NATIONAL NEWS

Namemeligrong mangamote ang budget ng mga manggagawa, partikular ng mga minimum wage earner, bunsod ng napakalaking oil price increase.

Ito ang babala ng Federation of Free Workers (FFW) at Sentro ng mga Nagkakaisa at Progresibong Manggagawa (SENTRO) makaraang ipatupad ng mga kumpanya ng langis ang utay-utay na malaking dagdag sa presyo, simula kahapon.

Ayon kay FFW President Sonny Matula, ang nagmamahal na krudo ang magiging mitsa ng pagtaas ng pasahe at mas mahal na basic goods na labis na mararamdaman ng mga low-income worker.

Ito na anya ang pagkakataon upang pagtuunan ng pansin ang pagsasabatas sa panukalang 100 hanggang 200 peso legislated wage hike.

Hinimok naman ni SENTRO Secretary General Josua Mata ang Marcos administration na ikunsidera na ang pagpapatupad ng regulatory intervention upang maiwasan ang hindi makatuwirang oil price hike.

Kabilang na anya nakikita nilang solusyon ang pagrepaso sa oil deregulation law o suspensyon ng koleksyon ng excise tax sa langis.

Handa na ang mga mga incumbent at incoming senators na magsumite ng panukalang batas at resolusyon  sa nalalapit na pagpasok ng 20th Congress sa June 30.

Ayon kay Senador Sherwin Gatchalian, una niyang isusumite ang resolusyon na nagsusulong na magsagawa ng pagdinig ang senado para masuri ang epekto sa ating ekonomiya ng hidwaan sa pagitan ng Israel at Iran.

Sina Senator Juan Miguel Zubiri at Risa Hontiveros naman ay nangako na uunahin ang panukalang dagdag sahod para sa mga manggagawa sa pribadong sektor.

Muli namang ihahain ni Senate President Pro-Tempore Jinggoy Estrada ang panukalang batas na nagsusulong na alisin na ang senior high school.

Habang pagtutuunan naman ng pansin ni Senator Vicente Sotto III ang panukalang batas na magpapahusay sa lagay ng ating ekonomiya tulad ng Freedom of Information Bill.

Samantala, unan namang isusulong ni incoming Senator Panfilo Lacson ang panukalang batas na naglalayong i-integrate ang iba’t ibang uri ng ayuda sa ilalim ng Pantawid Pamilyang Pilipino (4Ps) program.

Magugunita namang karaniwang nag-uunahan ang mga senador para maging una sa listahan ang maisusumite nilang panukalang batas.

—sa panulat ni Mark Terrence Molave

Tiniyak ng Department of Agriculture na makakatanggap ng fuel subsidy ang mga kwalipikadong magsasaka at mangingisda sa gitna ng pagtaas ng presyo ng langis.

Ayon kay Agriculture Secretary Francisco Tiu Laurel Jr., may nakalaang pondo ngayong taon para sa fuel assistance, partikular sa mga mangingisda.

Sa ilalim ng 2025 general appropriations act, 150-milyon pesos ang inilaan ng DA para sa programa, tig-P75 milyon para sa mga magsasaka at mangingisda.

Paliwanag ni D.A. Assistant Secretary at Spokesperson Arnel De Mesa, mailalabas ang pondo kapag umabot sa 80-dollars sa kada bariles ang presyo ng Dubai crude oil at may certification mula sa Department of Energy.

Dagdag ng Kalihim, hindi pa agad mararamdaman ang epekto ng krisis sa supply ng pataba, na posibleng magsimula sa huling bahagi ng taon.

Bunsod nito, tiniyak din ng D.A. na sapat ang suplay ng fertilizers hanggang Disyembre.

Tatanggap na rin ng mental health concerns ang unified 911 emergency system ng Department of the Interior and Local Government.

Ayon kay DILG Secretary Jonvic Remulla, maliban sa mga tawag kaugnay ng emergency at krimen, magkakaroon ng isang desk sa 911 command center na tututok sa mental health intervention.

Ide-deploy anya rito ang counselors na sinanay sa National Center for Mental Health para magbigay ng psychosocial support sa mga hihingi ng saklolo.

Sinabi rin ng Kalihim na mula sa 50,000 na natatanggap na tawag ng sistema kada araw, nasa dalawang porsyento rito ang may kaugnayan sa mental health concerns.

Matatandaang tinatarget ng DILG ang full nationwide rollout ng unified 911 emergency system sa Agosto o Setyembre ngayong taon.

Nilinaw ng Department of Transportation na kabilang sa mga makatatanggap ng fuel subsidy ang mga Public Utility Vehicle Operators at Drivers na wala pang kooperatiba dahil sa kabiguang makapag-consolidate ng prangkisa sa ilalim ng  PUV Modernization Program.

Sa pahayag na inilabas ng DOTR, sinabi nito na nais ng pamahalaan na maging inklusibo ang ipatutupad na programa lalo na at mararamdaman ng buong sektor ng transportasyon ang epekto ng pagtaas ng presyo ng krudo.

Una nang sinabi ng ahensya na plano nitong makapamahagi ng fuel subsidy sa mga PUV operators at drivers sa lalong madaling panahon dahil sa pagsirit ng presyo ng langis bunsod ng bakbakan sa pagitan ng israel at iran.

Walang magaganap na pagtataas sa presyo ng mga de-latang sardinas.

Ito ang tiniyak ni Palace Press Officer at Presidential Communications Office Usec. Atty. Claire Castro, kasunod ng pakikipag-ugnayan nila sa Department of Trade and Industry.

Sa press briefing sa Malacañang, sinabi ni Usec. Castro na pinulong ni DTI Secretary Maria Cristina Roque ang mga gumagawa ng sardinas sa bansa at nagkasundo na hindi nila itataas ang presyo ng de-latang sardinas.

Base aniya sa napagkasunduan, mananatili sa 21 pesos ang SRP sa bawat 155 grams na lata ng sardinas.

Ayon kay Usec. Castro, nitong isang buwan ay may report ang Philippine Statistics Authority na may ilang bilihin na bumababa ang presyo at hindi lahat ay nagmamahal.

Walang kapangyarihan ang Department of Energy para suspindihin ang value-added tax at excise tax sa mga produktong petrolyo.

Ito ang naging tugon ni DOE Officer-in-Charge Sharon Garin kasunod ng mga panawagan na ipatigil ang fuel tax sa gitna ng banta ng panibagong big-time oil price hike dulot ng tensyon sa Middle East.

Sinabi ni acting Secretary Garin na hindi basta-basta maaaring suspindihin ang buwis sa produktong petrolyo dahil ito ay itinakda ng umiiral na batas. Aniya, tanging kongreso lamang ang may kapangyarihang umaksyon dito, kung kinakailangang amyendahan o i-abolish ang kasalukuyang batas.

Nabatid na ipinanawagan ng ilang grupo ang pagsuspinde sa excise tax at VAT sa petrolyo upang mapagaan ang epekto ng inaasahang taas-presyo ng langis.

Inaasahan ng Department of Energy na magiging ‘minimal’ lamang ang epekto sa Pilipinas ng nagaganap na tensyon sa pagitan ng Israel at Iran.

Ayon kay DOE Officer-in-Charge Sharon Garin, hindi gaanong magiging nakaaalarma para sa ekonomiya ng Pilipinas ang hidwaan ng Israel at Iran.

Batay aniya kay Economy, Planning, and Development Sec. Arsenio Balisacan, nagsisimula na ring bumaba ang presyo ng mga produktong petrolyo.

Kaugnay nito, tiniyak ni acting Secretary Garin na patuloy silang naka-monitor sa tensyon sa Middle East.

Ipinag-utos ni Pangulong Ferdinand Marcos Jr. sa Philippine National Police na huwag lamang tutukan ang malalaking sindikato, kundi pati ang mga maliliit na pusher sa kanto.

Ayon kay Pangulong Marcos, mahalagang mawala ang presensya ng bentahan ng droga sa mga pamayanan upang mas maging panatag ang loob ng publiko.

Aniya, kapag may nagbebenta ng droga sa tabi ng eskwelahan o bahay, hindi ligtas ang bawat isa kaya dapat habulin kahit ang maliliit na tulak.

Binanggit din ni Pangulong Marcos na kabilang sa bagong istratehiya ng pnp ang pagpapataas ng police visibility at mabilisang operasyon sa mga lugar na may ulat ng bentahan ng ipinagbabawal na droga.