NATIONAL NEWS

Inanunsiyo ng Department of Labor and Employment (DOLE) na kasado na ang 33 pesos minimum wage increase sa Metro Manila simula sa Hunyo a-tres.

 Ayon kay Labor Secretary Silvestre Bello III, ito ay matapos aprubahan ng National Wages Productivity Commission ang rekomendasyon na nagtataas ng 33 pesos na dagdag sweldo bawat araw para sa mga manggagawa sa National Capital Region (NCR).

Mababatid na simula sa susunod na buwan, ay magiging 570 pesos na ang minimum wage para sa mga manggagawa sa non-agriculture sector, habang 533 pesos naman para sa sektor ng agrikultural.

 Samantala, kung mailalathala ang wage order para sa Western Visayas bukas, Mayo 19, magiging epektibo rin ang dagdag-sweldo ng mga manggagawa sa nasabing rehiyon kasabay sa NCR.

Nadiskubre ng Philippine National Police (PNP) Anti-Cybercrime Unit ang anim na website ng E-sabong na nagpapatuloy ng operasyon sa kabila ng utos ni Pangulong Rodrigo Duterte na itigil ang pagsasagawa ng naturang aktibidad.

 Ayon kay PNP Spokesperson Col. Jean Fajardo, bagama’t nadiskubre na ang mga aktibong website ay hindi pa rin tukoy ang mga indibidwal na nasa likod nito.

Maaalala na noong Mayo a-tres ay pormal na ipinagutos ng punong ehekutibo ang pagpapahinto sa operasyon ng E-sabong sa bansa.

Samantala, binigyang-diin ng tagapagsalita na patuloy nilang tinututukan ang kaso upang maisiwalat at matukoy ang mga taong involved sa patuloy na operasyon sa anim na website ng naturang E-sabong.

Inihayag ni Atty. Vic Rodriguez, Spokesperson at Chief of Staff ni Presumptive President Ferdinand ‘Bongbong’ Marcos Jr. na wala pang pormal na pag-uusap kaugnay ng gagawing inagurasyon.

 Ayon kay Rodriguez, napagkasunduan ng transition team sa panig ng Malacañang na huwag na muna magsagawa ng pormal na pag-uusap kaugnay ng inagurasyon.

 Nais rin ng kanilang kampo na hintayin munang matapos ng kongreso ang canvassing at maiproklama ang mga nanalong pangulo at bise presidente, dahil mayroon pa aniyang ibang mga lugar na ikinokonsidera.

 Mababatid na sa susunod na linggo ay magsasagawa ng joint session ang senado at Kamara de Representantes para sa canvassing ng mga boto sa pagkapangulo at ikalawang pangulo.

Nagbigay ang Supreme Court (SC) ng donasyong kahon-kahon na formula milk para sa mga pasyente ng Pediatric Cancer wards sa Philippine General Hospital (PGH).

 Tinanggap ngSJ ng PGH Chapel at Chaplaincy na si Fr. Marlito G. Ocon ang iniabot na tulong nina SC en Banc Clerk of Court Marife M. Lumibao Cuevas at First Division Deputy Clerk of Court Maria Teresa B. Sibulo.

 Mababatid na ang donasyong ito ay proyekto ng SC para sa kanilang kalinga week.

 Sinimulan noong Hunyo 2021 ang kalinga week na nagsusulong ng maagang pagsusuri, isang kapaligirang nag-aalaga at sapat na suporta sa komunidad para sa mga batang may espesyal na pangangailangan.

Umapela ang chief of staff at spokesman ni incoming President Ferdinand ‘Bongbong’ Marcos, Jr. na si Atty. Vic Rodriguez sa mga petitioner ng disqualification case na tigilan na ang kanilang walang humpay na panggugulo  at pagpupunla ng galit at pagkakawatak-watak na siyang lalong magpapagulo ng sitwasyon sa halip na makausad na ang bansa patungo sa pag-unlad.

 Sinabi rin ni Rodriguez na dapat na nilang matutunang respetuhin ang kagustuhan ng mayorya na siyang bumoto para kay Marcos at kanyang running mate na si Vice President-elect Inday Sara Duterte sa katatapos lang na national and local elections.

“I appeal to those who keep on pursuing this divisiveness, the people have spoken. The Filipino people have spoken and an overwhelming majority has voted President-elect Bongbong Marcos and Vice President-elect Inday Sara Duterte into office as President and Vice President. Learn to respect the will of the Filipino people,” sabi niya.

 Ayon pa sa spokesman ni Marcos, hindi pa nila natatanggap ang kopya ng petisiyon na isinampa sa Supreme Court upang makansela ang certificate of candidacy ng presumptive president na may hiling na maglabas ng temporary restraining order (TRO) upang mapigilan ang pagbibilang ng boto at pagpo-proklama sa kanya bilang panalo.

Gayunman, ipinunto ni Rodriguez na ang mga disqualification cases laban kay Marcos ay unanimously dismissed na ng Commission on Elections, parehong sa division at en banc level.

“We have yet to receive a copy of the petition that was filed this morning. However, I think these cases have been resolved unanimously (already) by the Commission on Elections on the division level as well as the Commission on Elections en banc. And these cases have been dismissed and the decision was unanimous,” aniya.

Nanawagan din siya sa mga petitioners na hayaang makapagtrabaho si Marcos at ang kanyang magiging administrasiyon sa halip na maglaan ng oras para sa pag-intindi sa kanilang galit.

“And I appeal to you, instead of pushing for your agenda of animosity e tulungan niyo na lang kami na pagtuunan at gamitin natin ang ating limitadong oras everday, we are all limited to 24 hours in a day, allow us to be more productive,” sabi ni Rodriguez.

Bago ang ginanap na press conference ay nagtungo sa Supreme Court ang mga petitioners na sina Fr. Christian Buenafe, Fides Lim, Ma. Edeliza Hernandez, Celia Lagman Sevilla, Roland Vibal, and Josephine Lascano upang hilingin sa mataas na hukuman na maglabas sila ng TRO na nagpipigil sa Senate at House of Representatives na masimulan ang pagbibilang ng boto na nakuha ni Marcos at pagpo-proklamang sa kanya bilang panalo.

Base sa tala ng Comelec transparency server nakakuha na si Marcos s 31,104,175 na boto samantalang ang kanyang running mate na si Davao City Mayor Sara Duterte ay may 31,561,948 naman.

Mayroon ng 55,197,306 na boto mula sa 67,442,616 registered voters ang naitala sa ngayon. May kabuuang 98.35% ng election returns na rin ang naproseso.

Noong nakaraang linggo, pinagtibay ng Comelec En Banc ang resolusyon ng Second Division na nagbasura sa petisyon na inihain ni Buenafe para kanselahin ang COC ni Marcos.

Kagaya sa naging desisyon ng iba pang disqualification cases, sinabi ng Comelec En Banc na nabigo ang mga petitioner na maghain ng mga bagong usapin o isyu na magpapatunay sa pagbaligtad sa pasya ng dating Comelec Second Division.

Nito lang sinabi ni Comelec Commissioner George Garcia na sa ilalim ng Comelec rules, ang mga nanalong kandidato sa ginanap na 2022 election na may mga nakahain pang disqualification cases ay maari pa ring maiproklama kung walang magbabawal sa poll body na gawin ito at kung wala ring makakapigil para sila ay maiproklama.

Inihayag ng Commission on Elections (COMELEC) na hindi nila palalampasin ang mga reklamo ng vote buying kahit pa nanalo sa nakaraang eleksyon ang kandidatong nadidiin.

 Ayon kay COMELEC Commissioner George Garcia, pagtutuunan nila ng pansin ang mga reklamo ng vote-buying sa oras na matapos na ang canvassing ng mga boto at ang proklamasyon ng mga nanalo.

 Nagbanta rin si Garcia, na dapat tandaan ng mga kandidato na sangkot sa issue na vote buying na hahabulin at pananagutin nila ito.

 Mababatid na sa umiiral na batas, ang mapapatunayang bumili ng boto ay maaaring mabilanggo ng mula isa hanggang anim na taon at madidiskwalipika sa paghawak ng anumang posisyon sa pamahalaan.

 Umapela sa mga kritiko si Senador Ramon ‘Bong’ Revilla Jr. na bigyan ng pagkakataon si presumptive President Ferdinand “Bongbong” Marcos Jr. na pamunuan ang bansa sa loob ng anim na taon.

 Ayon kay Revilla, ang 31 milyong boto ay malinaw pagpapahayag ng kagustuhan sa liderato at panawagang pagkakaisa ni Marcos.

 Hinimok pa ng senador, na suportahan na lamang ang liderato ni Marcos at simulan na ang pagkakaisa ng lahat.

Positibo ang Samahang Industriya ng Agrikultura (SINAG) sa incoming Marcos Administration.

Ito ayon kay SINAG Chairman Rosendo So ay dahil nakatutok sa local production ang BBM Presidency matapos nilang makausap si Presumptive President Ferdinand Bongbong Marcos, Jr. matapos ang eleksyon.

Sinabi sa DWIZ ni So na mas mayruong pagasa ang sektor ng agrikultura dahil pro-farmers ang incoming administration.

Nakatakdang i-decongest o ilipat ng selda ang mahigit 400 preso sa Quezon City Jail matapos mapasok ang selda ng mga ito.

Kasunod ito nang naganap na staged jail riot noong Biyernes.

Sa ginawang operasyon ng mga tauhan ng QC Jail sa male dormitory, giniba ng mga ito ang pader at konkretong flooring ng mga selda kung saan nadiskubre ang isang armory.

Tumambad sa mga otoridad ang isang 38 kalibre ng baril, 700 gramo ng marijuana brick, 24 na piraso ng marijuana sachets at paraphernalia, halos 100 piraso ng tabako, mga patalim, ice pick, pana at mga bala at limang celfon.

Sinasabing ilang buwang nagsagawa ng surveillance at covert operation ang mga otoridad sa loob ng nasabing bilangguan bago ikinasa ang aktuwal na operasyon.