NATIONAL NEWS

Dumarami ang kaso ng dengue sa Kidapawan City, Cotabato.

 Sa datos ng City Epidemiology and Surveillance Unit mula noong Enero a-primero hanggang Mayo a-trese, umabot na sa 206 na kaso ang naitala sa lungsod.

Tumaas ito ng 1,066 percent kung ikukumpara sa kaparehong panahon noong 2021, kung saan labing walo lamang ang naitalang kaso ng dengue.

 Nakapagtala ng mataas na kaso ang Poblacion na may 54; Sudapin na may 26; Balindog na may 17, Amas at Lanao na may tig-15 habang ang iba pang lugar ay mayroong isa hanggang dalawang kaso ng nasabing sakit.

 Nasawi naman ang dalawang indibidwal sa naturang lungsod ngayong taon.

 Kaugnay nito, magkakaloob ng libreng test para sa dengue patients ang lokal na pamahalaan, gayundin ang financial assistance package sa mga maa-admit sa ospital.

Itinalaga na ni Pangulong Rodrigo Duterte ang dalawang bagong Associate Justices ng Court of Appeals (CA).

Ito ang inanunsyo ni Presidential Spokesman Martin Andanar kung saan ang mga bagong talaga ay sina Lee Zurbito at Eleutrio Larisma Bathan.

Tiwala ang Palasyo na maisasakatuparan nina Lee at Bathan ang mandato sa kanila para sa patas, walang kinikilingan at may mataas na integridad na panunungkulan bilang CA Associate Justices.

Matatandaan na kasama sina Lee at Bathan sa mga nominado ng judicial and bar council upang humalili sa dalawang nabakanteng posisyon sa Court of Appeals at Court of Tax Appeals. —sa ulat ni Jopel Pelenio (Patrol 17)

 Magsasagawa ng systems upgrade sa North Luzon Expessways (NLEX) sa Mayo 25 hanggang 26.

 Sa abiso ng NLEX Corporation, pansamantalang hindi available ang Easytrip account management services gaya ng RFID registration, account updating via Myeasytrip web, reloading, balance inquiry via SMS at Myeasytrip web, at pagkuha ng Statement of Account (SOA).

Pinayuhan naman ng NLEX Corporation ang mga motorista na planuhin na ang kanilang mga transaksyon bago ang nakatakdang systems upgrade nito.

Inaasahang lalampas sa pre-pandemic level ang dami ng sasakyan sa Metro Manila sa susunod na buwan.

Ayon kay Metropolitan Manila Development Authority (MMDA) Chairman Romando Artes, nasa 400,000 ang average na bilang ng mga sasakyan sa NCR bago mag-eleksyon.

Sakaling magkaroon aniya ng face-to-face classes sa Hunyo ay posibleng malampasan ang nasabing bilang.

Muli namang iminugkahi ni Artes ang panukala ng MMDA na i-adjust ang oras ng pasok sa opisina ng gobyerno sa alas-7 ng umaga hanggang alas-4 ng hapon para matugunan ang matinding trapiko.

Target ng Metropolitan Manila Development Authority (MMDA) na makalap ang mga nagkalat na campaign materials sa National Capital Region (NCR) ngayong linggo.

Batay sa pinakahuling datos noong May 16, nakakuha na ang ahensya ng mahigit 470 tons ng sari-saring campaign paraphernalia na ginamit noong May 9 Elections.

Una nang nagbabala ang isang environmental group na ang mga basura mula sa naturang materyales ay maaaring makapagdulot ng pagbaha ngayong tag-ulan.

Matatandaan ding nanawagan ang Department of the Interior and Local Government (DILG) sa publiko na i-report sa kagawaran ang mga campaign materials na nananatiling nakapaskil dahil lumipas na ang deadline para sa pagtatanggal ng mga ito.

Sumuko ang limang miyembro ng New People’s Army (NPA) sa tropa ng gobyerno sa Upi, Maguindanao.

 Agad silang iprinisinta ni Lieutenant Colonel Jonathan Pondanera, Battalion Commander ng 57th Infantry Battalion, kay Major General Juvymax Uy, Commander ng 6th Infantry Division at Joint Task Force Central sa headquarters ng 57th Infantry Battalion sa Camp Edwards, Barangay Mirab.

 Nabatid na sila ay mga kasapi ng East Daguma Front, Sub-Regional Command Daguma, Far South Mindanao region.

 Isinuko rin nila ang isang 5.56mm rifle, isang caliber 30 m1 garand at tatlong 12-gauge shotgun.

 Hinikayat naman ni Uy ang iba pang mga rebelde na tularan ang ginawa ng kanilang mga kasamahan upang makapiling na ang kanilang mga pamilya at makapamuhay ng maayos.

 Samantala, nagpaabot din ng tulong si Lebak Mayor Frederick Celestial sa mga dating rebelde. –  sa ulat ni Gilbert Perdez (Patrol 13)

Patuloy ang pagbaba ng lebel ng tubig sa ilang dam sa Luzon.

Sa monitoring ng PAGASA Hydrometeorology Division kaninang umaga, bahagyang bumaba sa 190.76 meters ang water level sa Angat dam kumpara sa 190.78 noong Miyerkules.

 Naobserbahan din ang pagbaba ng tubig sa Ipo dam, Ambuklao dam, Binga dam, at San Roque dam.

 Nanatili naman sa 78.79 meters ang antas ng tubig sa La Mesa dam.

 Inaasahang madadagdagan ang tubig sa naturang dam lalo’t nag-umpisa na ang panahon ng tag-ulan.

Inihayag ng Philippine Statistics Authority (PSA) na bumaba ang imbentaryo ng bigas sa bansa.

Sumadsad sa negative 21.5 ang imbentaryo ng bigas mula March 1, 2022 o 1.6 milyong metric tons ng total rice stock inventory.

Kumpara ito sa mahigit dalawang milyong toneladang imbentaryo noong Marso ng nakalipas na taon.

Bukod dito, bumulusok rin ang year rice stock inventory ng National Food Authority (NFA) sa kanilang depositories sa negative 41.1%.

Sa kabila nito, tumaas naman ng 4.6% ang imbentaryo ng bigas sa mga commercial warehouse o mga trader ng bigas.

Tone-toneladang isda ang naapektuhan ng fish kill sa mga palaisdaan sa Barangay Tawiran sa Obando, Bulacan.

Kabilang ang tilapya at bangus sa mga naglutangang patay na isda sa Tawiran Lake simula pa nuong Lunes.

Ayon sa mga mangingisda, nawalan sila ng kitang 300 pesos sa kada banyera ng isda na halos dalawang buwan nlang inalagaan at pinamuhanan ng feeds.

Target ng pamahalaan na mabakunahan kontra COVID-19 ang 90% ng student population para sa maayos na pagsasagawa ng face-to-face classes.

Ayon kay Vaccine Czar Carlito Galvez Jr., maganda ang naging bakunahan sa mga batang 12 hanggang 17.

Katunayan aniya ay mayroon pang requests mula sa mga estudyante at magulang na isama sila sa coverage ng second booster shots.

Hanggang nitong Mayo a-tres, sinabi ng Department of Education (DEPED) na 25,668 o 56.89% ng pampublikong paaralan sa buong bansa ang bumalik na sa pagsasagawa ng in-person learning sa gitna ng COVID-19 pandemic.