NATIONAL NEWS

Isang pulong ang idinaos sa pagitan nina President-Elect Bongbong Marcos at ilang incoming at incumbent na miyembro ng Kongreso.

Ito’y upang talakayin ang mga legislative agenda ni Marcos at detalye ng kanyang unang State of the Nation Address (SONA) sa Hulyo.

Kumatawan para sa senado sina Senate President Pro-Tempore Ralph Recto, Senate Majority Leader Juan Miguel Zubiri, Senators Nancy Binay, Ronald Dela Rosa, Lito Lapid, Ramon Revilla Junior;

Incoming Senators JV Ejercito, Jinggoy Estrada, Loren Legarda at Raffy Tulfo habang binubuo ang house contingent nina House Majority Leader Ferdinand Martin Romualdez at Isabela Rep. Tonypet Albano.

Binigyang-diin ni Marcos na gaya ng mga obserbasyon ay naniniwala silang magkakaroon ng maayos na relasyon ang executive at legislative branches lalo’t “well represented” ang Luzon, Visayas at Mindanao.

Pinayuhan naman ng susunod na pangulo sina Incoming Speaker Romualdez at Zubiri na mag-usap at talakayin ang mga posibleng legislative agenda para sa SONA lalo’t si Zubiri ang isa sa pinaka-matunog na contender sa pagiging Senate President.

Gayunman, hindi inungkat ni Zubiri ang posibilidad ng term-sharing sa senate presidency sa kanyang pakikipag-pulong kay Marcos.

Tinututukan na ng Department of Health (DOH) ang pagtaas ng dengue cases sa tatlong rehiyon sa bansa.

Tinukoy ni DOH-Epidemiology Bureau Chief, Dr. Alethea De Guzman ang Region 3 o Central Luzon, Region 7 o Central Visayas at Region 9 o Zamboanga Peninsula.

Malaki anya ang kontribusyon ng tatlong rehiyon sa mga bagong kaso noong nakaraang buwan, maliban sa Metro Manila.

Batay sa datos ng DOH, aabot sa 6,622 dengue cases ang naitala sa bansa mula April 10 hanggang May 7.

Sa naturang bilang, 908 cases o 14% ay mula sa region 8; 881 cases o 13% sa region 7 habang 593 cases o 9% sa region 3.

Una nang iniulat ng kagawaran na nakapagtala sila ng pagtaas ng dengue cases simula noong katapusan ng Marso 20 hanggang Abril 30 na umabot sa 11,435 kumpara sa 5,901 cases sa kaparehong panahon noong isang taon.

Isa pang opisyal ng Bureau of Plant Industry (BPI) ng Department of Agriculture (DA) ang inakusahan ng tangkang pangingikil sa isang kooperatiba at pagpupuslit ng mga sibuyas sa bansa.

Ito ang ibinunyag ni Wilma Ocampo ng Cambridge Cooperative sa nagpapatuloy na pagdinig ng House Committee on Agriculture and Food (HCAF) sa umano’y talamak na smuggling ng agricultural products sa bansa.

Ayon kay Ocampo, tinangka ng ilang empleyado ng DA na humingi ng kalahating milyong pisong “tara” mula sa kanilang grupo kapalit ng pag-release sa kanilang imported na gulay mula sa mga pantalan.

Pawang mga tauhan anyang isang Jesusa Ascutia ng BPI, na nasa ilalim ng DA, ang nag-utos sa mga empleyado at bandang huli ay nagkatawaran na umabot na lamang sa 150,000 pesos.

Gayunman, nilinaw ng DA-BPI na ang kooperatiba ay nag-import ng sariwang gulay mula China, na ikinukunsiderang iligal sa Pilipinas at tanging pwede ay frozen vegetables.

Naungkat din ang umano’y pagkakasangkot ni Ascutia sa smuggling ng puting sibuyas kung saan 7,871 metric tons ang pumasok sa bansa mula Enero hanggang Pebrero kahit ang importation validity ay nag-expire noong December 31, 2021.

Samantala, aminado naman si DA-BPI Director George Culaste na umabot sa 35.8 million pesos ang hindi nakoletang regulatory fees noong si Ascutia ang plant quarantine service manager at station manager sa Danao City, Cebu mula January 16 hanggang July 17, 2021.

Wala si Ascutia sa nasabing pagdinig kahapon pero iimbitahan ito ng kamara sa susunod na hearing.