NATIONAL NEWS

Kinumpirma ng Department of Justice na nakikipag-ugnayan na sila sa International Criminal Court para matiyak na ligtas ang mga testigo sa kaso ni dating Pangulong Rodrigo Duterte.

Ayon kay Justice Secretary Jesus Crispin Remulla, opisyal na silang nakipag-usap sa ICC at sinabing nakipag-ugnayan na ang korte sa kanilang witness protection program para masigurong ligtas ang mga testigo.

Bukod dito, sinabi ni Sec. Remulla na magbibigay rin ng tulong-pinansyal ang pamahalaan para sa mga witness upang makabyahe patungong The Hague, Netherlands kung saan gagawin ang paglilitis.

Ikinagulat naman ng isa sa mga abugado ng EJK victims na si Atty. Kristina Conti ang aksyon ng DOJ na tulungan ang mga testigo sa kaso ng dating pangulo.

Nakatulong aniya ito upang magkaroon ng lakas ng loob ang iba pang mga witness na natatakot tumestigo sa harap ng ICC.

Magkakaloob ng physical at mental health services ang Department of Health para sa mga pilipinong umuwi matapos maipit sa tensyon sa Middle East.

Ayon sa DOH, nakipag-ugnayan na sila sa Department of Migrant Workers para sa koordinasyon.

Magugunitang balik-bansa na nitong Martes ang nasa tatlumpu’t isang unang batch ng ofws  mula Israel, Jordan, Palestine, at Qatar.

Bukod sa assessment, nauna na ring sinabi na makakatanggap ang mga naturang na-repatriate na Pilipino ng 150,000 pesos mula sa DMW at OWWA, bukod pa rito ang kaloob na transportation allowance pauwi sa kanilang mga lalawigan.

May iba pang hakbang na nakalatag ang pamahalaan sakaling lumala ang sitwasyon sa gitnang silangan, partikular na ang giyera sa pagitan ng Iran at Israel.

Sinabi ni Department of Energy OIC Usec. Sharon Garin na ang nakikita nilang worst-case scenario ay kung tuluyan nang maubos ang supply ng langis sa bansa na posibleng magtulak sa pagsirit ng presyo nito.

Kaya naman ginagawa aniya ngayon ng pamahalaan ang lahat ng paghahanda, kabilang na ang paghahanap ng iba pang supplier tulad ng Estados Unidos, Canada, Brazil at iba pang mga bansa na nagpo-produce ng langis.

Sa ngayon ay hindi pa nakikita ni acting Secretary Garin ang pangangailangan ng pagdedeklara ng pamahalaan ng state of emergency dahil mayroon pa namang buffer stocks ng langis ang mga kumpanya ng langis na magkakasya sa loob ng isang buwan.

Bumaba rin aniya sa 69-dollar per barrel ang krudo at umaasang magpapatuloy ito sa mga susunod na araw sa gitna ng idineklarang ceasefire ng mga nasasangkot na bansa.

Nagbukas ang Department of Education ng dalawampung libong bagong teaching positions para sa school year 2025–2026.

Ito ang kinumpirma mismo ni Education Secretary Juan Edgardo “Sonny” Angara na anya ay alinsunod sa direktiba ni Pangulong Ferdinand Marcos Jr. na paigtingin ang sektor ng edukasyon sa bansa; kung saan ang bawat mag-aaral ay gagabayan ng mga kwalipikadong guro.

Kabilang sa mga posisyon ang teacher one, special needs education teacher, at special science teacher one, na ipapamahagi sa lahat ng rehiyon batay sa datos ng enrollment at kakulangan sa guro.

Bahagi ang hakbang ng mas pinalawak na education reform, kabilang ang pagtaas ng teaching allowance, mas magaan na workload, at mas malinaw na mga panuntunan sa promotion ng mga guro.

—sa panulat ni Jasper Barleta

Nagbabala ang Malakanyang laban sa banta ng disinformation habang papalapit ang State of the Nation Address ni Pangulong Ferdinand Marcos Jr.

Ayon kay Palace Press Officer Usec. Claire Castro, hindi inaalis ng palasyo ang posibilidad na gamitin ang AI sa pagpapalaganap ng fake news at siraan ang gobyerno.

Kaya naman muling hiningi ni Usec. Castro ang tulong ng social media at mainstream media para labanan ang fake news.

—ulat mula kay Gilbert Perdez (Patrol 13)

“Dire, sad, …and frustrating.”

Ganito inilarawan ni Vice President Sara Duterte ang kasalukuyang estado ng Pilipinas.

Ginawa ng bise presidente ang pahayag sa isang press conference kung saan sinabi rin niya na hindi siya dadalo sa State of the Nation Address ni Pangulong Ferdinand Marcos Jr. sa July 28.

Gayunman, naniniwala pa rin si VP Sara na mayroon pa ring pag-asa ang Pilipinas.

Samantala, dumipensa si VP Sara sa pagpuna ng Malakanyang sa kanyang mga byahe abroad.

—sa panulat ni John Riz Calata

Tikom pa rin si Vice President Sara Duterte kaugnay sa kanyang plano para sa 2028 elections.

Ayon kay VP Sara, sa ngayon, hindi pa niya masasagot kung tatakbo ba siya sa susunod na national elections dahil baka ipapatay aniya siya.

Ipinunto rin ng bise presidente ang itinuturing niyang ‘political attacks’ ng kasalukuyang administrasyon laban sa kanya.

—sa panulat ni John Riz Calata

Mariing itinanggi ni Vice President Sara Duterte ang patutsada ng malakanyang na nagsasabing siya ay pro-China.

Binigyan-diin ni VP Sara na hindi siya pro-China o pro kung kaninuman, maliban sa Pilipinas.

Nabatid na bumwelta ang Palasyo sa pagkwestiyon ni VP Sara sa foreign policy ng Pilipinas matapos payagang makapasok ni Pangulong Ferdinand Marcos Jr. sa bansa ang mga missile ng Estados Unidos.

Ayon sa Malakanyang, inaasahan na nila ang ganitong pahayag ng bise presidente dahil pro-China anila ang pamilya nito.

Paliwanag ni VP Sara, sa halip na pumanig sa isang malakas na bansa ay mas mainam na tumayo sa sariling paa ang pilipinas at harapin ang kalabang bansa.

—sa panulat ni John Riz Calata