NATIONAL NEWS

Niyanig din ng Magnitude 4.8 na lindol ang Masbate alas-8:38 kahapon ng umaga.

Ayon sa PHIVOLCS, namataan ang pagyanig sa layong 8 km Silangan ng Masbate City, Masbate.

May lalim ang lindol na 11 km at tectonic ang origin o pinagmulan nito.

Naitala ang Intensity Vi sa Mobo, Masbate; Intensity V sa Masbate City; Intensity IV sa Aroroy at Baleno, Masbate; Intensity III sa Batuan, Masbate; Intensity II sa San Jacinto, Masbate at Ajuy, Iloilo; Intensity I sa Passi City, Iloilo habang Instrumental Intensity V naman sa Masbate City.

Wala namang inaasahang aftershocks pero inaalam na ng mga otoridad ang kabuuang danyos matapos ang lindol.

Muling niyanig ng Magnitude 3.3 na lindol ang Cagayan Province alas-6:17 kagabi.

Namataan ang lindol sa layong 84 km sa Munisipalidad ng Calayan, Cagayan.

May lalim ang lindol na 22 km at tectonic ang origin o pinagmulan nito.

Una nang niyanig ng kambal na lindol noong Mayo a-17 ang nabanggit na lugar kung saan, naitala ang Magnitude 5.4 na sinundan ng Magnitude 3.7 na lindol.

Wala namang naitalang nasawi o nasugatan matapos ang pagyanig.

Tiniyak ng Department of Environment and Natural Resources (DENR) sa pamamagitan ng mines and Geo-Sciences Bureau na mahigpit nilang babantayan ang Tampakan Copper-Gold Open-Pit Mining Project, sa South Cotabato.

Ito’y upang ma-protektahan ang kapaligiran at bilang obligasyon sa rehabilitasyon sa sandaling magsimula muli ang operasyon nito.

Inihayag ito ni DENR Acting Secretary Jim Sampulna matapos amyendahan ang environment code ng South Cotabato, partikular ang pag-alis ng Open-Pit Mining Ban na inaprubahan sa ikatlo’t huling pagbasa ng sangguniang panlalawigan noong May 16.

Dahil dito, magkakaroon na ng pagkakataon ang Sagittarius Mines Incorporated (SMI), na proponent ng tampakan Copper-Gold Project, na ipagpatuloy ang ‘development’ ng lugar at commercial extraction ng mina.

Ayon kay Sampulna, hindi masasakripisyo ang kapaligiran sa pagbabalik-operasyon ng tampakan mine dahil mahigpit itong imo-monitor alinsunod sa mining at environmental laws, rules at regulations.

Ire-require anya nila sa SMI na mag-invest sa equipment at manpower upang matiyak na mababawasan ang anumang magiging epekto ng mining operation.

Aakyat na sa 24,368 ang tauhan ng Philippine Coast Guard (PCG) ngayong taon dahil sa inaasahang pagtatapos sa training ng 1,757 individuals.

Sa kasalukuyan, kabilang sa 22,000 personnel ng PCG ang nasa 2,831 na babae at 16,923 na lalaking non-officers.

Ayon kay DOTr Secretary Arthur Tugade, bahagi ng modernization efforts ng coast guard na maabot ang 35,000 workforce nito sa mga susunod pang mga taon.

Ang pagtaas anya ng workforce ng PCG ay bunga ng recruitment sa mga coast guard auxiliary.

Inihayag naman ni PCG Commandant, Admiral Artemio Abu na mas may kakayahan na ngayon ang organisasyon na gampanan ang maritime-related mandates nito at magsagawa ng disaster response operation sa panahon ng kalamidad at gitna ng pandemya.

Umabot lamang sa 103 additional COVID-19 cases ang naitala ng Department of Health (DOH) sa bansa, kahapon.

Ito na sa ngayon ang pinaka-mababang daily COVID cases simula April 2020 habang sumadsad pa sa 2,241 ang aktibong kaso.

Sumampa naman sa 3,688,100 ang kabuuang kaso ng COVID-19 kabilang ang 3,625,407 recoveries at 60,452 deaths.

Nangunguna pa rin ang National Capital Region sa may  pinaka-maraming bagong kaso sa nakalipas na dalawang linggo na 890; CALABARZON, 258 at Central Luzon, 240.

Nagpaabot ng pakikidalamhati si Pangulong Rodrigo Duterte sa pamahalaan at mamamayan ng United Arab Emirates (UAE) kasunod ng pagpanaw ni UAE president his highness Sheik Khalifa Bin Zayed Al Nahyan.

Sa mensahe ng Pangulo sinabi nito na kaisa ang mga Pilipino sa pagpapaabot ng pakikiramay sa UAE na nangungulila ngayon dahil sa pagpanaw ng kanilang lider.

Hindi naman maiwasang maalala ni Duterte si his Highness Sheik Khalifa Bin Zayed Al Nahyan na aniya’y isang bold visionary na ang pamumuno nito ay maituturing na krusyal sa pagtatag ng ekonomiya ng UAE at pagkakaruon ng malalim na ugnayan sa International community kabilang na ang Pilipinas.

Sinabi pa ng punong ehekutibo, maaalala ang namayapang pinuno ng UAE sa kanyang legacy of leadership, talino at kabutihang loob.

Ipinaabot ng Chief Executive, ang mensahe ng pakikiramay sa pamamagitan ni Special Envoy, Secretary Robert Borje.

Dapat mas paigtingin ng pamahalaan ang surveillance ng COVID-19 cases, pabilisin ang vaccination program, at mag-ipon ng stock ng antivirals bilang paghahanda sa posibleng pagsirit ng kaso ng impeksyon.

Ito ang iginiit ni Dr. Tony Leachon, dating adviser sa National Task Force against COVID-19, kasunod ng pagkakadiskubre sa local transmission ng Omicron BA.2.12.1 sa Metro Manila, Puerto Princesa City, at Western Visayas.

Dagdag ni Leachon na kailangan aniya itaas ng pamahalaan ang budget para sa genome sequencing at paigtingin ang COVID-19 vaccination at booster shot campaign.

Ipinabatid pa ni Leachon na susuportahan niya si Infectious Diseases Expert Dr. Edsel Salvaña sakaling italaga itong susunod na health chief.

Hinimok ng Department of the Interior and Local Government (DILG) Undersecretary Epimaco Densing, ang publiko na isumbong sa kanila sakaling meron pa ring mga lugar ang nakakakitaan ng campaign materials.

Ito ang sinabi ni Densing sa kabila ng pagtatapos ng deadline na ibinigay ng ahensya sa mga Local Government Unit (LGUs) para linisin ang mga nagkalat na campaign materials sa kanilang mga nasasakupan.

Sa kanilang isinagawang pag-iikot sa Maynila, karamihan aniya sa mga lugar na kanilang napuntahan ay wala ng campaign materials.

Kasunod nito, hinikayat ni Densing ang publiko na ipagbigay alam sa kanila sakali mang may makita paring mga campaign paraphernalia.

Giit pa ni Densing ang mga lokal na pamahalaan na hindi pa rin ganap na nakapaglinis ng mga campaign materials na padadalhan nila ito notice para pagpaliwanagin.