NATIONAL NEWS

Welcome sa Kamara ang pahayag ni Ombudsman Samuel Martires nagsasabing hihintayin niya muna ang kalalabasan ng impeachment trial ni Vice President Sara Duterte bago resolbahin ang kaso nito.

Ayon kay House Prosecution Panel Spokesman Atty. Antonio Audie Bucoy, sinabi ni Ombudsman Martires na ang kanyang kapangyarihan ay mag-imbestiga lamang

Binigyang-diin din ng Ombudsman, kabilang ang iba pang investigating bodies, ay kailangang hintayin ang impeachment proceeding.

Wala rin aniya silang kapangyarihang kasuhan ang bise presidente sakaling ma-acquit ito sa impeachment court.

Itinanggi rin ni Ombudsman Martires ang mga paratang na tangka niyang i-sabotahe ang paglilitis kay VP Sara noong pagulungin nito ang report na isinumite ng House Committee on Good Governance and Public Accountability.

Nabatid na noong Hunyo 16 ay nagpasa ng report ang kamara na naglalaman ng kasong plunder, technical malversation, falsification, use of falsified documents, perjury, bribery, corruption of public officers, betrayal of public trust, at culpable violation of the constitution laban kay VP Sara.

—sa panulat ni John Riz Calata

Nilinaw ng Department of Social Welfare and Development na hindi eksklusibo para sa mahihirap na pilipino ang Assistance to Individuals In Crisis Situation (AICS).

Binigyang-diin ni DSWD Crisis Intervention Unit Director Edwin Morata na walang pinipiling estado sa buhay ang AICS.

Aniya, ang mga benepisyaryo ng kanilang programa ay maaaring mababa o mataas ang sahod, mayaman o mahirap, propesyonal o hindi, may trabaho man o wala.

Paliwanag ni Director Morata, ito ay dahil hindi lamang pinansyal na tulong ang kanilang ibinibigay sa ilalim ng aics, kundi pati ang psychosocial interventions at mga serbisyong tutugon sa problemang kinakaharap ng isang indibidwal.

—sa panulat ni John Riz Calata

Pinatutsadahan ni dating Presidential Spokesperson Harry Roque si Senador Risa Hontiveros kaugnay sa sinasabing maling paggamit ng pondo ng PhilHealth.

Ayon kay Atty. Roque, hanggang sa ngayon ay hindi pa rin nasasagot ni Senador Hontiveros ang mga katanungan sa nasabing isyu, kaya hindi dapat aniya ito magmalinis.

Nabatid na nadawit ang pangalan ng mambabatas sa sinasabing iligal na pamimigay ng bonus at allowance sa mga empleyado ng PhilHealth noong 2010.

—sa panulat ni John Riz Calata

Aprubado na ng Bangsamoro Autonomous Region in Muslim Mindanao ang limampung pisong dagdag sa arawang sahod sa mga manggagawa sa pribadong sektor sa susunod na buwan.

Ayon kay Minister Muslimin Sema ng Ministry of Labor and Employment ng BARMM, Chairman ng  Bangsamoro Tripartite Wages Productivity Board (BTWPB),  ipatutupad ang wage order sa buong rehiyon, maliban sa mga manggagawa na exempted ng batas, tulad ng domestic workers at mga nasa rehistradong microenterprises.

Nilagdaan ni BARMM Chief Minister Abdulraof Macacua ang wage order kasama ang mga miyembro ng BTWPB, sa isang seremonya na idinaos sa MOLE-BARMM Regional Office sa Cotabato City.

Tugon aniya ito sa tumataas na halaga ng pamumuhay,  inflationary pressures, at patuloy na panawagan mula sa mga grupo ng mga manggagawa para sa mas makatwirang sahod.

—sa panulat ni John Riz Calata

Iginiit ni Vice President Sara Duterte na wala siyang obligasyon na ipaalam sa publiko ang detalye ng kanyang personal trip.

Tugon ito ni VP Sara kay Palace Press Officer Undersecretary Claire Castro matapos nitong himukin ang bise presidente na idetalye ang kanyang mga ginawa abroad.

Binigyang-diin ng pangalawang pangulo na kailangan lamang niyang mag-report kung official business ang kanyang byaheng abroad at gumamit siya ng pera ng pamahalaan.

Kasabay nito, itinanggi ni VP Sara na siya ay galit at emosyonal nang sagutin niya ang naunang pagpuna ng palasyo sa kanyang mga personal trip.

—sa panulat ni John Riz Calata

Dinadawit sa kaso ng mga nawawalang sabungero ang aktres na si Gretchen Barretto.

Ito ang kumakalat na espekulasyon sa social media na si Barretto umano ang babaeng celebrity na tinutukoy ni alyas “Totoy” na kabilang sa “Alpha Members”, na pangunahing grupo na sangkot sa pagkawala ng mga sabungero.

Ayon kay alyas Totoy, aktibo umano ang partisipasyon ng babaeng celebrity sa grupo dahil parating present sa meeting ng grupo.

Bagaman hindi pinangalanan ni alyas “Totoy” ang naturang celebrity, agad nag-espekula ang mga netizen na si Gretchen ang tinutukoy ng whistleblower.

Iniugnay ang aktres sa kaso dahil sa pagtuligsa nito noon sa pag-iimbestiga ng Senado hinggil sa mga nawawalang sabungero at sa relasyon niya sa gambling operator na si Atong Ang, na madalas tawaging “E-sabong Kingpin”.  - sa panulat ni Jenn Patrolla

Nagsumite na ng counter-affidavit si Vice President Sara Duterte sa Office of the Ombudsman bilang tugon sa mga alegasyong may kinalaman sa sinasabing maling paggamit ng confidential funds ng Office of the Vice President at Department of Education.

Inihain mismo ni Attorney Micheal Poa ang counter-affidavit ni VP Sara bago ang deadline na itinakda ng Ombudsman.

Bahagi ng naturang hakbang ang isinasagawang preliminary investigation ng Ombudsman, kasunod ng reklamo mula sa House Committee on Good Government and Public Accountability.

Ito ay may kinalaman sa sinasabing maling paggamit sa P612.5-M sa confidential funds, kung saan P500-M ay galing sa OVP at P112.5-M sa DepEd.

Kabilang sa respondent sina VP Duterte, mga opisyal ng OVP at DepEd, tulad nina Edward Fajarda, Gina Acosta, Nolasco Mempin, at iba pa.

Bukod dito, ang mga alegasyon laban sa kanila ay kinabibilangan ng plunder, technical malversation, falsification of public documents, perjury, bribery, at betrayal of public trust. – sa panulat ni Jenn Patrolla

Mahigit siyam na libong laptop ang naipamahagi na sa mga guro sa mga pampublikong paaralan sa buong bansa.

Ito’y bilang bahagi ng layunin ng Department of Education na gawing mas moderno at makabago ang pagkatuto sa silid-aralan sa pamamagitan ng 2025 DepEd Computerization Program.

Ayon sa DepEd, may kabuuang 9,466 laptops ang naipamahagi sa teaching personnel habang 3,255 laptop naman sa non-teaching staff.

Naibigay na rin ng kagawaran ang mahigit anim na libong Smart TV packages sa iba’t ibang paaralan.

Sa pamamagitan ng early procurement activities, naipagkaloob nang maaga ang halos 80 percent ng kabuuang badyet para sa DCP ngayong 2025.  - sa panulat ni Jenn Patrolla

 Kinondena ng Kamara ang pahayag ni Vice President Sara Duterte na political persecution ang kanyang impeachment trial upang tanggalin siya bilang presidential contender sa 2028.

Ayon kay House Assistant Majority Leader Zia Alonto Adiong, ang pahayag ni bise presidente ay paglihis lamang sa tunay na isyu ng pananagutan, lalo na sa mga kinahaharap niyang kaso, tulad ng maling paggamit ng confidential funds, pagbabanta kay pangulong bongbong marcos at pagkakasangkot sa state-sanctioned killings.

Hindi anya ito lisensya para gumawa ng krimen o lumabag sa saligang batas lalo’t ang popularidad ay hindi immunity.

Iginiit ni Adiong na malisyoso rin ang paratang na walang ebidensya at walang sumisira sa dignidad ng Office of the Vice President dahil insulto ito sa bawat miyembro ng mababang kapulungan.

Una nang inakusahan ni Duterte ang mga mambabatas na tumanggap umano ng pera kapalit ng pagsuporta sa impeachment complaint laban sa kanya.

Pinalagan ng ilang mambabatas sa Kamara ang paratang ni Vice President Sara Duterte na nagpapa-photo Ops lamang si Pangulong Ferdinand Marcos jr. nang saksihan nito ang pagsira sa mga nasabat na iligal na droga.

Ayon kay Assistant Majority Leader Zia Alonto Adiong, bahagi ng transparency at pagbibigay ulat sa bayan ukol sa accomplishment ng pamahalaan ang mga litrato ng pangulo.

Ipinapakita rin aniya nito ang dedikasyon ng mga opisyal ng pamahalaan sa mga programa at polisiya na ipinatutupad ng gobyerno.

Pinuri rin ni Rep. Adiong ang ehekutibo na sa kabila ng mga negatibong isyu na ibinabato’y nananatiling itong nakatutok sa pagpapabuti sa bansa.

Samantala, naniniwala naman si Assistant Majority Leader Ernix Dionisio, na matalino ang publiko at alam nila kung sino sa mga opisyal ang talagang gumagawa ng kanilang trabaho.