NATIONAL NEWS

Napapanahon nang buksan ang mga paaralan para sa face to face classes.

Ito ang binigyang-diin ni Committee on Basic Education Chairman Senator Sherwin Gatchalian kung saan bumababa na ang bilang ng mga kaso ng COVID-19 sa bansa.

Ito’y pagsuporta na rin ni Gatchalian sa panawagan ng Inter Agency Task Force (IATF) na buksan na ang lahat ng pampubliko at pribadong paaaralan para sa in person classes.

Dagdag pa ni Gatchalian na mahalaga ang pagbubukas ng lahat ng mga paaralan upang lalong mapaigting ang pagbangon ng sektor ng edukasyon mula sa COVID-19 pandemic.

Samantala, nanindigan ang IATF na hindi magiging requirement ang pagbabakuna para sa face to face classes.

Dapat suportahan ng mga Pilipino ang susunod na administrasyon.

Ito ang pinanawagan ng Department of the interior and Local Government (DILG).

Sinabi ni DILG Undersecretary Epimaco Densing na ang taumbayan din ang makakabenepisyo sa magiging tagumpay ng gobyerno.

Batay aniya sa naging resulta ng nagdaang halalan mayorya o higit 50% ng total votes cast nakuhang boto ng presidente at bise presidente kaya walang dahilan para hindi ibigay ng mga ito ang suporta para sa kanilang pamamahala.

Gayunman, nagpasalamat ang DILG sa ginawang pakikiisa ng bawat Pilipino para maisagawa ng malinis ang halalan 2022 sa bansa.

Nakarekober na ang dalawa sa tatlong kumpirmadong kaso ng Omicron subvariant na BA.2.12.1 habang nananatili pa ang isa sa ospital ng Iloilo City.

Ito ang inihayag ng department of Health Western Visayas Center for Health Development (DOH WV CHD).

Sinabi ni Director Ma. Sophia Pulmones, lahat ay pawang mga senior citizens, dalawa ay lalaki na mga lokal na kaso at isang babae na Returning Overseas Filipino (ROF) mula sa America.

Ang nasabing dalawang local cases ay parehong mula sa lalawigan ng Iloilo na 69 years na lumabas nitong Martes at isang 66 years old na patuloy na nagpapagaling.

Habang ang 60 years old na ROF na naka-recover na din ay dumating sa Pilipinas nuong April 20 at pumunta sa Iloilo nuong April 25 at nagpositibo nuong April 27.

Lahat ng tatlong specimen ay ipinadala sa University of the Philippines-Philippine Genome Center Visayas noong Mayo 12 at lumabas na positibo para sa subvariant ng Omicron ayon sa resulta na inilabas noong Mayo 16.

Isa sa tatlong malalapit na contact ng ROF ang nag-negatibo habang nasa ilalim ng verification ang status ng dalawa pa.

 Sa katapusan pa ng Hunyo at hindi sa a-tres ng Hunyo maaaring makalaya ang nakakulong sa  Pasay City Jail na mga opisyal ng Pharmally Pharmaceutical Corporation na sina Mohit Dargani at Linconn Ong.

Ito ang nilinaw ni Senate Minority Leader Franklin Drilon kasunod ng pahayag ni Senate President Tito Sotto III matatapos ang pag-contempt ng senado sa dalawang Pharmally officials sa Hunyo 3 kung kailan mag-a-adjourn sine die o magsasara ang senado sa ilalim ng kasalukuyang 18th congress.

Ayon kay Drilon, ang third regular session lamang ng konggreso ang magtatapos sa June 3.

Ang mismong 18th congress ay mag-a-adjourn at magsasara sa Hunyo 30 pa at doon lamang otomatikong malulusaw ang mga kautusan ng senado ukol sa pag-contempt, pagkakabilanggo at pagpapa-aresto sa Pharmally officials at iba pang sangkot sa kontrobersya nito.

Una rito,  sinabi ni Sotto na Hunyo 3 magsasara ang konggreso agad nagpasalamat ang abogado nina Dargani at Ong na nagsabi na dapat noong pang Pebrero dapat pinalaya ang dalawa dahil inilabas na noon ang report ng Blue Ribbon Committee ukol sa Pharmally.

Ipatutupad na ng Cavitex Infrastructure Corporation (CIC) ang bagong toll rates sa Cavitex R-1 segment simula 22 ng Mayo.

Una nang inanunsiyo ng Toll Road Operator na sisimulan na nito ang paniningil nuong May 12 ngunit ipinagpaliban ito para magbigay ng karagdagang oras sa PUV drivers at operators na makarehistro sa Toll Reprieve Program nito.

Nakasaad sa naturang programa, mabibigyan ng rebate ang mga PUV drivers at operators upang sila ay makakapagpatuloy ng pagbabayad pa rin ng lumang toll rates kung saan 25 pesos sa class 1 at 50 pesos naman sa class 2.

Ang Toll Reprieve Program ay system driven gamit ang Easytrip RFID kung saan kailangan lamang i-enroll ng drivers at operators ang kanilang Easytrip account sa tulong ng kani-kanilang transport organizations.

Tatakbo ang programa sa loob ng 90 araw matapos ang unang araw ng pag-implement ng bagong toll rates.

Maaaring kakaunti na lamang ang tatamaan ng severe case ng COVID-19 sakaling mangyari ang surge na may kaugnayan sa nagdaang eleksyon.

Ito ang inihayag ni Infectious Disease Expert Dr. Edsel Salvaña, kahit anya umabot sa libo-libo ang maidagdag na kaso ng virus ay hindi na gayung karami pa ang kakapitan ng severe cases.

Dahil na din ito sa aniya’y mataas na antas ng pagbabakuna sa bansa hindi kagaya nuong nakaraang taon na wala aniyang immunity ang populasyon.

Sinabi pa ni Salvaña na kahit makalusot sa mga taong hindi pa nagpapa-booster shot laban sa virus kaya pa din maiwasan ang severe case gayung mayron namang gamot sa COVID gaya ng Paxlovid at Remdesivir.

Naniniwala rin si Salvaña na hindi na din ibabalik pa ang lockdown sa bansa.

Nagbabala kaugnay sa napipintong krisis sa pagkain ang Department of Agriculture (DA) dahil sa matinding epekto ng COVID-19 pandemic, kasabay ng gulo sa pagitan ng Ukraine at Russia, sanhi ng walang tigil na pagtaas ng presyo ng produktong petrolyo.

 Ayon kay DA Secretary William Dar, mayroon ng inihandang directional plan ang kanilang tanggapan upang matugunan ang mga inaasahang pagsubok na darating sa bansa.

 Aniya, kailangan lamang madagdagan ang pondo ng ahensiya para matutukan at mapalakas ang pagsusulong ng mga programa para mapataas ang production level sa agrikultura.

 Batay sa pagtaya ng kalihim, mararamdaman ang napipintong food crisis sa ikalawang semestre ng taon kaya ngayon pa lamang ay naghahanda na ang kanialng departamento.

Iprinoklama na ng Commission on Elections (COMELEC) ang 12 nanalong senador sa 2022 local and national elections sa isinagawang proclamation ceremony na ginanap sa PICC Forum Tent sa Pasay City.

Ipinagmalaki ni COMELEC Chairman Saidamen Pangarungan na sa kabila ng mga aberya ay matagumpay ang naging pagdaraos ng halalan noong Mayo a-nuwebe.

Samantala, present ang lahat ng tinaguring “Magic 12” na senador na kina bibilangan nina;

1. Robin Padilla
2. Loren Legarda
3. Raffy Tulfo
4. Sherwin Gatchalian
5. Francis “Chiz” Escudero
6. Mark Villar
7. Alan Cayetano
8. Juan Miguel Zubiri
9. Joel Villanueva
10. Jv Ejercito
11. Risa Hontiveros
12. Jinggoy Estrada

Samantala, pormal na mauupo sa puwesto ang mga bagong halal na senador sa June 30. 2022.

Photo courtesy: Patrol 19 Cely Ortega-Bueno

Opisyal nang ideklara ng Philippine Atmospheric, Geophysical and Astronomical Services Administration (PAGASA) ang pagsisimula ng panahon ng tag-ulan sa bansa.

 Ayon sa State Weather Bureau, pasok na sa criteria para sa pagsisimula ng rainy season ang kasalukuyang weather system na umiiral ngayon.

 Dagdag nito, ay magsisimula nang makaapekto sa Metro Manila at kanlurang bahagi ng bansa ang intermittent rain na sinamahan ng Southwest monsoon.

 Samantala, maaari patuloy na makaapekto ang La Niña sa ilang bahagi ng bansa at mapataas ang above-normal rainfall conditions sa mga darating na buwan.

Inanunsiyo ng Department of Health (DOH) na pwede na ring magpaturok ng 2nd booster shot kontra COVID-19 ang mga senior citizens at frontline healthcare workers.

 Ayon kay National Vaccination Operations Center Chairperson Myrna Cabotaje, ito ang paraan ng bansa para labanan ang virus at mapapalakas nito ang immunity ng mga tao laban sa virus gayundin sa Omicron subvariant BA.2.12.1.

 Mababatid na sa ngayon ay mayroong 17 nang kaso ng nasabing sub variant ang naitala sa bansa, kung saan dalawa rito ay mula sa National Capital Region (NCR), 12 naman mula sa Puerto Princesa City, Palawan at tatlo mula sa Western Visayas.

 Samantala, kabilang sa mga bakunang gagamitin para sa second booster dose ay Pfizer at Moderna, na ibibigay apat na buwan matapos ang unang booster dose.