumuhunan sa bansa ang kanilang negosyo dahil mahahati sa kongreso at regional wage boards ang desisyon ng pagtatakda ng sahod.

Sa ngayon, pasado na sa ikatlo at huling pagbasa sa kamara ang dalawandaang pisong dagdag-sahod sa mga manggagawang kumikita ng minimum kada araw.

Kaugnay nito, hindi pa nakikita ng Department of Labor and Employment ang Bicameral version ng minimum wage bill kaya’t hindi pa nila matiyak kung ano ang magiging tungkulin ng kagawaran at Reginal Tripartite Wages and Productivity Board.

Nagpaalala ang World Health Organization na higit isang milyong tao na ang nagkakasakit araw-araw sanhi ng hindi ligtas na pagkain.

Kaugnay nito, binigyang-diin ng WHO ang matinding pangangailangan ng koordinasyon at scientific-based actions mula sa pamahalaan, negosyo, akademya, at mga mamimili upang maiwasan ang sakit mula sa pagkain.

Giit pa ni WHO Expert Simone Raszl, responsable ang lahat ng indibidwal sa food safety, dahil anya kung hindi ligtas ang pagkain, hindi ito tunay na pagkain.

Iginiit ng isa sa mga bumuo ng 1987 Constitution na hindi maaaring i-dismiss ng Senado ang impeachment case laban kay Vice President Sara Duterte nang walang paglilitis.

Ayon kay Constitutionalist Atty. Christian Monson, labag sa charter ang pagbabasura sa impeachment ng bise presidente.

Tungkulin anya ng Senado na ipagpatuloy ang paglilitis sa ilalim ng konstitusyon kahit pa magkaroon ng resolusyon hinggil dito.

Nabatid na inamin ni Senador Ronald Dela Rosa na nagmula sa kaniyang tanggapan ang kumalat na draft resolution na naglalayong ibasura ang impeachment case laban kay VP Sara.