NATIONAL NEWS

Nagsumite na ng counter-affidavit si Vice President Sara Duterte sa Office of the Ombudsman bilang tugon sa mga alegasyong may kinalaman sa sinasabing maling paggamit ng confidential funds ng Office of the Vice President at Department of Education.

Inihain mismo ni Attorney Micheal Poa ang counter-affidavit ni VP Sara bago ang deadline na itinakda ng Ombudsman.

Bahagi ng naturang hakbang ang isinasagawang preliminary investigation ng Ombudsman, kasunod ng reklamo mula sa House Committee on Good Government and Public Accountability.

Ito ay may kinalaman sa sinasabing maling paggamit sa P612.5-M sa confidential funds, kung saan P500-M ay galing sa OVP at P112.5-M sa DepEd.

Kabilang sa respondent sina VP Duterte, mga opisyal ng OVP at DepEd, tulad nina Edward Fajarda, Gina Acosta, Nolasco Mempin, at iba pa.

Bukod dito, ang mga alegasyon laban sa kanila ay kinabibilangan ng plunder, technical malversation, falsification of public documents, perjury, bribery, at betrayal of public trust. – sa panulat ni Jenn Patrolla

Mahigit siyam na libong laptop ang naipamahagi na sa mga guro sa mga pampublikong paaralan sa buong bansa.

Ito’y bilang bahagi ng layunin ng Department of Education na gawing mas moderno at makabago ang pagkatuto sa silid-aralan sa pamamagitan ng 2025 DepEd Computerization Program.

Ayon sa DepEd, may kabuuang 9,466 laptops ang naipamahagi sa teaching personnel habang 3,255 laptop naman sa non-teaching staff.

Naibigay na rin ng kagawaran ang mahigit anim na libong Smart TV packages sa iba’t ibang paaralan.

Sa pamamagitan ng early procurement activities, naipagkaloob nang maaga ang halos 80 percent ng kabuuang badyet para sa DCP ngayong 2025.  - sa panulat ni Jenn Patrolla

 Kinondena ng Kamara ang pahayag ni Vice President Sara Duterte na political persecution ang kanyang impeachment trial upang tanggalin siya bilang presidential contender sa 2028.

Ayon kay House Assistant Majority Leader Zia Alonto Adiong, ang pahayag ni bise presidente ay paglihis lamang sa tunay na isyu ng pananagutan, lalo na sa mga kinahaharap niyang kaso, tulad ng maling paggamit ng confidential funds, pagbabanta kay pangulong bongbong marcos at pagkakasangkot sa state-sanctioned killings.

Hindi anya ito lisensya para gumawa ng krimen o lumabag sa saligang batas lalo’t ang popularidad ay hindi immunity.

Iginiit ni Adiong na malisyoso rin ang paratang na walang ebidensya at walang sumisira sa dignidad ng Office of the Vice President dahil insulto ito sa bawat miyembro ng mababang kapulungan.

Una nang inakusahan ni Duterte ang mga mambabatas na tumanggap umano ng pera kapalit ng pagsuporta sa impeachment complaint laban sa kanya.

Pinalagan ng ilang mambabatas sa Kamara ang paratang ni Vice President Sara Duterte na nagpapa-photo Ops lamang si Pangulong Ferdinand Marcos jr. nang saksihan nito ang pagsira sa mga nasabat na iligal na droga.

Ayon kay Assistant Majority Leader Zia Alonto Adiong, bahagi ng transparency at pagbibigay ulat sa bayan ukol sa accomplishment ng pamahalaan ang mga litrato ng pangulo.

Ipinapakita rin aniya nito ang dedikasyon ng mga opisyal ng pamahalaan sa mga programa at polisiya na ipinatutupad ng gobyerno.

Pinuri rin ni Rep. Adiong ang ehekutibo na sa kabila ng mga negatibong isyu na ibinabato’y nananatiling itong nakatutok sa pagpapabuti sa bansa.

Samantala, naniniwala naman si Assistant Majority Leader Ernix Dionisio, na matalino ang publiko at alam nila kung sino sa mga opisyal ang talagang gumagawa ng kanilang trabaho.

Ibinasura ng Australian government ang planong pagkupkop kay dating Pangulong Rodrigo Duterte sakaling ma-aprubahan ang interim release petition nito sa International Criminal Court.

Ayon sa Australian officials, ICC mismo ang dapat magpasya sa naturang petisyon ng dating pangulo na pansamantalang paglaya mula sa ICC Detention center sa The Hague, Netherlands.

Nabatid na bigo si Vice President Sara Duterte na makausap si Australian Foreign Minister Penny Wong noong bumisita siya sa isang Pro-Duterte rally sa melbourne dahil hindi available ang nasabing Australian Official.

Samantala, wala pang komento si Australian Prime Minister Anthony Albanese tungkol sa nasabing petisyon.

Pinawi ng malakanyang ang pangamba ng publiko at mga eksperto hinggil sa inaasahang epekto sa ekonomiya ng Pilipinas.

Kasunod ito ng isinusulong na panukala ng amerika na patawan ng buwis ang remittances ng mga foreign worker sa kanilang bansa.

Sinabi ni Palace Press Officer at Communications Undersecretary Claire Castro, na batay sa pag-aaral ng department of finance, hindi pa aabot sa isang porsyento o 0.3% lamang ang inaasahang epekto sa gross domestic product ng bansa sakaling mapirmahan ang panukalang batas.

Dalawampung porsyento lang din ng 4.4 milyong Overseas Filipino Workers sa amerika ang maaapektuhan, partikular ang mga non-US citizens, kabilang ang mga green card holders at may working visa.

Nilinaw rin ng DOF na hindi sakop ng kabuuang 41% ng remittance na natatanggap ng Pilipinas mula sa amerika dahil karamihan sa mga Pilipino ay idinaraan sa mga bangko ang kanilang transaksyon.

Nangunguna ang Edsa sa may pinakamataas na naitalang road accidents sa mga pangunahing kalsada sa Metro Manila noong nakaraang taon.

Batay sa datos ng Metropolitan Manila Development Authority, umabot sa mahigit walong libong insidente ang naitala sa edsa.

Sinundan naman ito ng C-5 road na may 8,675 aksidente at Commonwealth Avenue na may 5,091.

Naitala naman ang 2,883 na aksidente sa Quezon Avenue; 1,659 sa Roxas Boulevard; 1,358 sa Marcos Highway; at 660 sa Radial Road 10.

Pumayat at hirap nang kumain si dating Pangulong Rodrigo Duterte.

Ito ang ibinahagi ni Vice President Sara Duterte matapos bisitahin ang kanyang ama sa International Criminal Court sa The Hague, Netherlands.

Ayon kay VP Sara, nahihirapan ang dating pangulo sa pagkain dahil hindi ito katulad ng mga pagkaing Pinoy.

Nahihirapan din ang nakatatandang Duterte dahil sa malamig na klima sa nabanggit na bansa.

Hindi rin nawala ang pagka-miss ng dating pangulo sa mga pamilya at mga kaibigan, kaya’t may mga araw na magaan ang pakiramdam nito at may mga araw rin na hirap siya.

Sa ngayon, patuloy na umuusad ang imbestigasyon ng  madugong war on drugs ni dating Pangulong Duterte.

Posibleng manatili sa South America si dating Pangulong Rodrigo Duterte, sa oras na payagan ng International Criminal Court ang hirit nitong temporary interim release.

Ayon kay Justice Secretary Jesus Crispin Remulla, karaniwang inililipat ng ICC sa South America ang mga pansamantalang pinalalayang akusado.

Kaya’t posibleng doon din mapunta si Duterte, taliwas sa pahayag ng abogado ng dating pangulo na may isang hindi pinangalanang bansa na pumayag nang tumanggap sa kanya habang dinidinig ang  kasong crimes against humanity kaugnay ng kampanya kontra droga.

—ulat mula kay Jun Samson (Patrol 24)