Halos 500 Pinoy ang na-repatriate sa gitna ng patuloy na girian sa pagitan ng Russia at Ukraine.
Ayon kay Overseas Workers Welfare Administration (OWWA) Administrator Hans Leo Cacdac, karamihan sa mga na-repatriate ay seafarers na nastranded sa gitna ng nasabing girian.
Ilan naman anila sa mga Pinoy ay nagpasya na manatili sa Ukraine dahil sa mayroon itong mga asawa at pamilya.
Walang pang naitatalang Overseas Filipino na tinamaan ng Monkeypox virus.
Ito ang inihayag ni Overseas Workers Welfare Administration (OWWA) Administrator Hans Leo Cacdac mula sa Department of Health (DOH), mga embahada at Philippine Overseas Labor Offices.
Pero handa aniya ang OWWA na magbigay ng financial assistance ang mga nabanggit na indibidwal sakaling tamaan ng Monkeypox virus.
Bukod dito, posible rin silang mabigyan ng livelihood at scholarship assistance kung magpapasya na bumalik at manirahan na sa Pilipinas.
Iniimbestigahan na ng Commission on Elections (COMELEC) ang halos 1,000 kaso ng vote buying.
Ayon kay Commissioner George Garcia, naglabas na ang ahensya ng subpoenas sa mga respondents para ipaliwanag ang umano’y vote buying incidents.
Tiniyak naman ng kinatawan sa halalan na magiging transparent ito sa publiko sa pag-iimbestiga sa umano’y iba pang kaso ng pandaraya sa eleksyon.
Una nang kinumpirma ng COMELEC ang data breach sa system ng Smartmatic, ang election technology provider nito, pero iginiit na walang kinalaman sa botohan ang nag-leak na impormasyon.
Hindi makatarungan ang naging basehan ng isang pag-aaral ng American Luggage App na Bounce na nagsasabing ang Ninoy Aquino International Airport (NAIA) ang “World’s Worst Airport”.
Sa panayam ng DWIZ, nilinaw ni Manila International Airport Authority (MIAA) General Manager Eddie Monreal na ang pangangasiwa ng lounges ay nasa kamay ng airlines.
Paliwanag pa ni Monreal na destination airport o point to point ang flight sa NAIA halimbawa ang America to Manila habang ang hub station ay intermediate stop.
Aniya pagdating sa Hong Kong ay nagba-branch-out ang airlines na mayroong flights papuntang China, Manila, Seoul at iba pa kaya’t mas malaki ang facilities nito.
Tinitignan naman ng paliparan kung saan partikular na opisina o nagmulang tao ang naturang pag-aaral.
Nag-courtesy visit kay President-Elect Ferdinand Marcos Jr., ang envoys ng United Kingdom, Singapore at European Union upang personal na batiin ito bilang ika-labingpitong pangulo ng Pilipinas.
Bumisita kay Marcos sina British Ambassador Laure Beaufils, Singaporean Ambassador Gerard Ho Wei Hong at European Union Representative Luc Véron.
Una nang inimbita ni Singaporean President Halimah Yacob si Marcos para sa isang state visit.
Matatandaang nag-courtesy call naman kay Marcos ang envoys ng Estados Unidos, Japan, South Korea at India noong nakaraang linggo.
Tiniyak ng Duterte administration ang maayos na transition sa papasok na administrasyon ni President-Elect Ferdinand “Bongbong” Marcos Jr.
Sa panayam ng DWIZ, sinabi ni Acting Deputy Presidential Spokesperson at Communications Undersecretary Michel Kristian Ablan, na inactivate na ng bawat departamento ang kani-kanilang transition team.
Samantala, sinabi pa ni Ablan na wala siyang nakikitang problema kung magkaroon pa ng posisyon sa gobyerno si Pangulong Rodrigo Duterte.
Bukod aniya sa posibleng pagiging drug czar ng punong ehekutibo, may posibilidad rin na alukin ito ng ibang pwesto sa gabinete.
Bahagyang tumaas ang mga kaso ng COVID-19 sa Metro Manila.
Ayon kay OCTA Research Fellow Dr. Guido David, umakyat sa 74 ang daily average ng mga bagong kaso ng virus na naitala mula May 23 hanggang 29 kumpara sa 72 na naitala noong May 16 hanggang 22.
Tumaas aniya sa 1.4% ang positivity rate, habang nasa 1.08 ang reproduction number na naitala sa NCR.
Iniulat rin ng OCTA na nasa 23% ang healthcare utilization ng rehiyon ngunit nasa ”very low” category pa rin ito.
Sa kabila nito, sinabi ni David na nananatiling low risk sa COVID-19 ang Metro Manila.
Nitong linggo nang makapagtala ang Pilipinas ng 200 kaso ng COVID-19 infections at 2,434 active cases.
Nag-abiso ang ilang kumpanya ng langis kaugnay sa ipatutupad na dagdag-bawas sa presyo ng produktong petrolyo simula Bukas, Mayo 31.
Ayon sa Pilipinas Shell Petroleum Corp., Chevron Philippines Inc. o Caltex at Seaoil Philippines Inc. Ipatutupad nito ang P1.70 na bawas-singil sa kada litro ng gasolina.
Aabot naman sa P2.45 ang umento sa kada litro ng kerosene habang P1.20 ang dagdag-singil sa kada litro ng diesel.
Ipatutupad rin ng Cleanfuel at Petro Gazz ang nasabing price adjustment maliban sa kerosene na wala sila.
Batay sa datos ng Department of Energy (DOE), umabot na sa P25.55 ang net increase sa year-to-date adjustments sa kada litro ng gasolina, P29.10 sa kada litro ng diesel, at P25.20 naman sa kada litro ng kerosene.
Naniniwala si Senador Sherwin Gatchalian na mataaas ang magiging kumpiyansa ng business sector sa Economic Team ng susunod na administrasyon.
Ito ayon kay Gatchalian ay dahil kilala na ng business sector ang magiging miyembro ng Economic Team ni President Elect Ferdinand Bongbong Marcos at pamilyar ang kanilang direksyon para sa ekonomiya at pananalapi bilang mga naging bahagi na ng mga dating administrasyon.
Una nang sinabi ni BBM na kaniyang napili si Bangko Sentral Governor Benjamin Diokno bilang kalihim ng Department of Finance kung saan unang naging Budget Secretary si Diokno ng Duterte at Estrada administrations.
Itatalaga naman si Secretary Arsenio Balisacan sa NEDA at ito rin ang puwesto ng opisyal noong Aquino administration samantalang inappoint naman bilang Bangko Sentral Governor si dating Secretary Felipe Medalla na naging kalihim ng NEDA nung Estrada administration.
Magiging kalihim naman ng DPWH si San Miguel Tollways Corporation Chief Executive Manuel Bonoan na DPWH official na sa Ramos, Estrada at Arroyo administrations
Binigyang diin ni Gatchalian na kailangan ng certainty at continuity sa mga polisiya sa ekonomiya ngayong nahaharap ang bansa sa pandemya, krisis sa Ukraine, mataas na presyo ng petrolyo at mga bilihin.
Tiyak naman ni Gatchalian na madaling makakalusot sa Commission on Appointments ang mga itatalaga sa Marcos administration na mayruong mahusay na track record. —sa ulat ni Cely Ortega-Bueno (Patrol 19)
Patay ang tatlo katao sa magkakahiwalay na aksidente sa Kalinga at Benguet.
Ayon sa PNP, unang nasawi noong Sabado si Claire Dalupin, 39 anyos kasama ang kaniyang baby na edad anim na buwan matapos mabangga ng SUV, sa kanilang bahay.
Dalawa rin ang nasugatan sa nangyari na kinilalang sina Kristell Gasatan at Beverly Dacumos.
Kasabay nito, nasawi rin sa Benguet ang anim na taong gulang na lalaki na kinilalang si Zendan Oyaan matapos mabangga ng sasakyan.
Naaresto naman ang driver ng sasakyan na kinilalang si Marcial Buyuccan na nahaharap na sa kaso.