NATIONAL NEWS

Nasungkit ng pambato ng Pilipinas sa e-sports ang gintong medlay sa sa 31st Southeast Asian Games sa Hanoi, Vietnam.

Ito ay sa pamamagitan ng Sibol Wild Rift Women’s team kung saan na-sweep nila ang competition sa near perfect tournament.

Nangyari ang kanilang unang sweep sa group stage na nagtapos sa 4-0 card na sinundan ng 3-1 panalo sa semifinals laban sa Thailand.

Nang makarating sa finals ay hindi nila pinaiskor ang Singapore sa 3-0.

Binubuo nina christine natividad, rose ann robles, charize doble, giana llanes, april sotto, at Angel Lozada ang Sibol Wild Rift Women’s team.

Nangunguna ang National Capital Region (NCR) sa may pinakamaraming nahuling lumabag sa gun ban kaugnay ng halalan 2022.

Batay sa datos ng Philippine National Police (PNP),  umabot na ito sa 3,308 na katao ang naaresto.

Nasa 3, 202 ang nahuling sibilyan, 61 security guard, 23 na pulis at 22 na tauhan ng militar.

Nakumpiska naman ang 2,561 na baril, 15,875 piraso ng bala, at 1,065 deadly weapons.

Habang nakapagsagawa na ang pulisya ng 3,101 operasyon sa iba’t ibang lugar upang mahigpit na maipatupad ang polisiya sa gun ban.

Posibleng pumalo sa mahigit 500 ang maitatalang mga bagong kaso ng COVID-19 cases sa mga rehiyong nananatiling mababa ang vaccination rate.

Ito’y kasunod nang naitalang local transmission ng Omicron subvariant na BA.2.12.1 sa bansa.

Ayon kay Dr. Rontgene Solante isang Infectious Diseases Specialist, napatunayan na mas nakahahawa ang nasabing subvariant na ito ng Omicron kung kaya’t importante aniya ang bakuna para sa karagdagang proteksyon.

Gayunman, hindi naman nakikita ni Solante na maaapektuhan ang ating healthcare utilization rate sa inaasahang pagtaas ng kaso ng COVID-19.

Batay aniya sa pag-aaral, mild lamang ang sintomas na sa mga fully vaccinated at mayroon ng booster dose  na indibidwal.

Nakapagserbisyo ang Service Contracting Program Phase 3 sa mahigit 40 milyong pasahero sa buong bansa simula April 11 hanggang May 16, 2022.

Sinabi ng Land Transportation Franchising and Regulatory Board (LTFRB), aarangkada muli ang naturang programa sa ikatlong pagkakataon sa iba’t-ibang bahagi ng bansa.

Nagbukas din ang rutang PITX-NLET at Cubao-NLET para naman sa mga pasahero na patungo at palabas ng Metro Manila na mula sa Region 1, Region 2, Region 3 at CAR.

Habang inaasahan naman ang pagbubukas ng mga karagdagang ruta at pag-arangkada ng mga karagdagang puv units para namn sa libreng sakay.

Layunin ng naturang programa na matulungan ang mga operator at drivers na naapektuhan ang kabuhayan dahil sa COVID-19 pandemic pati na rin ang pagtaas ng presyo ng produktong petrolyo.

Inihayag ng Department of Health (DOH) na posibleng magkaroon ng COVID-19 surge sakaling may panibagong variant ng virus ang makapasok sa bansa.

Ito’y matapos ma-detect ang 17 bagong kaso ng BA.2.12.1  variant sa bansa.

Ayon kay Dr. Alethea de Guzman, Epidemiology Bureau Chief, kung mayroon anyang papasok na bagong variant of concern na tinatawag na immune escaping malaki ang magiging epekto nito sa Pilipinas.

Aniya, malaki rin ang posibilidad na sumirit ang kaso kung hihina ang immunity ng mga nabakunahan na indibidwal kontra COVID-19.

Dagdag ni de Guzman, ang variant na BA.2.12.1 ay 20% hanggang 27% na mas nakahahawa at immune-escaping din.

Ipinabatid pa ni de Guzman na may ilang mga lugar sa bansa na nag-ulat ng pagtaas ng mga kaso ng COVID-19 sa mga nakaraang buwan ngunit hindi ito napapanatili.

Ilang nanalong local official ng Laguna ang dumayo pa ng Davao City para manumpa kay Presumptive Vice President Sara Duterte-Carpio.

Kabilang sa mga nanumpa kay Duterte sina Binan Lone District Congresswoman Len Alonte, San Pedro Mayor Art Mercado at Sta Rosa Mayor Arlene Arcillas.

Sina Alonte at Arcillas ay tumakbo sa ilalim ng PDP-Laban samantalang galing sa partido ni Duterte na Lakas-CMD si Mercado.

Ang mga nasabing local officials ay sinuportahan at inindorso ni Duterte nuong kampanya.

Umaasa ang Parish Pastoral Council for Responsible Voting (PPCRV) na makatanggap sila ng election results galing sa Overseas Voting.

Ayon kay PPCRV Spokesperson Attorney Vann Dela Cruz, nakakuha sila ng mensahe mula sa Commission on Elections (COMELEC) na handa na ang mga kopya ng ERs sa ibayong dagat.

Nabatid na wala pang election returns mula sa overseas voting ang nakarating sa command center ng PPCRV sa University of Sto.Tomas (UST).

Batay sa pinakahuling datos, umabot na sa 82,000 ang ERs na hawak ng PPCRV mula sa 107,785 na mga presinto sa buong bansa.

Inihayag ni Vaccine Czar Carlito Galvez Jr. na nagsumite na sila sa Food and Drug Administration (FDA) ng request para payagang maturukan ng second booster shot ang mga Overseas Filipino Workers (OFW) at uniformed personnel.

Ayon kay Galvez, ito ay dahil ilang manning agencies na ang nag-abiso sa mga OFWs kabilang na ang mga seafarer na magkaroon ng 4th dose ng COVID-19 vaccine para sa kanilang deployment.

Una nang inanunsyo ng Department of Health (DOH) na maaari nang makakuha ng second booster shot ang mga frontline healthcare worker at senior citizens.

Ipatutupad na mamayang gabi ng Manila Water ang water interruption sa limang barangay sa Quezon City.

Kasunod ito ng isasagawang line maintenance activity na tatagal hanggang bukas ng madaling araw.

Makakaranas ng water interruption ang bahagi ng Cenacle Drive corner Tandang Sora Avenue sa Barangay Culiat, Col. Boni Serrano corner 14th Avenue sa Barangay Bagong Socorro, at Almaciga Corner Narra St. sa Barangay Matandang Balara.

Gayundin ang Kaingin 2 bungad patungong Tumana sa Barangay Pansol, Baluyot Street corner C. P. Garcia Avenue sa Barangay Krus na Ligas.

Pinaalalahanan naman ng maniwala water ang mga apektadong residente na mag-ipon ng sapat na tubig.

Tumaas pa ang kaso ng dengue sa buong Central Visayas.

Batay sa pinakahuling datos ng Regional Epidemiology and Surveillance Unit (RESU)-7, nakapagtala ang nasabing rehiyon ng 3,177 na kaso at 31 na nasawi.

Mula ang mga nabanggit na bilang ng mga kaso sa Cebu City, Lapu-Lapu City; Tagbilaran, Bohol, at mga bayan ng Talibon at Ubay.

Pinaalalahanan naman ng health unit ang publiko na regular na linisin ang kanilang kapaligiran at ang mga posibleng pamugaran ng mga lamok.