NATIONAL NEWS

Nagpaabot ng pagbati ang Malacañang sa mga senador na nanalo sa 2022 elections.

Nabatid na naihalal ng taumbayan ang 12 luma at bagong senador kabilang na diyan sina:

• ang aktor na si Robin Padilla
• Antique Representative Loren Legarda
• Broadkaster na si Raffy Tulfo
• Senator Sherwin Gatchalian
• Sorsogon Governor Chiz Escudero
• dating Public Works chief Mark Villar
• Taguig-Pateros Representative Alan Peter Cayetano
• Juan Miguel Zubiri
• Joel Villanueva
• dating Sen. Jv Ejercito
• Risa Hontiveros at
• dating Sen. Jinggoy Estrada.

Umaasa si Acting presidential spokesperson at Communications Secretary Martin Andanar na magkakaroon ng pagkakaisa ang mga uupong senador ng bagong administrasyon para sa tagumpay ng bansa at bawat isa.

Nakatakda na ring itaas ang minimum na sahod ng mga manggagawa sa Ilocos, Cagayan Valley at CARAGA Regions.

Ito kinumpirma ng Department of Labor and Employment (DOLE) makaraang maglabas na rin ng Wage Hike Order ang kani-kanilang Regional Tripartite Wages and Productivity Boards (RTWPB).

Alinsunod sa Wage Order RB1-21, inaprubahan ang 60 hanggang 90 pesos na dagdag-sahod sa Ilocos Region na ibibigay sa loob ng dalawa hanggang tatlong tranches.

Sa sandaling maibigay na nang buo, magiging 372 hanggang 400 pesos na ang minimum wage sa rehiyon mula sa kasalukuyang 282 hanggang 340 pesos.

Aprubado na rin ng wage board ang 500 at 1,500 pesos na monthly wage increase para sa mga domestic worker sa mga lungsod at first-class municipalities maging sa iba pang munisipalidad kaya’t aabot na ang monthly wage rate nila sa 5,000 pesos.

Samantala, 50 hanggang 75 pesos naman ang aprubadong umento sa Cagayan Valley na hahatiin din sa dalawa hanggang tatlong bigayan kaya’t magiging 400 hanggang 420 pesos na ang sahod mula sa kasalukuyang 345 hanggang 370 pesos.

Sa CARAGA Region naman, inaprubahan na rin ang dagdag 15 pesos sa cost of living allowance at 30 pesos sa sahod kaya’t magiging 350 na mula sa kasalukyang 305 pesos ang basic pay.

Epektibo ang mga umento, 15 araw matapos itong ilathala sa mga pahayagang may Regional Circulation.

Nadiskubre ng mga otoridad ang malawak na illegal drug trade sa loob ng Quezon City Jail Male Dormitory makaraang masamsam ang aabot sa pitundaang gramo ng kush, mga baril at iba’t-ibang improvised weapons.

Ito’y matapos ang isinagawang dalawang araw na “Oplan Greyhound” ng Quezon City Police District at Bureau of Jail Management and Penology sa loob ng piitan.

Kasunod ito nang sumiklab na riot sa nasabing kulungan noong Biyernes, Mayo 13 na ikinasawi ng isang preso at ikinasugat ng siyam na iba pa.

Tinawag naman ng Quezon City Jail na “Stage Riot” ang insidente dahil base sa natanggap nilang intelligence report, isang grupo o Ang Batang City Jail lamang ang pasimuno ng gulo.

Layunin umanong mapatalsik sa puwesto si Jail Warden, Supt. Michelle Bonto upang malaya silang makapagbenta ng iligal na droga sa loob ng bilangguan.

Ito na sa ngayon ang pinakamaraming kontrabandong nasabat ng mga otoridad sa loob ng Quezon City Jail Male Dormitory.

Nagpaabot na ng pagbati ang Malakanyang kay Maria Filomena Singh sa pagkakatalaga sa kanya ni Pangulong Rodrigo Duterte bilang bagong Associate Justice ng Korte Suprema.

Si Justice Singh ay nagsilbi bilang Associate Justice ng Court of Appeals.

Ayon kay Presidential Communications Secretary at Acting Presidential Spokesman Martin Andanar, kampante silang maipagpapatuloy ni Singh ang “judicial excellence at independence” ng Supreme Court.

Si Singh ang ika-194 na mahistrado ng kataas-taasang hukuman at sinasabing huling appointee ni Pangulong Duterte sa SC bago bumaba sa puwesto sa June 30.

Pinalitan ng bagong mahistrado si Dating Associate Justice Estela Perlas-Bernabe na nagretiro noong Mayo 14.

Si Singh ay kapatid ni Health Spokesperson, Undersecretary Maria Rosario Vergeire.

Itinalaga na ni Pangulong Rodrigo Duterte si Court of Appeals Justice Maria Filomena Singh bilang bagong associate justice ng Korte Suprema.

Kinumpirma ni Executive Secretary Salvador Medialdea na nanumpa si Singh kay Chief Justice Alexander Gesmundo kagabi.

Si Singh ang pumalit kay Supreme Court Associate Justice Estela Perlas-Bernabe na nagretiro noong Mayo 14.

Ang bagong mahistrado ang sinasabing pinakahuling appointee ni Pangulong Duterte sa Supreme Court (SC) bago bumaba sa puwesto sa June 30.

Magiging isa rin si Singh sa mga mahistradong pinakaha-mahabang panahong magsisilbi sa SC bago ang kanyang mandatory retirement sa taong 2036. —sa ulat ni Bert Mozo (Patrol 3)

Naglagay na ang Philippine Coast Guard (PCG) ng limang ‘navigational buoys’ o boya na may nakakabit na watawat ng Pilipinas sa apat na kritikal na isla sa West Philippine Sea.

Sa kabila ng tensyon sa pinag-aagawang karagatan, ang mga boya na may habang tatlumpung talampakan, ay inilagay sa mga isla ng lawak, likas, parola at pag-asa na nasa loob ng Exclusive Economic Zone ng Pilipinas.

Pinangunahan ni PCG Commandant, Admiral Artemio Abu ang pagdating ng limang PCG vessels na siyang nagsakay sa mga boya at naglagay sa naturang mga isla na isinagawa simula Mayo 12 hanggang 14.

Ayon kay Abu, hindi naman hinarang ng mga chinese vessel ang mga barko ng Pilipinas na nagtungo sa mga naturang lugar.

Kabilang sa mga nagdala ng mga buoy ang BRP Corregidor, BRP Bojeador, BRP Suluan, BRP Capones at Tug Boat Habagat na nakabalik na kahapon.

Magsisilbi rin ang mga boya na gabay ng mga mangingisda at barko na daraan sa West Philippine Sea at maghahatid ng mensahe na ang katubigang malapit dito ay ikinukunsiderang “Special Protected Zones”.

Nag-sorry ang lalaking nakagawa ng mali at nakabitaw ng masasakit na salita kay Vice President Leni Robredo.

Nabatid na nagdasal umano ang naturang lalaki na sana ay hindi na makabalik pa ng Pilipinas at sana’y bumagsak ang eroplanong sinasakyan ng Bise Presidente.

Ayon sa lalaking responsable sa nasabing post, aminado siya sa kaniyang nagawang pagkakamali at nadala lamang siya sa kaniyang galit.

Dagdag pa nito, hinkdi na niya napigilan ang kaniyang emosyon kaya nakabitaw ito ng hindi magandang salita kaya’t agad niyang binura ang nasabing post.

Base naman sa mga instagram story ni VP leni, maayos naman ang kaniyang naging flight kasama ang tatlo niyang mga anak patungong Amerika.

Sa ngayon, wala pang reaksiyon ang pangalawang pangulo sa naturang isyu.

Hinimok ni Acting presidential spokesperson at Communications Secretary Martin Andanar na dapat nang mag move-on ang publiko sa mga nanalong senador sa 2022 elections.

Ayon kay Andanar, dapat magkaroon ng pagkakaisa at pagtutulungan sa pagitan ng bagong administrasyon at taumbayan.

Sinabi ni Andanar na sa tulong ng mga iprinoklamang luma at bagong mukhang senador kasama ang bagong hanay ng mga mambabatas ay magkakaroon ng pag-asa at maayos na solusyon sa krisis na kinakaharap ng bansa.

Dagdag pa ni Andanar, oras na para sumulong at magtulungan upang matugunan ang mga mabibigat na isyu gaya ng problema sa produktong petrolyo, mga pangunahing bilihin, pagbagsak ng ekonomiya ng bansa at krisis sa kalusugan bunsod ng COVID-19 pandemic.

Sinira ang aabot sa P95.2-M na halaga ng smuggled cigarettes na nasamsam noong nakaraang taon at idineklarang “overstaying” ng mga tauhan ng Bureau of Customs (BOC).

Ayon kay Port of Subic District Collector Maritess Martin, tatlo sa siyam na 40-footer container vans ay naglalaman ng mga sigarilyong nakapangalan sa Goldlink Int’l. Subic Inc., habang ang anim naman na containers ay naglalaman ng assorted household goods at iba pang produkto.

Dahil dito, siniguro ni Martin sa publiko na kanilang ipagpapatuloy ang implementasyon sa pagpapatupad ng mga hakbang upang matiyak na hindi makakalusot ang iligal na aktibidad.

Sinabi ni Martin na magpapatuloy ang kanilang kampaniya laban sa smuggling.