NATIONAL NEWS

Nanindigan si DOLE Labor Secretary Silvestre Bello III na ‘corruption-free’ ang kanilang ahensya.

Sa panayam ng DWIZ, sinabi ni Bello na bibihira lamang ang mga welga at alitan sa pagitan ng employer at employee sa nakalipas na anim na taon dahil sa mga isinagawang dayalogo.

‘Industrial peace’ aniya ang mahalagang legasiya ng adminstrasyong Duterte.

Ayon pa kay Bello, lahat ng benepisyo ay naibigay ni Pangulong Rodrigo Duterte sa mga Overseas Filipino Workers (OFWs) lalo na noong kasagsagan ng COVID-19 pandemic.

Umaasa naman si Bello na maipagpapatuloy ito ng susunod na administrasyon.

Binabantayan ngayon ng Department of Health (DOH) ang pitong lugar sa Metro Manila na nakitaan ng pagtaas ng kaso ng COVID-19.

Ayon kay Health Undersecretary Maria Rosario Vergeire, ilang mga lugar ang nagkaroon ng positive growth sa nakalipas na linggo.

Kabilang sa mga lugar na tinukoy ng ahensya ang Pasig City, Muntinlupa City, Pasay City, Quezon City, Caloocan City, Marikina, at Pateros.

Sinabi naman ni Vergeire na ang naobserbahang pagtaas ng COVID-19 cases ay hindi pa significant.

Ayon pa sa DOH, nananatili sa low-risk classification ang ncr na may mababang average daily attack rates at mas mababa sa 180 na active COVID-19 cases.

Tatlong hinihinalang World War 2 bombs na hindi pa sumasabog ang natagpuan sa Rizal Province.

Nadiskubre ang dalawang mortar bomb na may sukat na 81mm sa isang bakuran sa barangay pugay sa Bayan ng Baras.

Natagpuan naman sa isang bakanteng lote sa Brgy. Silangan sa San Mateo, ang isa pang pinaniniwalaang bomba na may sukat na 80mm.

Sa ngayon ay nasa ligtas na lugar na ang mga hinihinalang bomba at sumasailalim sa kaukulang imbestigasyon ng mga otoridad.

Umabot na sa siyam na milyong katao kada taon simula noong 2015 ang namamatay dahil sa lumalalang air pollution at toxic lead poisoning dulot ng environmental contamination.

Batay sa pag-aaral ng mga siyentista, tumaas ng 7% ang pollution-related deaths simula 2015 hanggang 2019 dahil sa polusyon sa hangin mula sa industry processes na sinabayan ng Urbanization.

Sa datos ng Global Mortality at Pollution Levels ng Global Non-Profit Pure Earth, napag-alaman na ang mga pagkasawi mula sa traditional pollutants ay unti-unti nang nababawasan pero nanatili itong malaking problema sa Africa at iba pang developing countries.

Kabilang sa mga bansang may pinaka-maraming pollution-related deaths ang Chad, Central African Republic at Niger.

Pinaigting na ng National Capital Region Police Office (NCRPO) ang kanilang operasyon laban sa lahat ng klase ng iligal na sugal.

Ipinag-utos ni NCRPO Chief, Maj. Gen. Felipe Natividad sa lahat ng district directors, police chiefs at station commanders na maglunsad ng all-out war kontra illegal number games.

Ito’y matapos ang direktiba ni Interior Secretary Eduardo Año na magsagawa ng masidhing kampanya laban sa illegal gambling, kabilang ang peryahan ng bayan.

Una nang inihayag ng PNP na namamayagpag pa rin ang peryahan ng bayan kahit sinuspinde na ito ng Philippine Charity Sweepstakes Office at Office of the President.

Batay sa record ng NCRPO, aabot na sa 370 katao ang inaresto dahil sa iligal na sugal simula Mayo 1 hanggang 15.

Kinumpirma ng Philippine Statistics Authority (PSA) na umabot na sa mahigit 10.5 million Philippine Identification Cards (Phil ID) ang idineliver sa buong bansa.

Ayon kay PSA Undersecretary Dennis Mapa, National Statistician at Civil Registrar General, katumbas ang nasabing bilang ng 33.7% ng target na ipamahagi ngayong taon.

Kinilala naman ni Mapa ang pagsisikap ng kanilang partner agencies at field offices na malaki ang papel sa produksyon at delivery ng Phil ID Cards sa mga registrants.

Samantala, tinututukan na rin ng PSA ang pagsasa-ayos sa kanilang PhilSys mobile application, na digital version ng Phil ID na maaaring gamitin sa public at private transactions.

Bahagyang nadagdagan ang mga pamilyang Filipino na ikinukunsidera ang kanilang sarili na mahirap batay sa quarterly survey ng Social Weather Stations (SWS) noong April 19 hanggang 27.

Sa naturang survey, 43% o 10.9 na milyong pamilya ang nagsabing sila ay mahirap, 34% ang nagsabing sila ay nasa “borderline poor” habang 23% ang nagsabing hindi sila mahirap.

Kumpara ito sa December 2021 survey na 10.7 million Filipino families o 43% ang ikinukunsidera ang kanilang sarili na mahirap, 39% ang nasa “borderline poor” habang 19% ang hindi mahirap.

Ipinaliwanag ng SWS na ang bahagyang paglundag ng self-rated poverty sa bansa ay bunsod ng magkahalong pagtaas sa Mindanao at Metro Manila at pagbaba naman sa Visayas at Balanced Luzon.

Samantala, aabot naman sa 1.5 milyong Pinoy ang bagong mahirap.

Iniurong sa Mayo a-22 ang nakatakdang dagdag-singil o pagtaas ng toll rates sa Manila-Cavite Toll Expressway (CAVITEX) mula sa orihinal na araw nito noong Mayo a-12.

Sa naging anunsiyo ng CAVITEX Infrastructure Corp. (CIC) at ng kanilang joint venture partner na Philippine Reclamation Authority (PRA) sa pakikipagtulungan narin ng Toll Regulatory Board (TRB),  kailangang magbayad ng mga motorista ng P33 para sa mga class 1 vehicle mula sa kasalukuyang P25.

Magiging P67 naman ang lahat ng nasa class 2 vehicles mula sa kasalukuyang P50; habang P100 naman para sa class 3 mula sa dating P75.

Ayon sa CIC, magsisimula ang Toll Reprieve Program sa loob ng 90 araw na mag-uumpisa sa unang araw ng implementasyon ng bagong toll rates.